1 Yasuuꞌa Umasiih ikatiyeet toona aamaniiniibka Ukwaasanaay faraay ikati. Ubaaba areeyiiniib wꞌoorooh han areeyiini. 2 Ukwaasanaay yꞌar kak areenayeet toona bak nikteen: Ukwaasana areeyeetiit tiwaseeteeh nisnaakiirihoob, Ukwaasanaay yꞌar areenayeet toona nikteen. 3 Uun baruuh Ukwaasanaay ooreer ikati: tiwaseeteeh nisnaakiir. Aree tiwaseetaah akraat kiikeen. 4 Ukwaasanaay faraay ikatiibka tuduniya ganriib. Taan tinasra tuduniya girbaata, aree wꞌiimaaniisoon tuduniya nigarib. 5 Tuduniya ganriib been aabu? Been baruuh Yasuuꞌa Ukwaasanaay Oor ikatiyeet toona aamaniiniib oobhaat ikati.

6 Eeyamwa ubooyiiwwa eeyaab, Yasuuꞌa Umasiih ikati. Iyamee oobhaat yꞌaab kiiki, laakiin iyameewwa ubooyiiwwa eeya. Aree Aashuuk sidkiib ikatiini sabbii, teen tibadeha Aashuuk sooyaana. 7 Mhay badehi ikatiin beentooy eefeen: 8 Aashuukwa, aayamwa, uubooywa, kassaah aamhay gat badeha sooyeen. 9 Hinin wꞌaadamiit badeha aamannay, laakiin Ukwaasanaayt tibadeha winneet wawinkaata. Aree baruuh teen tibadeha Wꞌooriyooh sooyaabi. 10 Aflaay kassaah baliin Ukwaasanaay Wꞌooriib aamaneen teen tibadeha uginꞌiib ibariin. Laakiin baliin Ukwaasana baaꞌaamanay barooh isgwaasirna. Baraah Ukwaasana Wꞌooriyooh diyaab ikatiyeeb ibhali aamanaab kiikeenayt barooh isgwaasirna. 11 Aree taan bataah tibadehaata: Ukwaasana umidhhan udaayim yhii hoon, aree uun umidhhan Wꞌooriyooh eefi. 12 Wꞌoor ibariibka umidhhan han ibari. Ukwaasanaay Oor baabariibka umidhhan kiibari.

13 Ukwaasanaay Wꞌooriib oosmii aamaneen bareekna beeti teen teena akantiib. Aflaay umidhhan udaayim tibariineet toona iikan tiyadna. 14 Ukwaasana nidawilihoob oon wꞌakra ginꞌa ibariin nikati: baruuh harriiweet tehayꞌaatii naat han raatnayeek, baruuh eemsiiw hoon. 15 Naat raatnayeebka, baruuh eemsiiweetoon toona nikteeniyeek, baliit barooh raatnaneet teena nimeereet toona nikteen.

16 Gaal han usanooh maagnaayt tooyat baasitoobiit shagaamee rhiiniyeek, baruuh siileeliiniyeet toonaatu, aree Ukwaasana barooh midhhan iyaaw indi. Een bareeh baliib maagnaayt tooyat baasitoobiit igwabib bareeh haay asehariiw. Maagnaayt tooyat tistoobiit teefi. Beet batooh dehaay siileelaana kaadi. 17 Kastuuh tumaagnaayti shaga danuub ikatiin, aree danuub gal tooyat baasitoobiin eefeen.

18 Ukwaasanaay faraay ikatiibka tumaagnaayti shaga soorarimti biidꞌiyeet toona nikteen. Been Ukwaasanaay faraay ikatiib Ukwaasana barooh ishidhhiin, aree tumaagtikina uungaal barooh kaꞌadaaya. 19 Hinin Ukwaasanaay ar nikatiyeet toona nikteen, aree kastuuh tuduniya tumaagtikina oongaalnaay whii abuukiib ikatiin. 20 Ukwaasanaay Oor eeyaayt tufhama yhiiyyeetoon toona han nikteen. Aflaay baruuh sidkiib ikatiyeet toona nikteen. Hinin Ukwaasana usidkiinaay neefi, aree Wꞌoorooh Yasuuꞌaab Umasiihiib neefi. Baruuh Ukwaasana usidkiibu, aree umidhhan udaayim ikati.

21 Yꞌaraanay, isanamaayee igarooyeekna kaleewaana.