1 Baawlooswa Tiimootiiwwa Umasiih Yasuuꞌiib ishagaamana oon ujawaab kitbaaba.

Kasseeh Ukwaasanaay oodehay Fiilibeeb Umasiih Yasuuꞌiib amshawawiyaab ikatiinwa, tukaniisaati suurkinaawwa shamaamiigaawwa ookiik eebi uun ujawaab.

2 Ukwaasana Baabuunwa Wꞌankwana Yasuuꞌaab Umasiihiit tinꞌimaawwa umꞌasigwa geebookna baꞌiiktiin!

3 Kassoohoob tusiileeltiyu bareekna shꞌaniyeebka, ani diimaab Ukwaasanaayu ahammiid. 4 Doorka bareeyookna jillaay siileelani, ani diimaab afirhaa siileelani. 5 Baraakna oombꞌi whankaanaay oontꞌa ookiik Usakana Udaayiinaay ushagaay tishamnaheeb akay ani afirhaa dehookna siileelani. 6 Ani toon toonaatiib akiidaat abari, Ukwaasana oon ushaga udaayiib hookna badooyaab, Umasiih Yasuuꞌa itꞌagiireeb ookiik ushagaayuuh faayamiiniyeeb ookiik isuuririm indi.

7 Baraak diimaab aniib uginꞌiib teefeena. Aflaay ani han bareekna haay hissiyaniyeet toona whag abari. Ani usijniib daayaniyeek tari Usakana Udaayiib daafꞌaniyeek aree daayiib asꞌakiireet toonaatiib tikatiyeek han, baraak kassaakna Ukwaasanaayt tinꞌima anii geeb titꞌadhiidhna. 8 Ani bareekna winneet haay hissiyani hookna andiyihoob, kastuuh tuuna Umasiih Yasuuꞌa ooknaay ginꞌii eetni. Ani oosdik sooyaniyeet toona Ukwaasana badehiib ikati.

9 Ureerookna soorarimti tisoowiinneet toona dehookna siileelani. Aflaay sidikneet kanaantwa timmiima hukwimwa ibariin tikatiin. 10 Aflaay toona tudaayikaat iwaasti adgireen tikatiin. Malya Umasiihiit tooyin ookiik taahiraabwa yaay anuubwa tikatiina, 11 aree Yasuuꞌa Umasiihi geebii eetniit tushbootiit samara iitab tiyadna, tuun tuuna Ukwaasanaay umatuunwa whamaadwa haay yꞌi tindi.

12 Yꞌarawaan, taana anii dehaay ikeent aree sidik Usakana Udaayiib suurbeeti istoobneet toona kanaant asehariiw hookna. 13 Malya Iroomaani gwꞌaadiigaawwa kassaah aaraw tooy eefeenwa, ani Umasiihi sabbii asjinamaab akatiyeet toona baraah ikteenna. 14 Aniib wꞌasjinamti sabbii, gwida sanaawwa kwaatwa Wꞌankwanaay wꞌiimaaniib winneet yꞌakirna. Aflaay baraah tudiigwat mirkwaay anu kassooh oodoor daayiib bhaliiyi iyadna.

15 Sidiku, gali bareesooh hasaadaatwa hasiyaaytiiwwa Umasiihiib bhaliiyeen. Laakiin aaraw daayiit niyaatii bhaliiyeen. 16 Aan barooh toon toona reerii sakeena, Ukwaasana Usakana Udaayiinaay daafꞌiti shaga bareeh hiiyyaab ikatiyeet toona ikteenna. 17 Laakiin baliin aaraw aneeb haasadeen nhas niyaatiib kiikeen. Baraah ani usijniib iifiyeet midda anii dehaay gwirhaab iikwsiineet toona niyaamiyaan. 18 Laakiin beet tuuna gwirhaab kitti. Ikati salaliika, gwisreet niyaatii ikatiyeek tari sidkiit, Umasiihiib ibhaliimti ikatiyihoob daayikaana tikati. Toon toonaati sabbii ani afirhani.

Awooh han, aree ani diimaab soorarimti afirhi andi, 19 ani Yasuuꞌaab Umasiihiib Ishuukee eetniit tishamaamtiiwwa bareetookna toosileelti sabbiiwwa, itfidig andiyeet toona akteen. 20 Ani winneet sꞌayaamaniyeetwa minniimaniyeetwa toonaatiib iisikwꞌa kaadi, laakiin ani akra ginꞌiibu aflaay oontꞌa han diimaab tikatiit toonaatiit, Umasiihi aniib ugarooy tageegiini, aree tuun tuuna ani ayaayeek eedhhaniyeek tikati. 21 Umidhhan naanaatu? Anii dehaay umidhhan Umasiih ikati. Tuuyat masi gwidakaana iikwasi tindi. 22 Laakiin ani ugarooy eedhhaniyeek, tuun anii dehaay shagaayt samara iikti tindi. Ani naan ahanyiideeb kaakan. 23 Ani maloot naati bitik daaman. Ani toon tuduniya amshamaadhiit Umasiihi geeb daamtiib aharriiw. Beet tuuna winneet hayiskaat tikati. 24 Laakiin bareeyookna jillaay ani ugarooy daamaniyeet tuuna winneet daayikaat tikati. 25 Ani toon toonaatiib akiidaat abari, ani daayi andiyeet toona akteen. Bareek kasseeyookna geeb daayi andi, wꞌiimaaniib suur teebiineet toonaawwa hooy afirhiteeneet toonaawwa akteen. 26 Aflaay ani masi geebookna daayaniyihoob, anii sabbii Umasiih Yasuuꞌiib afirhiit faalami tiyadna.

27 Tikatii naatiika, Umasiihiib Usakana Udaayi hookna harriiweeb usalalii tikweerneet toonaati. Aflaay ani yꞌeetiit rhaniyuukna baarhayuukna, baraakna gal hadafee akraa ingid tiyadneet toona iimsaw andi. Usakana Udaayiinaay wꞌiimaani jillaay gaat niyaatii hiddaab finaayi tiyadna. 28 Yꞌashooyeekna baarakwiina, diimaab ashꞌaraana. Tuun tuuna baraah kwidhi iyadneet toona rhistini, laakiin baraak iidhhan tiyadna, aree Ukwaasanaay iidhhan tiyadna. 29 Baraak toon toona Umasiihi wꞌaamantii oobhaat attiyeewiyaab kitteena, laakiin bariiyooh geeb ilhamti jillaay han tikati. 30 Baraak aniib rhitaaneet tilhanay teekna lhami tiyadna, aree oontꞌa han ani lhamaniyeet toona teemsiiwna.