1 Oontꞌaaneet bataak taamꞌat han eendeekna ibakii naati hankaayka daasteeneet toonaati. Baraah hineet tudiigwat eeribneek han, wꞌadabuukna dehaay shiboobtiit aamansi indi. Naat han bitdiineet toonaati. 2 Baraah bataak kak Ukwaasanaay mirkwaayii nhas kwiraay tikweerneet toona rhi iyadnayt, naat han bareeh bitdiineet toonaati. 3 Daawriyuukna barraay lawiini daawri biiꞌakaayeet toonaati, hamooti haduugw tꞌiiteenaawwa, dimꞌaraay jawharaayi mhakwaraawwa alya halakaawwa tꞌiiteena biiꞌakaayeet toonaati. 4 Laakiin iginꞌaayeekna daawriisaana, tatageegti naawiiwwa dini shuukeewwa tehooyteekna sinhasna, baliin baraah Ukwaasanaay suurii wint takwi ikatiin. 5 Suur Ukwaasana yꞌibidt taamꞌat barooh sꞌayaamiina, aree eendeehna naati hankaayka daaseetiit igarooyeehna daawriisiin. 6 Masalan, Saara Ibraahiim tisniikar, wꞌankwanaayu diitiit waliikti. Usidkii sakeetiit naat han bitrakwiineek, bataak batooh sidkiit arteeh tikatiin.

7 Oontꞌaaneet aanda han timꞌateekna daayiib timshabiibneet toonaati. Teemꞌat hamooysaana, bataah bareesookka nꞌakwkaata, Ukwaasanaay oomyaaw aree geebookna itꞌidhidh iyadna. Malya tusileeltookna naat han aaf kitdi.

8 Aakhar, kassaakna taktaki geeb hiddaab kwiriina. Shiboobna, isanaayeet areesamaana, nꞌakwmanaayaana aree baatatageegaana. 9 Toomaag maagtii baakwiseena, ooneew neewii baakwiseena laakiin deharna. Ukwaasana toona toonaatii dehaay waliikiya hooknayt, aflaay tibaraka kwasaamteena. 10 Uuktaab:

"Umidhhan areeyiiniibka

aree daayiit yinaati rhitiib harriiwka,

umiidalaabooh tumaagtii anfiyeet toonaatu

aree uyafooh igwisri bhaliyee danbiyeet toonaati.

11 Baruuh ibakii tumaagti salal ishtiit daayiinaayt sakiini.

Baruuh ibakii mꞌasig harriiw aree umꞌasgi salal anbiik.

12 Wꞌankwanaay oodehay eeshboob ingwꞌiid,

aree tusileeltoohna isnaakiir,

laakiin Wꞌankwana baliib toomaag sakeennaayi kehii ingadi." indi uuktaab.

13 Daayiinaayti dꞌuuy winneet tehariwnihoob aaw adaayi hookna indi? 14 Laakiin tooshbu tidꞌani jillaay lhamteeneek han, baraakna baarakamaabaana. Gaal han baarakwiina, naat han baahasiikna. 15 Laakiin uginꞌiyookna Umasiih Wꞌankwanaayt tifilnaat daasaana. Tehooyteeyookna eefeeb isꞌayaay sabbii bareekna raatiiniibka, diimaab bariiyooh dehaay tigweebneet toonaatii dehaay marna. Laakiin toon toona tatageegtiib aniwwa hamooysitiiwwa dꞌiina, 16 uginꞌookna sinhasna, aflaay baraak Umasiihi aamananaayeet, aflaay wꞌadabookna udaayiinaay kehii amagnayt hadiideen baliin ibhaliyeesoohna iisikwꞌa iyadna. 17 Ukwaasana baraakna lhamteeneet toona harriiweek, maagti dꞌuuyiib lhamteeneet tunaatiika, daayiinaayti dꞌuuyiib lhamteeneet tuuna hanyiis. 18 Umasiih gaalhoob hineet tumaagti jillaay iiya. Shibu tak shiboob baakay dehayi jillaay iiya. Umasiih toon toona bareekna Ukwaasanaay dehaay angiiri jillaay idꞌi. Ugarooy tooyati kehii daasamiya, laakiin Ishuukee idhhan, 19 een eeshuuk iknaayee masi Umasiih giigiyaayt eeshuuk usijniib iifiin bhaliisamiya. 20 Nooh tumarkab shagaamiyihoob, baraah Ukwaasana sinaakraab kiikeen. Laakiin Ukwaasana bareeh imtaraam. Asimhay dehay beet tumarkab shuumiyaana, aree baraah ookwaan hooy idhhanna. 21 Been ukwaani yam oontꞌa bareekna tishidhhiin tꞌatoomsooy tꞌiiteeba. Tꞌatoomsooy ugarooy yiwaashi giigsiti kiiki laakiin Ukwaasana beeti daayiit niyaati arbuun ikati. Beet tuuna Yasuuꞌaab Umasiihi yaktii tishidhhiin hookna. 22 Umasiih oontꞌa teebri beeti giigiya aree Ukwaasanaay maygwadii dehaay eefi. Imalakwa, tehadꞌaayeewwa yꞌakrirwa bariiyooh whii eefeen.