1 Oontꞌa ani bareeyookna irheesamtiib uun mhaya door iikti indi. Uuktaab "Tikatiit halaagaayka ibakii maloob tari mhay badehi ibadehaneet toonaati." diyaabi. 2 Umalya door ani geebookna iifiyihoob, suur akay daayiib sooyan hookna. Ani oontꞌa geebookna baahaay toon masi arammiid: ani atꞌagiirihoob, baliib suur toomaag idꞌiin tari eeraw kasseeh, ijasaatii gaal han iiyꞌish kaadi. 3 Umasiih anii geebii hadiidiiniyeet toona alaamaat tehariwna. Bareeyookna tehooyteeb shaagaamiiniyihoob, baruuh nꞌakw kiiki, laakiin baruuh ibitkeekna akraabi. 4 Baruuh sallabamiyanihoob nꞌakw iiktiyeek han, laakiin oontꞌa baruuh Ukwaasanaay akriree kwarri. Hinin han bariiyooh nꞌakwa, laakiin bareekna shagaamnayi jillaay Ukwaasanaay akriree bariiyooh geeb nikwaar niyad.

5 Wꞌiimaaniib teheeneeb bitehaayneeb igarooyookna shibibna, igarooyookna akhtibaaraana. Umasiih Yasuuꞌa hookna eefiyeet toona karhitaana han? Bak biikaayeek baraak wꞌikhtibaariib dhibtaana. 6 Aree baraak hinin wꞌikhtibaariib dhibaab binkaayeet toona iikan tiyadneet toona aamanani. 7 Oontꞌa baraakna amaagna bitdꞌiini jillaay hinin Ukwaasanaay dehaay siileelnay. Hinin wꞌikhtibaar hasamaab nikatiyeet toona oodehayi rhisti kiiki, laakiin hinin dhibaana tꞌiiteeb nikatiyeek han, baraakna usidkii saki tiyadna. 8 Hinin usidki kehii naat han saknayeet toona kaꞌadgirna, laakiin usidki jillaay oobhaat saknay. 9 Hinin nꞌakw nikatiyeebka nitmadhiidh, aree baraakna akraab tikatiina. Aree tusiileeltuun bareeyookna timmiimti jillaay tikati. 10 Toon toonaati sabbii teen teena ani baahaayihoob akantiib, aree ani yꞌaniyihoob Wꞌankwana hiiyyaayu ikatiyeet tehadꞌaayeetii anfꞌamiit bareeyookna kehii ikir kaadi. Ani tehadꞌaayi bareekna eeshtiimi jillaay attiyeewaay, bareekna kwidhsaniyi jillaay attiyeewiyaab kaaki.

11 Isanaayaan, aakhar aree usalaamiib andi hookna. Timmiimaab tikatiineet toona hariwna, aniit tuwaliik sinaakirna, gaal girmaay tꞌiiteeb akeena, aree umꞌasgiib kwiriina. Aree ooreeri Kwaasanaawwa umꞌasigwa geebookna baꞌiiktiin.

12 Gaal ooraaw mugaddast salaam salaamaana. 13 Ukwaasanaay uudehay kassaah tishiboonay salaameen hookna.

14 Wꞌankwana Yasuuꞌaab Umasiihiit tinꞌimaawwa, Ukwaasanaay uureerwa, Eeshuuk Imugaddasaayeet ramaamtwa, kasseeyookna geeb baꞌiiktiin.