1 Oontꞌa tubuutiit kheema hooy nikweereet katꞌami tindiyeet toona nikteen. Hinin Ukwaasanaay ikati gaw nibari, tibreeteeb eefi daayim gawu, udehayi ayee aree dꞌaar kiiki. 2 Oontꞌa aree hinin gagarnay, tibreeti halakaayee neetkwiyeet toona winneet nhariw. 3 Beet toona neetkwiyihoob akay, rabooba nitmir kindi. 4 Hinin toon tukheemaatiib nikweereet midda, gagarnay aree rabeemnay. Hinin raboobnayeet toona kinhariw akay, laakiin tibreeti halakaayee neetkwiyeet toona nhariw. Aflaay bashar tibariinaaka umidhhanii itkwitꞌa indi. 5 Oontꞌa toon toonaati jillaay Ukwaasana akhligiya hoon, Eeshuuk aree tudaasanaaytiit yhii hoon, harꞌook eetniit toona arbuuniini. 6 Shaawti hinin winneet akra ginꞌiiba, hinin ugarooy tehooyteeb ugawiib daanayihoob, Wꞌankwanaay sigiyaab nikati. 7 Hinin wꞌiimaanii nikweer ooshbuubii kiiki. 8 Hinin winneet akra ginꞌiiba, andi, aree ugarooy niseegeet toona nhariw, aree ugawiib Wꞌankwanaay geeb daanayeet toonaati. 9 Aflaay hinin ugarooy tehooyteeb ugawiib daanayeek tari hooy niseegeek, barooh wꞌafirhisti hadafeen nikwasiyeet toonaati. 10 Kassaan Umasiihiib ugaadi kwirsi suurii ibakii lawnayeet toonaati. Aree gaalka ugarooy tehooyteeb iifiyihoob idꞌiyeet teena tibaruuh astehaliiniyeet imaar indi, maagt tikatiyeek tari daayiinaayt gaalka toona tꞌastehaliiniyeet imaar indi.

11 Wꞌankwanaay imirkwaay naan ikatiyeeb nikteeniyeek, oodehay sootiib jarrabnay. Ukwaasana daayiib ikteen hoon, baraakna han uginꞌiyookna aneeb tikteeniineet toona minniimani. 12 Hinin masi igarooyeen bareeyookna dehaay waseetiib kinhariw, laakiin baraakna hinee habnamteeneet toona soonay hookna. Aflaay baraak toona tulawtiniitii habnameen baliib dehaay tigweebneet toona adgirteena, aree iginꞌaayeeb teefeet toonaatii kiiki. 13 Hinin igirma neetniiweek, tuun batuuh Ukwaasanaay jillaay tikati. Hinin igirmaayaan takwakw ikatiineek aree, tuun batuuh bareeyookna jillaay tikati. 14 Umasiihiib uureer hinin salooliini hoon, aree gaal tak kasseeh oodehayi jillaay ayaab ikatiyeet toona nikteen, aree shaawti kassaan ayaaba. 15 Baruuh hini jillaay ayaabu, baliin idhhaniib igarooyeehna jillaay ikwaar kiidiina laakiin bariiyooh jillaay ikwaar iyadna, baruuh bareeyooh jillaay ayaabu aree masi yakamiya.

16 Aflaay oontꞌaanee fidnaab hinin gaal han tuduniyaatiit hayꞌaatii niishbib kindi. Door gaal Umasiih oontꞌaaneet nishbibeek han, shaawti bak kasakna. 17 Shaawti Umasiihiib ikatiibka gayi nafar iikti indi. Umidhhan ishꞌiiya giigiya, gayi midhhan badooya! 18 Uun kassuuh Ukwaasanaay miyaaw ikati, barooh ooknaawwa hininwa mꞌasig ibitkeen iidꞌi jillaay Umasiih diigwatiya. Aree barooh ooknaawwa irawi bitikwa umꞌasgi shagaay dꞌuuy yhii hoon. 19 Ukwaasana Umasiihiib iifi, tuduniya barooh ooknaay dehaay yꞌadil. Shaawti oodehayi kehii maagnaayti dhigwuuy daayi kiidi. Baruuh oon wꞌaduuliit diigwat tꞌajiibi yhii hoon. 20 Shaawti hinin Umasiihi diigwatkina nikati, Ukwaasana uukna tuwaliiktooh hinee ikwasi. Hinin Umasiihi yafii waliiknay: Ukwaasanaay geeb amꞌaddaalna! 21 Umasiih danib kiibari, laakiin hini jillaay Ukwaasana barooh han hineeb idanib yꞌadhidh. Aflaay bariiyooh daanayihoob, Ukwaasanaayt tooshbu nitꞌadhiidh.