1 Ishi baci avu taku vu va̱ ɗa,

vuza na wu apai mani ma̱ a̱na̱ku a̱va̱

ɗa baci n cinai nu pulai,

ɗa mo oɓongi nu,

ko vuza wi a kugoyo mu ba.

2 Mi ishi a kuɗika wu,

n tuka̱ a kpaꞋa ka̱ a̱na̱ku a̱ va̱

a̱ yi na ugbari mu.

Mi shi e kuneke wu ma̱kya̱n

usatari n ili wali vu soꞋo,

ma̱kya̱n mu umaci u ruman u va̱.

3 Kukiye ku ugula̱ ku ni ki ta̱

ɗaka vu kaci ka̱ va̱,

kukiye ku usingai ku ni

tamkpamu, wo oɓongi nu mpa.

4 A̱ɗa̱ n kere n Urushelima

yaꞋankai mu uzuwakpani.

yi a kugbandarasa tsu a makyan

ma na ci a kupana uyoꞋo ba.

5 Yayi na ɗe, a̱ ku uta̱ a kakamba,

u tsubaki a kavangatsu ka Macigi ma̱ ni?

A ɗaka vu maɗanga ma ruman

ɗa n jimgbasai nu,

a̱ ubuta̱ u na a matsai nu,

a ubuta̱ u na a̱na̱ku a̱ nu a matsai nu.

6 Zuwa mu mo okpo ka̱ta̱mba̱ri a̱ ka̱ɗu ka̱ nu,

mokpo tsu makawani

ma ka̱ta̱mba̱ri e kukiye ku nu,

adama a na utsura u va̱,

wi ta̱ tsu ucigi wu ukpa̱,

utsura u cisheꞋe tsu ucigi

kowanai ɗa tsu kasaun.

KayaꞋa ku ucigi ki ta̱ tsu kayaꞋa ka akina,

tsa akina a na i a̱ kukula̱ n usuɗukpi.

7 Mini ma na ma ayai,

mi a kufuɗa ku una akina a ucigi a ba,

nɗolu tukpa m mini

n kufuɗa kupura̱ngu ucigi wa ba.

Ɗa baci vuza u nekei udukuyan u ni ra̱ka̱,

adama a na u tsula ucigi wa,

i ta̱ o ku zoꞋoso yi o goyo yi.

8 Ci ta̱ n vangu vu tsu,

a̱yi na ka̱ta̱ u muɗa̱i mani ba.

Yiɗa̱i tsu kuyaꞋan adama a vangu vu tsu,

ɗa baci a̱ ta̱wa̱i kuyaꞋan

ukuna u mazama ma̱ ni?

9 Ishi baci a dana a̱yi mashilya maꞋa,

ci ishi a kumaꞋaka yi mashilya mu ugaɗi ma azurufa.

Ishi baci a dana a̱yi utsutsu u ɗa,

ci ishi a kukanza yi nu nɗanga n Sida.

10 Mpa mashilya maꞋa,

mani ma̱ va̱ maꞋa imaꞋashi yu ugaɗi ya.

A̱ ubuta̱ u Macigi ma̱ va̱,

mo okpo yi ta̱ ili i kutuka̱ m ma̱ta̱na̱.

11 Sulemanu wi ta̱ n kashina ki itacishi,

a iɗika i Balu-hamonu.

U nekei kaꞋa ekiye aza a na a kucimba kaꞋa,

yaba dem wi ta̱ a̱ kutuka̱ n azurufa ka̱kpa̱n (1,000),

a̱ ka̱tsuma̱ ki ikebe yu uciyi i kashina i ni.

12 Ama mpa mi ta̱ n kashina ki itacishi ka̱ va̱,

avu Sulemanu mi ta̱ e kuneke wu ikebe azurufa ka̱kpa̱n (1,000).

mi ta̱ a kuneke,

aza a ulinga azurufa amangatawenre e re (200).

13 Avu Macigi ma̱ va̱,

avu na vi a ida̱shi punu a kashina ka,

avu na a̱ja̱Ꞌa̱ a̱ va̱ i a̱ kula̱na̱ wu,

yaꞋan m pana ka̱la̱ka̱tsu ka̱ nu.

14 Macigi ma̱ va̱,

ta̱wa̱ wa̱ va̱ gogoꞋo tsu mesheun,

tsu maku me mereꞋe

a kubana ubuta̱ wa aginda a ili ma̱gula̱ni.