1 Yaa inisrika, baraak Wꞌankwanaay tikatiini sabbii, ifarooyeekna sinaakirna. Tuun tuuna aree daayiiti. 2 Uuktaab "Baabookwa deetookwa hamooysaa." indi. Tuun batuuh tuwasi tꞌawwaliit uwaadiyaay teefeet tikati. 3 Masi uuktaab, "Gwimad imirwa firhaati midhhanwa imaar tindiya." indi.

4 Yaa ifaru, yꞌareekna baasehasna. Daayiib sehamnaa, Wꞌankwanaay salal allamaana aree sooyaana.

5 Yaa ikishiya, wꞌaadami ankwanaayeekna ibakii hamooysaana, rikwiinaat sinaakirna. Umasiih nhas ginꞌii shagaamtiina, bareeh han nhas ginꞌii shagaamaana. 6 Toon toona bareeyeehna igwꞌadi suurii bareeyeehna rada rayiimti jillaay baadꞌiina, laakiin kassoohoob bareeh afirhisaana. Baraak Umasiihi kishiyaayeet, aflaay kassooh uginꞌiisookna Ukwaasana hookna harriiweet toona ibakii dꞌiina. 7 Yꞌankwanaayeekna kassooh uginꞌiisookna shagaamaana, bareeh Wꞌankwana ooknaayt shibibna, udehayiit baashabiibna. 8 Wꞌankwana gaalka ijir iyaaw indi, kishiyaab ikatiyeek hirriib, tudaayiinaayti shaga idꞌanihoob ijir iyaaw indiyeet toona shꞌaana.

9 Yaa yꞌankwana, ikishiyaayeekna ibakii bak daayiib weerna, baafiikna. Baraakwa ikishiyaayaakwa gaal Ankwana tibreeteeb eefeenaay tikatiina. Oodehay kasseeh aree girad anu jasaayiini. 10 Aakhar aree, Wꞌankwanaay yꞌakrir iwawin bareek baꞌisꞌikirna hookna. 11 Ukwaasana hiiyyaayeekna ikatiyeeb igadhꞌi kweenaa. Aflaay oobliisi talasaay ugarooyookna teheebna. 12 Hinin wꞌaadami kafinaasamna. Laakiin amag shuuki dheesh tibreeteeb eefeenwa, haakmaawwa, hadꞌaawwa, toon tuduniyaati thibni hadꞌaawwa een bareeh finaasamnay. 13 Aflaay Ukwaasanaay igadhꞌi oontꞌa gadhꞌamaana. Malya been uumbꞌi wꞌamaag yꞌiiniyihoob, wꞌashooyt thꞌaayt imꞌikir tiyadneet toona adgirteena. Wꞌagiya ookiik finaasami tiyadna, masi aree umhiinookna daayiib ibik tiyadna. 14 Aflaay marnaa! Oosdik tookliitiit libabna, Ukwaasanaay wꞌadil aree oogwibi tꞌiiteena yhanbi hookna. 15 Usakana Udaayiinaay umꞌasgi isooti aree tigidhꞌaateet shabnaat marnaa. 16 Kassooh oodoor aree wꞌiimaanookna oogwibi tꞌiiteena fiyaknaa. Oon barooh aree oobliisiit fina tibalooleent haay isingid tiyadna. 17 Umidhhan diitiit koofiyaaytiit kehookna daasaana. Ishuuki bꞌadhadh, Ukwaasanaay ibhali ikatiib han ahaana. 18 Kastooh toon toona siileeltii dꞌiina, aree Ukwaasanaayt shamaam hariwna. Kasteeh timanaasabaateeb siileelaana, Ishuuki akriree diimaab siileelaana. Oon usabbii aree digwagwna door han baagwooyna, Ukwaasanaay oodehay kasseeh dehaay siileelaana.

19 Anii dehaay han siileelaana. Ani ibhaliitii dehaay eetmiirihoob, Ukwaasana aneeb diigwat iniiweetu toona dehaay siileelaana. Aflaay ani daayiib bhaliiyaniib akati, Usakana Udaayiinaay kwabast teena aree asookiin akati. 20 Oon Usakana Udaayiinaay sabbii ani Safiir akati, oontꞌa laakiin ani whabsiib eefi. Ani ibakii haay bhaliiyaniyeeb Usakana Udaayiinaay daayiib bhaliiyaniyee jillaay siileelaana.

21 Tiikiikoos, usanoon daayi shagaamana Wꞌankwanaay ishagaay ikatiib, aniib usakana kassooh iyaaw hookna indi. Shaawti ani kak eefiyeeb iikan tiyadna. 22 Oon usabbii, barooh bareekna beeti afandiig. Baruuh hinin kassaan kak neefiyeeb sooyi hookna indi. Bareekna han isꞌakiiri jillaay dehookna afandiig.

23 Ukwaasana Ubaabaawwa Wꞌankwana Yasuuꞌaab Umasiihwa kasseeh imasiihiin isanaayeenwa tikwaateenwa, umꞌasigwa uureerwa wꞌiimaanwa geebookna baꞌiiktiin. 24 Kasseeh Wꞌankwanaayoon Yasuuꞌaab Umasiih diimaab areeyeen baliib, Ukwaasanaayt tinꞌima geeb badaayiin.