1 Yꞌaraanay, baraak maagt bitdꞌiini jillaay ani toon toona dehookna akantiib. Laakiin gaal han maagt danꞌiyeek, hini jillaay Ubaaba dehoon infariid gaal eefi, aree baruuh Yasuuꞌaab Umasiih, Ooshboob Oongaal ikati. 2 Umasiih uukna aree tumaagtuun haay afoomtinyi sabab ikati. Hineet toomaag toobhaat kitti, laakiin kasseeh tuduniyaati dehayiit maagnaay han afoomi tindi.

3 Bariiteeh tiwasi nisnaakiireek, aflaay barooh sidik nikteen nikati. 4 Uutak barook akteen indiib, baruuh sooyiiniyeet toona biisinaakiireek, baruuh gwisreebi. Aree uusdik bariiyooh kiihaay. 5 Laakiin gaal han bariiyeeh ibhali isnaakiireek, Ukwaasanaay uureer bariiyooh timmiimaab ikati. Tuun batuuh aree hinin bariiyooh neefiyeet toona tisookiin. 6 Bariiyooh eefi, bariiyooh akwanri indiibka, baruuh ibakii Yasuuꞌa idꞌiyeet toonaatiit sakiiniyeet toonaati.

7 Yꞌarawaanay, ani gayiit wasi dehookna kaakitib, laakiin shꞌiiyaat wasi sooyani hookna, tiwasi tibadootee shꞌiika timaasiwna, toon tuwasi tushꞌiiya baraak suur timaasiwneet tudiigwat tikati. 8 Masi ani gayiit wasi dehookna akantiib, batooh usidkuuh Yasuuꞌiib lawiya, bareeyookna han lawiya. Uuthbin hasamiini, aree usidki nuur suur akay buubiya.

9 Nuuriib eefi indiibka, laakiin usanooh imooriibeek baruuh masi thibniib eefi. 10 Usanooh areeyiiniibka, nuuriib kwanri, aree barooh tingiifna weet kitehaay. 11 Laakiin usanooh inriibka thibniib eefi, aree thibniib sakiini. Barooh uuthbin hamasheesiini akay naad eebiyeeb kiikan.

12 Yꞌaraanay, bariiyooh oosmi sabbii,

tumaagnaaytuukna afoomta akay, ani bareekna beeti akantiib.

13 Ibaaba, baraak barooh whankaay tikanneet toonaati sabbii,

bareekna beeti akantiib.

Yꞌar yꞌadhami, baraak tumaagtikina oongaal tigribnayt,

bareekna beeti akantiib.

Yaa inisrika idaayi, baraak Ubaaba tikannayt,

bareekna beeti akantiib.

14 Ibaaba, baraak baruuh aab iiktiyeeb whankaay tikannayt,

bareekna beeti akantiib.

Yꞌar yꞌadhami, baraak akraabaanayt,

bareekna beeti akantiib,

aree Ukwaasanaay ibhali hookna ikweerna,

aree tumaagtikina oongaal tigribna.

15 Tuduniya baaꞌareeyaana, tari tuduniyaatiib teefeet toona kastooh baaꞌareeyaana. Gaal han tuduniya areeyiiniyeek, Ubaabaay uureer bariiyooh kadaaya. 16 Tuduniyaatiib teefeet tuuna kastuuh, wꞌaadamiit maagnaayti harawa tikati. Bariitaah tiliiliya yhariwneet toonaawwa, baruuh ibariyeet tinaateebwa ishaga baruuh sakiiniyeeb ishagaawwa faash ikati. Taan bataah Ubaabaay kaꞌeeyaana Laakiin tuduniyaatii yꞌeen. 17 Tuduniyaawwa batuuh harriiweet taanaawwa iyaayiina, laakiin Ukwaasana harriiweet toona sakiiniib uutak diimaab ikwaar indi. 18 Yꞌaraanay, tuun batuuh toosꞌa tꞌaakhareet tikati. Umasiihiib wꞌashu yꞌiiniyeet toona baraak soomamtaana. Oontꞌa han gwida Umasiihi ashoob ikatiin yꞌaaba. Tuusꞌa tꞌaakhareet yꞌaat tikatiyeet toona bak nikteen. 19 Baraah hoon giigiyaana, laakiin baraah sidik hineeb kiikeen. Baraah hineeb iiktiineek, geeboon sꞌaab iiktiin. Laakiin ugiiguuhna baliin bareesoohna gaal han hineeb biikaayeet toona rhisiini.

20 Laakiin baraak Umugaddas Uungaal Eeshuuk Imugaddasaayee ishaamit hookna aree kassaak oosdik tikteenna. 21 Baraak oosdik bitkaanni sabbii bareekna beeti kaakitib, laakiin baraak oosdik tikteenna, aree usidkii gwisir kaꞌeeyaanayt, ani bareekna beeti akantiib. 22 Ugwisri aabu? Uutak ugwisri, Yasuuꞌa Umasiih ikatiyeet toona ittawiib barooh ikati. Uun uutak aree Umasiihi ashu ikati, aree Ubaabaawwa Wꞌoorwa ittawi. 23 Wꞌoor ittawiibka, Ubaaba han ittawi. Wꞌoor agbiliiniibka, Ubaaba han agbiliini.

24 Baraak tibadootee timaasiwneet tudiigwat geebookna daatiniyeet toonaati. Batuuh geebookna daatniyeek, baraak han Wꞌooriibwa Ubaabaaywa daayi tiyadna. 25 Aree toon toona baruuh waadiyaaya hoon aree batuuh Umidhhan udaayim tikati.

26 Ani teen teena bareekna beeti akantiib, baliib bareekna kwakwidhistiib jarrabiyaanneeb akantiib. 27 Laakiin baraakna, tꞌameeshimtooy bariisooh timriineet hookna daayi indi, aree gaalnaay allamtii dehaay han shanha kitteena. Laakiin bariiyuuh uushmuut kasteeh teena allamiini hookna, aree been uushmuut sidiku, haraab kiiki. Uushmuut allamiya hookna, aree hookna daayi indi.

28 Yꞌaraanay, oontꞌa soorarimni bariiyooh daayaana. Aflaay baruuh lawiiniyihoob, bariiyooh wꞌaayiib akraab akay sikwꞌiib anu suurii ningadi.

29 Baruuh shibukinaab ikatiyeet toona baraak tikteenneek, tooshbu sakeen kassaah bariisooh faray ikatiineet toona tikteenna.