1 Door gaal gwisri nabiya Israaꞌiileeb oodehay bhaliisamiyaan. Masi gwisri nabiya bareek han geebookna laweetiit gwisir infirid hookna iyadna. Laakiin aan ikooja, bareeyooh jillaay alya taman kwisiyaab Wꞌankwanaay sidik kiikeen. Baraah willa igarooyeehna kwidhsi iyadna. 2 Gwida dehay bareetooh tumaagti salala saki iyadna, weer dehay han usidki salaliib gwisir hadiidsi iyadna. 3 Baraah ikooja haamaaba aree baraah aakna kwaasaab ikatiini gwisri mitaalee mhallagaab hookna iyayna. Laakiin shꞌiika Ukwaasana bareeh jasaab dehaay niyaamiya, aree Ukwaasana kadiwiya.

4 Ukwaasana toomaag idꞌiin imalakee dehaay nꞌakwmanaayaab kiiki. Laakiin bareeh whukwimiit tooyin ookiik yhaakwiraayt thibnama deelaay nꞌeetiib igid. 5 Aree Noohiib udamaaniib, Ukwaasana tuduniyaati dehay yꞌaamanaab baakaynee dehaay nꞌakwmanaayaab kiiki. Baruuh bareeh kwaanii kwidhisiya, asimhay nafara Nooh hooy iifiyeeb, oosdik bhaliiyiin baliib, ishidhhan. 6 Ukwaasana timadiina Sadoomwa Gamooraawwa iliw idꞌiit nꞌeetihaash ikwaasiit jasaaya. Aree oodehay yꞌaamanaab baakay naan dehaay iikti tindiyeeb bateeh misaal dehaay ikwaas. 7 Luut ushibu tak, yꞌamag da sakiineet toonaatiib winneet gadabaa iifi akay, Ukwaasana barooh ishidhhan. 8 Been ushibu tak bareeyooh geeb ikwiir, baruuh bꞌeebka baraah sakiineet tumaagti shaga iimsaw aree rhiyeebka winneet lhami. 9 Tuun tuuna Wꞌankwana oodehay eeshboob kak igwirhaayee ishidhhiiniyeet toona rhistini. Aree oodehay yꞌamag whukwimiit tuyintiib kak jasaayiiniyeet toona rhistini. 10 Wꞌankwana barooh baasinaakiir iknaayeet tumaagtiit niyaatoohna nuun weena baakwiin oodehayi geeb ankiir.

Baraah takweet kiibariina aree kibir ibariina aree umatuuni kinaayi kehii amaagna whadiidti kiirikwiin. 11 Laakiin imalak toon tumaagtikinaayeeka taad ibariinkaabwa akrakaabwa ikatiineek han, bareeh Wꞌankwanaay suurii kaꞌatehimiyaan. 12 Laakiin aan aanda biikaanneet halaagayteeb ikafirna. Baraah tidhhaniya tisoosaari wꞌagil baabari, uudehay shookiit ideerni jillaay farayt tꞌiiteeba, aree baraah han tidhhaniyaateet kwidhi iyadna.

13 Baraah maagnaayt idꞌiina, aree maagnaayt itkwis iyadna.

Baraah kassooh oombꞌi nafirnayteeb daayeeneet toona firhaat hiiseen. Baraah najjasamaabwa eebamaabwa ikatiin. Tinajasaatee rayhameena aree talasaab jarrabeen hookna, aree tꞌaduumaateeb geebookna shaarakeen. 14 Igwꞌadaahna jikuun ataba, baraah tumaagti dꞌuuyii door han kiisingadna. Oodehay eenꞌakw sharakiib dhibseen. Iginꞌaayaahna haamtiib ataba. Baraah atooꞌita firaay ikatiin. 15 Baraah usalal udaayiib ingadna idꞌiiniit, unabi Balꞌaam Baaꞌoori oor, tumaagti shagaay imiireeb ukiraayi mhallaga areeyaab, barooh misaal ikwaasniit halaag salal sakiyaan. 16 Laakiin barooh tumaagti dꞌuuyooh dehaay imeednaan, meekii imeednaan. Uumeek ubaahadiiday aadami hissii unabi bhaliisamiyaayt bariiyooh whaalaleeti isingad.

17 Aan baraah reet balamaat tꞌiiteeba, ibꞌaluuk baraam nanfiyeeb tꞌiiteeba. Bareeh nꞌeet thibnamaat hangiit. 18 Baraah yꞌafreeyeehna haay eefishna, dꞌam baabari bhali hadiideena aree oodehay maagnaaytiib dhibsitiib sooyeena aree baliib wꞌamaag salalii ikweer oodehayii ifooriin sharakiib dhibseen. 19 Baraah oodehay fadagooyt waadiyaayeena, laakiin uudehay bareeh kaleewtiniit toonaati kishiya ikatiinayt, baraah aakna idanuubwa fasaadi kishiyaawwa ikatiin. 20 Baraah Wꞌankwanaayoonwa Wꞌishidhhiinwa Yasuuꞌa Umasiih ikannihoob, teen tuduniyaatiit timagnay yꞌishniit ifoorna. Laakiin baraah masi yꞌabakniit teen timagnaytee kaleewameen. Aree oontꞌa baraah suureeka amaagka haaliib eefeen. 21 Baraah usidki salal kanaab biikaayneek hayiskaab iiktiin. Oosdik ikanniit harꞌii han, bareeh attiyeewiyaat tiwasi timugaddasaatee fidnaab nakamiyaan. 22 Een bareeyooh dehaay tikeet tuuna een eemtaal tꞌiiteetu: Aamtaal "Uuyaas ooknaay hit eelhasi. Ukhansiir ushagwaadh uthiiniib bꞌooyamiini." iyadna.