1 Yꞌarawaanay, ikati shuukka baaꞌaamanaana, laakiin aashuuk Ukwaasanaay ikatiineeb biikaayneeb tikteeniini jillaay jarrabaana. Gwida gwisri nabiya tuduniyaatiib barara. 2 Tuun tuuna aree Ukwaasanaay Eeshuuk kak tikteeniineeb sootni: Yasuuꞌa Umasiih wꞌaadamiit hayꞌaatiit yꞌaab ikatiyeet toona sooyeen Aashuuk, baraah Ukwaasanaay Eeshuuk ikatiin. 3 Laakiin aashuuk Yasuuꞌiib baabhaliiyay Ukwaasanaay shuuk kiikeen. Aan aashuuk Umasiihi ashu ikatiina, aree baraak yꞌeena diyee timaasiwna. Oontꞌa han baraah suur akay tuduniyaatiib eefeen.

4 Yꞌaraanay, baraakna Ukwaasanaay tikatiina, aree bareeh tigribna. Bareeyookna eefeen aashuuk, tuduniyaatiib eefeen ishuukeeka wawinkaabayt bareeh tigribna. 5 Aan inabiya igwisri tuduniyaatii ikatiinayt, tuduniyaati haaliib hadiideen. Tuduniya han bareeh tisnaakiir. 6 Hinin Ukwaasanaay nikati, Ukwaasana ikteeniibka isnaakiir hoon. Laakiin Ukwaasanaay baakaayka kiisinaakir hoon. Bak aree Eeshuuk usidkiiwwa igwisreewwa wawaasnay.

7 Yꞌarawaanay, aflaay taktak areenayeet toonaatu, uureer Ukwaasanaay yꞌiini. Areeyiiniibka Ukwaasanaay faraay ikati, aree Ukwaasana ikteen. 8 Ukwaasana reer ikatiyi sabbii, baaꞌareeyayka Ukwaasana kiikan. 9 Ukwaasana ureerooh ibitkeen bak rhisiya: baruuh Gaalꞌoorooh tuduniyaatii dehaay diigwatiyaayt, aflaay bariiyooh geebii umidhhan nimeer nikati. 10 Uun baruuh ooreer ikati: Ukwaasana areenaayi sabbii kiiki, laakiin baruuh areeya hoon akay tumaagtuun afoomtinyi jillaay Wꞌoorooh diigwatiya. 11 Yaa yꞌarawaan, Ukwaasana winneet areeya hoon akay, hinin han taktak areenayeet toonaati. 12 Gaal han Ukwaasana rhaab kiiki, laakiin hinin taktak areenayeek, Ukwaasana hoon kwanri aree ureerooh hoon timmiisiini.

13 Baruuh Ishuukeeh yhii hoon akay, hinin bariiyooh nikweereet toona nikteen, baruuh han hineeb eefiyeet toona nikteen. 14 Ubaaba Wꞌoorooh tuduniya ishidhhiini jillaay ifdigeet toona rhina aree tibadehaateen soona. 15 Yasuuꞌa Ukwaasanaay Oor ikatiyeet toona gaal han isookiineek, Ukwaasana bariiyooh kwanri, baruuh han Ukwaasanaay kwanri. 16 Aflaay hinin Ukwaasana dehoon ibariyeeb ureerii dehaay adehamnayeet toona nikteen.

Ukwaasana reeru, aree ureeriib kwanriibka Ukwaasanaay han kwanri. Ukwaasana han bariiyooh kwanri. 17 Oontꞌaaneet, uureer ibitkeen timmiimiya, aflaay whukwimiit tooyin akra ginꞌiib nikati. Toon tuduniyaatiib hinin barooh tꞌiiteeb nikatiyi sabbii tikati. 18 Ureeriib mirkwaay kiihaay. Imirkwaay ujasaay geeb sakiini laakiin uureer usidki imirkwaay mhaliini. Uutak urankwiib ooreeriib timmiimaab kiiki.

19 Baruuh hankaab areeya hoon akay hinin han areenay. 20 Hinin Ukwaasana areenay niyadeek, laakiin isanaayeenwa tikwaateenwa neerbeek, gwisreeb nikati. Isanaayeehwa tikwaateehwa ibaruuh rhaab ikatiyeeb biiꞌareeyayeek, Ukwaasana ubaruuh rhaab biikaayeeb, kaꞌareeya. 21 Toon tuwasi Umasiih yhii hoon: Ukwaasana areeyiiniibka isanaayeehwa tikwaateehwa han ibakii areeyiini.