1 Yꞌarawaan, oon barooh malya jawaab bareekna haay asꞌakiireebu, oosdik teekwinni jillaay akantiib. Teen bateeh baabaadhiinna. 2 Ukwaasanaay inabiya diyaab ikatiineet tuuna iikti tindi. Inabiya imugaddasa shꞌiika allamaab ikatiineet teena baabaadhiinna. Wꞌankwanaayoonwa Wꞌishidhhiinwa waseeyaab ikatiyeet tiwasi, ilinguumaayeekna geebii soomamaat ibakii shꞌaana.

3 Laakiin naati hankaayka, een eembꞌi yꞌaakhareeb haay kashanaab yꞌi iyadna, baraah kasheena aree iknaayi amag niya eetriimna. 4 Baraah "Wꞌankwanaayuukna atꞌagiir diyaa waadiyaayaab kiiki han? Isuurkina yhankaani suur akay iiyaana, aree tuduniya han badaalt kitti." iyadna. 5 Baraah, shꞌiika tuubuutwa taabreewwa Ukwaasanaay amrii daamaat ikatiineet toona baadhneeb yhariwnayt, een ibhali iyadna. Tuubuur iyamee eeta, aree iyamee daamta. 6 Malya tuubuur akra kwaani yamee kwidhta. 7 Laakiin Ukwaasana oon amseeneet toobuutwa teebreewwa whukwimiit tooyin ookiik yhagitneet toona sooya. Malya bataah nꞌeetiib daayi iyadna, uudehay yꞌaamanaab baakay han kwidhi iyadna.

8 Yꞌarawaan, Wꞌankwanaay geeb gaat yin alif hawlaab tꞌiiteet tikatiyeet toona baabaadhiinna. Alif hawla aree gaat yin tꞌiiteeba. 9 Wꞌankwana uwaadiyaayooh hooy lalꞌaab kiiki, uudehay gali bak hiiseen. Ukwaasana aree sidik tarmuumaabu, uudehay kassaah tumaagtii tuubeetiit gaal han biikwidhayeet toona yharriiw.

10 Wꞌankwanaayt tooyin ugwiharaayt ajjabsi hoon tindi. Taabri win hissi geeb kwidhi iyadna, tunabꞌuuy aree tuduniya kastooh laliilsi tindi. Malya tuubuutwa kehii teefeetwa kastuuh iitlaw tindi.

11 Naatka kwidhi tindi. Aflaay baraak mugaddas kwiraay kwiriina aree Ukwaasana tireekwneet toonaati. 12 Ukwaasana oodehay kasseeh hooy hukwimiiniyeet tooyin tishabibneet toonaati. Beet tuuyin willa haay eetniyeet toona jarrabaana. Beet tooyin taabri nꞌeetii kwidhi iyadna, naatka tuuraaw han tunabꞌuuytii laliili tindi. 13 Laakiin Ukwaasana hinin gayiit bireetwa buutwa waadiyaaya hoon. Beentooy aree adil yhikim indi, hinin aree sidik beet toona nhagit.

14 Yꞌarawaan, baraakna beet toona hagitee, Wꞌankwana bareekna nhaswa, gwihaab baabariinwa, mꞌasigwa barii rhiiniyeetookna toona gwꞌadna. 15 Wꞌankwanaay utarmuuma midhhan ikatiyeet toona baabaadhiinna. Toon han wꞌaraawuun whayis Baawloos baliit tifagarandi Ukwaasana barooh hiiyyaab iiktiyeenaatee dehookna iktib. 16 Baawloos kassooh ujawaabiyooh teen teena tiknaateeb hadiidiini. Laakiin baruuh diyaab iiktiyeet teena galit wꞌafhamtiyuuh akraabi. Dehay gali yꞌagimwa wꞌiimaaniib takwakw baakaywa baruuh diyaab iiktiyeet toona haligtiit igarooyeehna kwidhseen. Baraah eektab irawi geeb han bak tꞌiiteena sakeen.

17 Yꞌarawaan, baraakna whankaay akraab soomamtaana. Aflaay yꞌamag dehayiit maagnaay fidnaab haay giigiit hookna umhiinookna wꞌasgaanaay bitdhibayni jillaay digwagwna. 18 Wꞌankwanaayoonwa Wꞌishidhhiinwa Yasuuꞌaab Umasiihiit tinꞌimaawwa tukanaantiibwa winna. Oontꞌaawwa diimaawwa umatuun bariiyooh baꞌiikti. Aamiin.