1 Ukwaasanaay udehayiit shamaamti jillaay dehookna akantiibee dehaay shanhatiyaat kiihaayna. 2 Baraakna tushamaam tehariwneet toona akteen. Magadoonyaay oodehay aree toon haay habnamaab akatiyeet toona sooyan, gideemha Akhaaꞌiyaay ani baraak bareeyooh oomyaaw dehaay amar tiiktiineet toona sooyan. Wꞌashꞌartiyuukna aree bareeh winneet yayakisiya. 3 Aflaay bareesookna habnamaab nikatiyeeb yhabna mishiit bhaliib biikaayni sabbii ani isanaayeen diigwatani. Laakiin oon ani adiyeet tunaatiit, baraak eetmiir tikatiina. 4 Magadoonyaay gaal han anii geeb yꞌeetiit bareek amar baakaay marriyuukna, hinin bareek naat kindi, laakiin bareekna winneet aamannayi sabbii nisakwꞌa. 5 Aflaay isanaayeen whankaay marookna fidigtiit, oomyaaw baraak waadiyaayaab tikatiineeb tisoomiirneet toona akwin. Malya uumyaaw daayiit hadarti miyaawiit tisoomiirna, akraat waajibti miyaawiit kiiki.

6 Toon toona shꞌaana: shalik teera ingiidka shalik harru inwiik, gwida teera ingiidka gwida harru inwiik. 7 Aanda kassaah gaalka uginꞌiyooh niyaamaab ikatiyeeb oomyaaw iniiweet toonaatu, ribee ginuuf aduuyii kiiki. Ukwaasana umiyaawana afirhaa iniiw areeyiini. 8 Ukwaasana aree kasteeh tinꞌima dehookna guudsiiniyee dehaay adgiriini. Aflaay kasteeh tinaateeb kassoohoob toona tutehariwneet kastooh timeerna, aree kassooh tudaayiinaayti shagaay gwidaana imaar tiyadna. 9 Uuktaab indi:

"Baruuh umiyaawooh oodehay wꞌaniwnaay dehaay ibrir idꞌi,

tushbootuuh diimaab daatni." indi.

10 Been idirꞌaatkina iteera iniiwwa, timꞌariiti hadhi iniiwwa, baruuh iteeraayookna guudsiini, aree tushbooti waakookna isoowiin. 11 Baraak kassooh oodoor hadareeb tikatiini jillaay, baruuh daayiib gabsi hookna indi. Aree hinee geebii bareetaakna tehadar Ukwaasanaay hamaad iikti iyadna.

12 Oon baraakna tidꞌaneeb ushaga Ukwaasanaay udehayiit shanhatiya teebhat kiisham, laakiin Ukwaasanaay whamaad gwida salalaayee iifif indi.

13 Baraakna iknaayaakna rhistaaneeb ishagaay sabbii, uudehay Ukwaasana yhimid iyadna. Baraakna Ukwaasana tisnaakirniit Umasiihiib usakana udaayiib tifidhadhni sabbiiwwa, aree kastooh toona baliib irawi geeb tꞌadhidhneet tunaati sabbiiwwa, uudehay Ukwaasana yhimid iyadna. 14 Ukwaasana bareekna hiiyyaab ikatiyeet tinꞌima tigwidaanaati sabbii, baraah bareeyookna dehaay siileeleena aree bareekna rhitiib yhariwna. 15 Kalmaatee baaꞌawsifamii oomyaawii dehaay Ukwaasana nhamid.