1 Shaawti kastooh toomaagwa kasteeh titaaliiwwa, wharaawwa, tehasaadaawwa, kasseeh ijinsaayeet tiyaandiiwwa hookna siisagna. 2 Eejna igayii faray tꞌiiteeb akeena! Baraah diimaab nhas shuukeet aatee dehaay yhayꞌana, aflaay teen tiyꞌaatee wintiit umidhhan imeer ikatiin. 3 Uuktaab "Wꞌankwana kak sidik daayiib ikatiyeet toona dꞌamistaana." diyaabi.

4 Yasuuꞌa Umasiih, Wꞌawi udhhaniib, uudehay iribneeb laakiin Ukwaasana waasiyaneebwa bariiyooh dehaay alyaab ikatiibwa beeti mꞌaana. 5 Baraakna han, yꞌawi idhhaniib ishuuki gaw eedꞌir tꞌiiteebaana. Baraakna beentooy mugaddasa fagiiriya tikatiina, Yasuuꞌaab Umasiihiit shamaamtii aree Ukwaasana afirhiseent karaama iifirꞌa tiyadna. 6 Ukwaasana uktaabiib:

"Shibibna, Sihiyooneeb aweeb daasani,

rikwni awi waasamaabwa alyaabwa ikati,

aree bariisooh aamaniiniib

gaal han iisikwꞌa kiidi." diyaabi.

7 Oontꞌa bareek yꞌaamaneen, uun wꞌawi alyaana dehookna ikati. Laakiin baliib yꞌaamanaab baakaynee dehaay,

"Wꞌawi idꞌaariiga iribneeb,

urikwni awi iki." indi uuktaab.

8 Aree weer kitaab:

"Wꞌawi oodehay isoogiif,

aree uliilaaw bareeh dhadhibsiiniib ikati." indi.

Baraah tudiigwat sinaakraab kiikeenayt goofameen. Beet toona han bareeh Ukwaasana dehaay niyaamaab iikti.

9 Laakiin baraakna waasama dehaywa, hadꞌaayi fagiiriyaayi jamꞌaawwa, mugaddas dehayaawwa, Ukwaasanaay dehaywa tikatiina. Bareekna uthibnii unuurooh wꞌajiibi beeti haay eeyaab Ukwaasana, bariiyooh whamaad sooyeen tikatiina. 10 Baraakna door gaal dehay kitteena, laakiin oontꞌa Ukwaasanaay oodehay tikatiina. Door gaal rhamaat miraab kitteena, laakiin oontꞌa rhamaat timriina.

11 Yꞌarawaan, baraak toon tubuuti kehii girbaabwa iibaabkinaabwa tikatiina. Aflaay ani andi hookna, igarooyaakna yhariwneet tinaatee sigiina, taan bataah infiseeyookna kehii finaayeen. 12 Oodehay yꞌaamanaab baakayni bitik daayi kwiraay kwiriina, baraah maagnaayti dꞌuuyii bareekna atehimeeneek han, tooyin Ukwaasana hinin rheesamiiniyeet baraah daayiinayt sakee rheen hookna aree Ukwaasana isoowiinna.

13 Wꞌankwana oodehayi hadꞌa kasseeh tisnaakiirneet toona hookna harriiw, Wꞌimbiraatoor bareekna hadꞌaamiiniib aree daayiib sinaakirna, 14 masi yhaakma kasseeh ibakii tisnaakiirneet toonaati. Tumaagtikina jasaayeeni jillaaywa, tushbootikina aree yhamidneet toonaati jillaaywa Wꞌimbiraatoor bareeh diigwatiya. 15 Ukwaasana oodehay yꞌamagwa yꞌagimwa daayiinaayt sakeetiit dinsiteeneet toona hookna harriiw. 16 Baraakna fadag dehayiit kwiriina, laakiin masi Ukwaasanaay ikishiyaayeet kwiriina. Tifadagooytookna aree ibakii maagti shagaay baadꞌiina. 17 Oodehay kasseeh hamooysaana, Ukwaasanaay oodehay han areeyaana. Ukwaasana rikwiina, aree whadꞌa hamooysaana.

18 Baraak ikishiya yꞌankwanaayeekna ibakii sinaakirna, aree hamooysiteeneet toona rhisaana. Beet toona baliib idaayiibwa iwawindaawwa eebhat kiikeena, laakiin baliib yꞌamag niyaay ikatiin han bak weerna. 19 Baraakna Ukwaasanaay dehaay nhas tikatiineet toonaati sabbii, adlimamiit tilhanay timtariimneek, Ukwaasana baarakiini hookna. 20 Laakiin baraakna maagt gaat tidꞌanihoob jasaamteeneeb ijasa timtariimneek, naat hooy imaar kitdiina. Laakiin daayiinaayti dꞌuuyi jillaay lhameetiit timtariimeek, Ukwaasana baarakiini hookna. 21 Aflaay baraak Umasiihi harꞌii sakeen Ukwaasana igwirhaayee dehaay waasiya hookna. Umasiih bareeyookna jillaay lhamiyaayt misaal iki.

22 Umasiih maagt gwibbaab kiiki

aree tari gwisir door han hadiidaab kiiki.

23 Baruuh amaag itweeraayeek han, illaataab kiiki. Lhamiyanihoob, fikaab kiiki. Laakiin baruuh Ukwaasana wꞌadil ikwasiib aamaniya. 24 Umasiih hineet tumaagti rabi ifiyak. Baruuh usaliibi kehii mismaraayee itoothꞌa, shaawti hinin toomaag ishtiit daayiib nikweereet toonaati. Bariiyuuh ijarhamti bareek isinꞌiir. 25 Baraak tꞌanooteet hawriiktaana. Oontꞌa laakiin wꞌanooteegaayookna bareekna ingwꞌiid beeti tꞌagarna.