1 Baawloos, ulinguuma dehayii diigwatamaab baakaay tari aadami diigwataab biikaayeeb, laakiin Yasuuꞌaab Umasiihiiwwa Ukwaasana Ubaaba, barooh tuyatii yakisiyaab, diigwatamaanaay 2 aree kasseeh anii geeb eefeen isanaayee, Tikaniisi Galatiyaay eefeent ookiik:

3 Ukwaasana Baabuunwa Wꞌankwana Yasuuꞌa Umasiihwa nꞌimaatwa mꞌasigwa baꞌiyaaw hookna.

4 Umasiih, Ukwaasana Baaboon isnaakiraayt hinin tuduniyaatiit maagtii ishidhhiini jillaay hineeb idanuubi mhiin baruuh ugarooyooh karaamaateeb nuuniya. 5 Ukwaasana diimaab matuun ittiyiw indi. Aamiin.

6 Baraak willa Ukwaasanaay fidnaab yaktaaneet toona ani asgarib. Baruuh tinꞌimaateesooh waasiya hookna, aree baraak weer injiil aamantaana. 7 Gaal sidki injiil uubhaat sidkiit eefi. Laakiin dehay gali gwirhaayeeb dhibseen hookna, Umasiihiib usakana udaayiinaay fidinti giigsitiib isehariiwna hookna. 8 Oon hinin dehookna bhaliinayeeb wꞌinjiil nuun, weer dehookna bhaliiyiiniyeek, beet toona sakiiniib hinee gaal ikatiyeek han tari tibreeti malakee ikatiyeek, atooꞌitaab baꞌiikti. 9 Hinin toon toona suur akay diyaaba, oontꞌa han ani masi andi. Gaal oon baraak agbiltaaneeb wꞌinjiil nuun weer dehookna bhaliiyiiniyeek, baruuh atooꞌitaab baꞌiikti.

10 Ani oodehayi afirhistiib een ibhali kaadi, laakiin Ukwaasanaay afirhistiib andi. Ani oodehay afirhisaniyeeb hiisteena han? Ani toon iidꞌeek, Umasiihi kishiya kaaꞌaki.

11 Yaa isanaayaan, ani bhaliiyaniyeeb wꞌinjiil aadami dꞌiyaab biikaayeet toona kanaant asehariiw hookna. 12 Barooh tak gaalnaay han nuunamaab kaaki, tari barooh allamamaab han kaaki. Laakiin barooh Yasuuꞌa Umasiih anii dehaay lawisiyaayt attiyeewaay.

13 Ani Yahuudiib akay kak ikwiireeb baraak tikteenna. Ani Ukwaasanaayt tukaniisi amaag aweer, batooh kwidhsitiib han jarraban. 14 Oon aniib wꞌimriib iifiin Iyahuudiib ani hayiskaabu, ani hoobaan hiiyyaayeen iiktiineeb whag kassooh winneet ashꞌaraa asnaakir. 15 Laakiin ani faraay baakaay, Ukwaasana waasiyaheeb. Baruuh daayiibu aree tinꞌimaateesooh waliikiyaheeb. Malya beet batuuh barooh afirhista, 16 wꞌoorooh aniib lawisiyeet toonaatiib, aflaay ani Ijintiili bitik bariiyooh bhaliiyaniib iikti. Toon toona gaal han sooyaab kaaki. 17 Ani gaat kalma han diyaab kaaki, Alguduseeb oodehay anii hankaay linguumaab iiktiin baliib han sooyaab kaaki. Laakiin willa Wꞌarabi haash abi, malya Dimashig beeti agar.

18 Mhay hawlaayi harꞌii, Bitrus rheesamti jillaay Algudus asti adif aree bariiyooh geeb tamna ayt yina ahagit. 19 Ulinguuma oongaal ani rhaneeb Yaaguub, Wꞌankwanaay oosan iiktiibi. 20 Ani oosdik hadiidaniyeet toona Ukwaasanaay suurii halafooyani.

21 Malya, Suuriyaawwa Kiiliikiyaawwa yhash beeti adif. 22 Laakiin Yahuudaay iifiint Umasiihiit tikaniisaatee aneeb uknaayu iktiin gaal han kiihaay. 23 Baraah een ibhali eebhat imaasiwna: "Uutak suur hinin amaag waraayaab, oodiin baruuh door gaal kwidhsitiib yhiriweeb oontꞌa barooh ookna bhaliiyiini." idiin. 24 Aree anii sabbii baraah Ukwaasana yhamidna.