1 Umasiih isfadig hoon, tuun tuuna aree hinin sidik hirriyaayt nibariyeet toona rhistini. Oontꞌa tehirriyaaytookna daayiib kaleewaana, shaawti whaggi kishiya door han baakeena.

2 Sinaakirna! Ani Baawloos andi hookna, baraak titkwashiibneek Umasiih naat han daayiina dehookna iidꞌa kiidi. 3 Masi aree, een tidꞌaneek, baraak ibakii whag kassooh sinaakirna. 4 Whag sinaakirtiit Ukwaasanaay geeb takwakw tikatiineet jarrabteeneek, igarooyeekna Umasiihii kitꞌaabaana, tinꞌimaatee han fidnaab dhibtaana. 5 Laakiin wꞌiimaaniiwwa Ishuuki geebiiwwa Ukwaasana dehoon waadiyaayaab ikatiyeet tooshbu winneet nhagit. 6 Baraak Umasiihi Yasuuꞌi aamanana tikatiineek, kwashab tikatiineek bitkaayneek farig kiibari. Tuuna tuungaat titehassiib beet wꞌiimaan ooknaay ishagaamtiiwwa ureeri geebiiwwa tikati.

7 Bareek gaal usidkii yꞌagir hookna nuun, winneet daayiib saktiina. 8 Beet tudiigwat bareekna waliikiyaab Ukwaasanaay yꞌaat kitti. 9 Shalik hamiir wꞌajiin kassooh isehamiir. 10 Laakiin baraak Wꞌankwanaay tikatiina. Weer gaal dꞌiina diitiit bareek sooyiiniyeet toonaatiika, ani andiyeet tidꞌaneet toona eetehak kaabari. Bareek gwirhaayeeb dhibsiiniibka jasaami indi. 11 Yꞌarawaan, ani ukwishuubiib masi bhaliiyaniyeek, ani naanhooy masi amaag atweeri? Ani Umasiihiib usaliibi geebii ikatiib umidhhaniib bhaliiyaab baakaayeek, gaal han gwirhaab kiikwaas. 12 Baliin ibitkeekna igwirha ikwasiin, bareekna kwishuub yhariw, igarooyeehna ikatꞌaneet toona minniimani.

13 Yꞌarawaan, baraak hirriib tikatiini jillaay waliikamtaana. Laakiin tehirriyaaytookna sabab kwaastiit tehariwneenaaka haay baadꞌiina. Baraakna ureeriib taktak shagaamaana. 14 Whag indiyeet tuuna kastuuh gaanaatiib teefi, aree batuuh "Ushawwook ugarooyiitook areeyaa." tindiit tuwaseetiib teefi. 15 Laakiin baraak diimaab taktak faniikteeneekwa taktak tamteeneekwa, digwagwna! Gaal ooraaw kwidhsi tiyadna.

16 Aflaay Eeshuuk Imugaddasa umidhhanookna simalhana andi hookna. Malya idanuubeet hayꞌaatuukna hookna teharriiweet toona saki kitdiina. 17 Idanuubeet hayꞌa Aashuuk yhariwneet toona timnafi, aree Aashuuk idanuubeet hayꞌa imnafiin. Baraah taktak finaayeena, aflaay baraak toona tutehariwneet kitdꞌiina. 18 Laakiin Ishuukee titmalhanihoob, Muusaay whaggi whii kitehaayna.

19 Idanuubeet tehayꞌaatuukna harriiweet toona teetriimnihoob, tufirꞌatuuh winneet gwꞌagwaatu: jikuunwa, najaasaatwa, maagtiib mamoogamtiiwwa, 20 Sanamaawwa, sehartwa, ashoosamtiiwwa, hasiyaaytwa, giiraatwa, akra gadabtiiwwa, ooknaay harawa oobhaatwa, khilaafwa, adhidhwa, 21 hasaadaatwa, askirtiiwwa, mirgeestwa, teen tꞌiiteet warit maagnaywa ikatiin. Ani suur diyaab iiktiyeet toonaatiit, oontꞌa han winneet sooyani hookna, bak tꞌiiti kwiraay ikweer baliin, Ukwaasanaayt hadꞌaay kwasaami kiidiin.

22 Laakiin Aashuuk Imugaddasaayeet samara reerwa, firhaatwa mꞌasigwa, sabirwa, nhas niyaatwa, daayiinaaytwa, amaanaatwa, 23 shibootwa, ishuuki kaleewtiiwwa ikatiin. Teen tinaati kehii hag kiihaay! 24 Baliin Yasuuꞌaab Umasiihiib ikatiin, idanuubeet tehayꞌa harriiweet toonaawwa tumaagnaaytoohwa sallabiyaan. 25 Hinin Ishuukee nikweereek, aflaay Eeshuuk neetriimeet toonaati. 26 Kibir ibariin binꞌakaayeet toonaatu, tari gaal ooraaw binsuugayeet toonaatu, tari gaal ooraaw binhaasadayeet toonaati.