1 Yꞌarawaan, baraak Ishuukee sakteena. Aflaay gaal maagnaaytiib itꞌabiikeek, been barooh diiseet usalal udaayiib beeti agirna. Laakiin digwagwna, baraak iknaayaakna baajarrabamaana. 2 Baraak taktak teeshtiimnihoob, Umasiihiib whag bak tisinaakiirna. 3 Gaal ugarooyooh naat hiisiiniyeek aree baruuh naatikina biikaayihoob, baruuh ugarooyooh intiil. 4 Gaalka ushagaayooh ookna shagaamiiniyeet toonaati. Malya baruuh ugarooyooh ooknaay faalamiini, aree ugarooyooh weernaay geeb kiisnadir. 5 Gaalka ibakii irabeeyooh yaksiiniyeet toonaati.

6 Ukwaasanaay ibhali allamamaab been kasteeh tidaayiinay ukoojaayooh imꞌadhiidheet toonaati. 7 Baaꞌatootaalna: Ukwaasana haay kakashamiya. Wꞌaadami toona tꞌandiyeet inwiik. 8 Idanuubeet tehayꞌaatooh teeraayiiniib been, beet tehayꞌaatii kwidh iiwik indi. Ishuuki afirhisti teeraayiiniib been, Ishuukee umidhhan udaayim iiwik indi. 9 Oodehay iraweet shamaamt ibakii hooy bingwooyiit toonaati. Tidaayiinayti dꞌuuy binsingiideek, uudoor uwaasamaab yꞌiiniyihoob, oowaak niiwik niyad. 10 Shaawti, fursaat nibariyeebka, kasseeh oodehayii dehaay daayiinaayt nidꞌeet toonaati. Baliib wꞌiimaani dehayii ikatiin eekna han daayiinaayt dehaay nidꞌeet toonaati.

11 Ani wꞌayiisu marookna akantiibeet midda, wawin hiruufee akantiibeet toona rhiteena. 12 Bareek ukwishuubii dehaay ajbireen baliin, baraah aakna kak fagaraab ikatiineet toona rhistiib jarrabeen. Umasiihiib usaliibiib bhaliiyeetiit igarooyeehna gwirhaayeeb idꞌaneet toona kiihariwna. 13 Baraah kwashaba, laakiin Muusaay whag kiisinaakirna. Baraah baraak titkwashiibneet toona yhariwna aree beet toonaatii faalamtiib yhariwna. 14 Laakiin Wꞌankwanaayoon Yasuuꞌaab Umasiihiib usaliib nuun ani naatii han faalamtiib kaahariw. Bariiyooh usaliibi sabbii, anii dehaay tuduniya sallabamaatu, ani han tuduniyaatii dehaay sallabamaabi. 15 Baruuk kwashaab tikatiyeek bitkaayeek naat kitti. Kastuuh tuuna titehassiib, baruuk gayi nafar tikatiyeet toonaati. 16 Oon whukwim eetriim baliin kassaah mꞌasigwa rhamaatwa baꞌimaarna, Ukwaasanaay uudehay han baꞌimaarna.

17 Aneeb uknaayu ugarooy nꞌiraat adilꞌiya ani Umasiihiib akatiyeet toona rhiseent eefeen. Aflaay aneeb gaal han gwirhaab hoosu biidꞌiyeet toonaati. 18 Yꞌarawaan, Wꞌankwanaayoon Yasuuꞌaab Umasiihiit tinꞌima kasseekna geebookna badaayiin. Aamiin.