1 Umasiihiib ookwiraay bareek isꞌariik hookna, aree ureeruuh isꞌakiir hookna. Ukwaasanaay Aashuuk bareekna gal ikwasiin hookna. Aree irawee dehaay rhamaatwa nꞌakwmanaatiiwwa ibariin tikatiin. 2 Malya aniit tifirha gal rꞌayeewwa, gaal reeriiwwa, gaal nifsiiwwa, gaat fikraatiiwwa, timmiisaana. 3 Haamtiit niyaatii tari dhiba faaleet niyaatii naat han baadꞌiina. Laakiin taktakee dehaay baatatageegaana, aree diimaab eeraw bareesookka hayiskaab hiisaana. 4 Taktakeeb urayi gwꞌadna, iknaayeekna urayi oobhaat kiiki.

5 Baraakna tibariineet tifikra Umasiih Yasuuꞌa iibriyeet tookna tꞌiiteena tikatiyeet toonaatu:

6 Baruuh diimaab Ukwaasanaay hayꞌa iibri.

Laakiin baruuh akriree Ukwaasana nadiirsamtiib jarrabaab kiiki.

7 Laakiin ugarooyooh naatikina kwaasaab kiiki,

ukishiyaayt hayꞌa iyhaayt,

wꞌaadami tꞌiiteeb iki.

8 Aree wꞌaadami tꞌiiteena lawiya,

ugarooyooh ishꞌadhim

aree tooyat ookiik Ukwaasana isnaakiir iki

aree usaliibi kehii han iiya.

9 Shaawti Ukwaasana barooh oomhiin hooy mhakwalikaab beeti yakisiya,

aree kasseeh ismaayeeka winka sim barooh yhii.

10 Aflaay oosim Yasuuꞌi hamooysiti jillaay tibreeteeb teefeenaaka, tubuuti kehii teefeenaaka, tubuuti whii teefeenaaka kuuramiit asjideena,

11 aree Yasuuꞌa Umasiih Ankwanaab ikatiyeet toonaawwa,

umatuun Ukwaasana Ubaabaay ikatiyeet toonaawwa kassaah imiidalab itfidhidh iyadna.

12 Shaawti, yaa yꞌarawaan, ani geebookna iifiyihoob diimaab tisnaakirnaheeb. Oontꞌa aree ani hookna sagiib akatiyihoob han gwidakaana sinaakirnaheeb. Umidhhanookna timmiisteeni jillaay mirkwaayiiwwa katattiiwwa shagaamaana. 13 Ukwaasana diimaab hookna shagaamiini, aree barooh afirhisiiniib ushaga tidꞌani jillaay tuniyaawwa yꞌakrirwa dehaay iniiw hookna.

14 Naatka ashkiimtiib anu tari amgwasuuraab anu dꞌiina. 15 Aflaay baraak yaay anuubwa nhaswa tikatiina, halaagwa faasidwa taasiib baraakna gwihaab baabariin Kwaasanaay ar tikatiina, bareeyooh bitik yhayikw tibreeteeb buubeen tꞌiiteeb tikatiina. 16 Umidhhan tiniiwt tudiigwattiib daayiib kaleewaana. Malya Umasiih itꞌagiireeb oombꞌi, ani bareesookna faalami andi. Tuun tuuna aree aniib igallabamtiiwwa ishagaawwa mishiit akaab biikaayneet toona rhistini. 17 Aniib uubooy bareeyookna jillaay gwꞌameent karaama tꞌiiteena wꞌiimaaniyookna kehiiwwa khidmaatiibwa eetfiifeek han, ani kasseeyookna geeb atmadhiidh aree afirhani. 18 Aflaay baraakna han anii geeb titmadhiidhneetwa afirhiteeneetwa toonaati.

19 Wꞌankwana Yasuuꞌiit niya tikatiyeek, Tiimootiib willa bareekna beeti afandiigeet toona minniimani, aflaay been bareesookna yꞌiiniib usakana afirhisiiniheeb. 20 Barooh tꞌiiteeb weer bareekna imshabiib gaal han kaabari. 21 Aaraw gaalka toona turayiistiniitooh shanbiib, aree Yasuuꞌaab Umasiihiit halaagaaytiib kiihalag. 22 Laakiin Tiimooti naa tak ikatiyeeb baruuh uukna akkadiyaneet toona baraak tikteenna. Baruuh Usakana Udaayiinaay ushagaay wꞌoor ubaaba eeshtiim tꞌiiteena geebu shagaamiya. 23 Shaawti anii dehaay iikti tindiit toona willa akteeniyihoob, barooh diigwataniyeet toona minniimani. 24 Aree ani uknaayu willa yꞌi hookna andiyeet toona Wꞌankwana aamanani.

25 Usanoon Abafrooditoos anii geeb shagaamanaabwa kajaraayiibwa ikatiib, udiigwatkinaayookna han ikatiib, aniit tishanhatiya iitkwikwi jillaay diigwattaaneeb, marookna idiigwatti daayiina hiisani. 26 Baraakna baruuh lhaab iiktiyeet toona timaasiwnayt, baruuh kasseeyookna eerhee dehaay hayꞌaabu aree winneet hamoomiini. 27 Baruuh sidik lhiyaayt tooyat idwil. Laakiin Ukwaasana barooh arhamiya. Barooh oobhaat kiiki, laakiin aneeb han arhamiyaheeb. Aneeb han winneet akra gadabee ishidhhanheeb. 28 Ani barooh marookna afandiigeet toona winneet aharriiw. Aflaay barooh rhiteenihoob baraak masi afirhi tiyadna. Aneeb uknaayu igadab han giigi iyadna. 29 Wꞌankwanaay yꞌaamananaayeet barooh afirhaa ashishna, aree barooh tꞌiiteeb oodehay hamooysaana. 30 Baruuh Umasiihiib ushagaay jillaay tooyat idwil, umidhhanooh bidhꞌiib idꞌiit baraakna aneeb shamaab bitkaayneet shamaamt baruuh ishamheeb.