1 Ani shalik door afrii sakaniyihoob han, baraakna timtariimneetu toona hookna aharriiw. Laakiin baraakna toon toona suur akay sakteena. 2 Ukwaasanaayt tugiiraatiit, ani bareeyookna dehaay giiraatani. Ani bareekna gaal takii dehaay waadiyaayan hookna aree baruuh Umasiih ikati. Aflaay nhast aagirtiit barooh nuuni hookna andi. 3 Laakiin ukwakwarii titootaalt Hawwaab tꞌiiteena bareekna han iginꞌaayaakna tinhisuuytiiwwa Umasiihiib wꞌatꞌiimtiiwwa fidnaab kwidheeneet toona arankwi. 4 Tak gaal yꞌeetiit hookna Yasuuꞌaab hinin bhaliinayeeb nuun weernaay bhaliisamiiniyuuk, tari eeshuuk itiyheeneeb nuun wari shuuk tiyayneek, tari wꞌinjiil wꞌagbiltaaneeb nuun weer ikatiyeek, beet toona kastooh hooy agbilteena. 5 Laakiin ani ilinguuma itageegaayeeka dhibakaab akatiyeet toona kahiisan. 6 Ani whadiidtiib hadiidanaab kaaki, laakiin tukanaan abari. Hinin toon toona gwida salalaayee daayiib rhisna hookna.

7 Ani Ukwaasanaay wꞌinjiil dehookna bhaliiyihoob naat hookna hariwaab kaaki. Ani bareekna asoowiini jillaay ugarooyu dehookna ashꞌadhiim, beet tuuna aniit maagnaay tikati han? 8 Ani bareekna shagaamaniyi jillaay tikaniisa tirawtee mhallagaab ayhaayt asaalib. 9 Aree ani geebookna iifiyihoob naat ashinheek, gaalnaay kehii han rabeeb akaab kaaki. Isanaayaan Magadoonyaay eeyaan toona ani ashinheet kastooh itkwikwna. Ani bareeyookna kehii rabeeb baaꞌakaayee dehaay ugarooyu kaleewan, aree toon toona isuuririm andi. 10 Umasiihiib uusdik aniib eefi, kassooh Akhaaꞌiyaay whaashiib gaal han een eefaal hoosu isingid biidiyeet toona waadiyaayani. 11 Naanhooy? Ani kaꞌareeyan hookna akay tikati? Ani bareekna areeyaniyeet toona Ukwaasana ikteen! 12 Aree baliin ilinguuma aaraw eefaal haay imeerni sabab biidꞌiini jillaaywa oon hinin nidꞌeeb ishaga tꞌiiti shaga shagaamnay biidiini jillaaywa, toon toona oontꞌa sakaniyeet isuuririm andi.

13 Aan aanda kassaah gwisri linguumamaaba, toolana shagaamanaaba, Umasiihi linguuma tꞌiiteena massalameen. 14 Uubliis han ugarooyooh unuuri malaktaayi tꞌiiteena massalamiiniyeet toona baaꞌajjabsaana. 15 Tuun batuuh ajjabsitiniina kiiti, malya, ishagaamanaayaah eeshbooneet massalameeneek, tuun batuuh bissaniit kitti. Wꞌaakharuuhna ishagaayuuhna astehaliiniyeet toona tꞌiiteeb iikti indi.

16 Ani masi andi hookna: gaal han wꞌafriinaayt biishabiibheeb. Laakiin bak tidꞌaneek, wꞌafriinaayt agbilaanheeb, aflaay shalik door faalamiiniib akati. 17 Oon wꞌakra ginꞌi ikatiib ifaalamti ani Wꞌankwanaayt tehayꞌaatii kahadiidan, laakiin wꞌafrii takiit hadiidani. 18 Gwida tuduniyaatiit hayꞌaatiit faalameen eefeena, ani han faalami andi. 19 Baraak fagaraab tikatiini sabbii oodehay yꞌafraya timtariimna. 20 Baraakna baliib bareekna kishiyaab ikwasiin timtariimna, tari bareekna suugeen tari bareekna sharakiib dhibseen, tari bareekna abaabeen, tari ifiireekna eethꞌa, kasseeh timtaraamna. 21 Hinin toon batooh winneet hooy nꞌakw nikatiyeet toona ani sikwꞌee hadiidani.

Weer gaal faalamiiniyeek, ani han bak faalamani, laakiin beet toonaati dꞌuuy afreeba. 22 Baraah Ibriiba? Ani han Ibriibu. Baraah Israaꞌiiliiba? Ani han Israaꞌiiliibu. Baraah Ibraahiimi ara? Ani han Ibraahiimi ooru. 23 Baraah Umasiihi kishiyaaba? (Ani bak tꞌiiteenaatiib whadiidti ugirmaayu daayiib kiiki). Ani aree gwidakaana akati. Ani gwidakaana akraab shagaaman, diimaab gwida doora oosjin daaman, gwida doora amaag atoothꞌa, aree doorka doorka tooyat adwil. 24 Ay doora Iyahuuda mhay tamuunwa ashshadhig kwirbaj ithꞌanaheeb. 25 Mhay doora kwilꞌibtii atoothꞌa, door gaal geedaman, mhay doora tumarkab haay katꞌamtaheeb, aree ubhariib hawaadwa bꞌeebwa ahagit. 26 Ani gwidaat iibabt iibaaban. Kwaan bidhꞌisiyaheeb, gwihara bidhꞌisiyaanheeb, whaashu ooknaay da bidhꞌisiyaanheeb, Ijintiili bidhꞌisiyaanheeb, tumadiinaatiib bidhꞌan, whaashiib bidhꞌan, ubhariib bidhꞌan, aree gwisri sanaayee bidhꞌan. 27 Ani shagaaman aree gallabaman, whawaad asehar, tehargwiiwwa tiyaweewwa akan, aree mꞌariit anu sakan. Ani mikwꞌaraaman aree rabooban. 28 Kastooh toona tooraawti geeb, ani kasteeh tikaniisaati haaliib whasakaay sabbii bꞌeebka atootiir. 29 Gaal nꞌakw ikatiyihoob, ani han nꞌakw akati. Gaal danuub sakseenihoob, ani hasiyaaytii baloolani.

30 Ani ibakii faalamaniyeek, ani nꞌakw akatiyeet toona rhiseent tinaatee faalami andi. 31 Ukwaasana, Wꞌankwana Yasuuꞌiib Ubaaba ikatiib whamaad diimaab bariiyooh baꞌiikti. Ani gwisir baahadiidayeet toona baruuh ikteen. 32 Dimashigeeb whadꞌa Areetaasi whii iifiib whaakim anii abuuki jillaay tumadiinaati dheefaay gwꞌaadiigaab daasiya. 33 Laakiin ani biilii tehooyteeb daasaman aree teheetaati shibbaakii dhooman, malya ani bariiyooh wꞌayii adhhan.