1 Ukwaasana waasiyaayt Yasuuꞌa Umasiih linguumanaab ikwaaseeb Baawloos, oon ujawaab iktib.

Ukwaasanaay oodehay Afasoosiib ikweer, Umasiih Yasuuꞌiib sidki iimaan ibariin, bareeh beeti oon ujawaab akantiib.

2 Ukwaasana Baabuunwa Wꞌankwanaayuun Yasuuꞌa Umasiihwa nꞌimaatwa mꞌasigwa baꞌiyaaw hookna.

3 Wꞌankwanaayoon Yasuuꞌaab Umasiihiib Ukwaasanaawwa Ubaabaawwa nhamdeet toonaati. Hinin Yasuuꞌiib nimshawawaay akay, Ukwaasana tibreeteeb kasteeh Ishuukeet tibarakaatee baarakiya hoon. 4 Tuduniya daamaat bitkaayi door, Ukwaasana hinin Yasuuꞌiib nimshawawiyeet toonaati jillaay waasiya hoon. Aflaay Ukwaasana areeya hoon, hinin bariiyooh suurii mugaddasaawwa, gwihaab baabariinwa niiktiyi jillaay waasiya hoon. 5 Ukwaasana daayiibuuyt, Yasuuꞌaab Umasiihi geebii waasiyaayt hoon Ukwaasana ooknaay ar nikatiyeet toonaati jillaay imkir. Beet toona baruuh yhiriw, aree batuuh dehaay tishboob. 6 Ukwaasana winneet dehoon daayiibu, Wꞌoorooh whayis yhii hoon akay, Ukwaasana nhamdeet toonaati. 7 Umasiihiib ubooyii hinin fadag nikati, oon usabbii aree tumaagtuun afoomta. Ukwaasanaayt tinꞌima kak daayiita! 8 Ukwaasana tudaayiinaaytooh kehoon ifif idꞌi, fagarandiitwa fhamaatwa yhii hoon. 9 Umasiih idꞌiyeet toonaatii, Ukwaasana isalalaayeeh ikwabas eekna suur niyaamaab iiktiyeeb rhisiya hoon. 10 Aflaay tuusꞌa eetniyihoob, Ukwaasana kastooh toona baruuh niyaamaab ikatiyeet iiwari indi. Toobuutwa tibreeteebwa eefeent teena kasteeh gaalnaay whii iikwasi indi, Umasiihi whii iikwasi indi.

11 Ukwaasana diimaab toona yharriiweet danꞌi. Oon usabbii aree baruuh Umasiih hinin waasiiniyi jillaay ikwaas. 12 Aflaay hinin Umasiihiib isꞌaya ibariin yhankaaneeb niikti. Ukwaasanaay umatuun nhamid! 13 Baraakna han Umasiihiib teefeena, usidkiit diigwat haay eeya hookna. Usakana Udaayiib wꞌishidhhiinookna haay eeya hookna. Umasiih aamantaana, bariiyeeh tikatiineet toona rhistiini jillaay, Eeshuuk Imugaddasa iwaadiyaamaab tittiyeewaayna. 14 Aashuuk han Ukwaasana udehayyooh dehaay daasaab ikatiyeena nittiyeewiyeet toona arbuuniyaan hoon. Malya oon wꞌarbuunii aree nitfidig niyad. Ukwaasana aree atrakwkwiyaabwa atehammidaabwa iikti indi.

15 Wꞌiimaanookna Wꞌankwana Yasuuꞌiib tibariineeb ani amaasiw. Kasseeh Ukwaasanaay udehayiib tibariineeb ooreer han amaasiw. 16 Bareeyookna jillaay Ukwaasanaay whamaad door han singadaab kaaki. Ani tusileeltiyu shꞌani hookna. 17 Wꞌankwanaayoon Yasuuꞌaab Umasiihiib Ukwaasana, Ubaaba Wꞌalya, Eeshuuk itifagarandiiteebwa tufhamaatiibwa iniiweetookna toona raatani. Aflaay barooh daayiib iikan tiyadna. 18 Iginꞌaayaakna nuur eettiibneet toonaati jillaay siileelani. Ukwaasana bareekna waasiyanihoob, isꞌaya bareekna attiyeewiyaab afhami tiyadna. Malya baraak kasseeh Ukwaasanaay oodehayi geeb hiddaab timeerneet umatuuniit tibaraka iikan tiyadna. 19 Ukwaasanaay yꞌakrir iwawin inadiir baabariin, hinin yꞌaamananaayee dehaay ibariyeeb, kak wawin ikatiineet toona kanaant asehariiw hookna. Tuun tuuna aree baruuh suur idꞌiyeet ajaayibti akrir eekna tꞌiiteeti. 20 Een yꞌakrir Baruuh Umasiih tuyatii yakisiyanihoob, Ukwaasana ooknaay umaygwadii dehaay tibreeteeb isoosꞌa. 21 Umasiih beentooy kasseeh yhaakmaawwa, yhadꞌaawwa, yꞌakrirwa, kasseeh isuurkinaawwa kehii hadꞌaab ikati. Toon tuduniyaatiib oobhaat kiiki, laakiin harꞌook yꞌiiniib udamaaniib han ikati. 22 Ukwaasana kasteeh teena Umasiihiib iragadaayi whii daasiya. Tukaniisaatiit daayiinaayti jillaay aree barooh kasteeh tinaati kehii suurkinaab ikwaas. 23 Tukaniisi Umasiihi garu tikati, aree bariisooh timmiimtini. Umasiih kasseeh imhiinan kasteeh teena uukna timmiisiini.