1 Ani Baawloos bareekna waliikani hookna: Umasiihiit shibootiiwwa eeraat niyaatiiwwa; ani geebookna daayanihoob dhiwꞌoorwa nꞌakwwa akati, laakiin fidnaab giiganiyihoob jaaꞌir akati. 2 Ani yꞌaniyihoob ajꞌirti shagaay bitdꞌiineetu toona hookna aharriiw. Hinin tuduniyaatiit hayꞌaatiit nikweer iyad baliib amꞌakiireet toona akteen. 3 Hinin tuduniyaatiib nikweereek han, tuduniya saktiniyeet toonaatiit hinin finaab kinkwaas. 4 Hinin haay finaanayeeb igadhꞌi tuduniyaati gadhꞌi kiikeen. Laakiin Ukwaasanaay akra gadhꞌee hinin akra difꞌa dhibisnay. 5 Hinin, amgwasuura dhibisnay, Ukwaasanaayt tukanaanti kehii yakeen eegwsir dhibisnay. Kassooh oofkir abuukiib kwaastiit Umasiihi isnaakiir nikwasi. 6 Baraakna barooh winneet tisnaakiirnihoob, malya tisnaakirooy inriibka jasaatii dehaay amar nikati.

7 Baraak tinaateet sarat teebhat tishabibna. Umasiihiib ikatiin iyad baliin hinin han een bareeh tꞌiiteena Umasiihiib nikatiyeet toona ibakii ikteenna. 8 Bareekna neeshtiimi jillaay aree lhastiyookna jillaay kiiki, Wꞌankwana yhiiyyeetoon tehadꞌaayeetiib winneet shalikna shaawtiit habnamaniyeek han, beet toonaatii ani iisikwꞌa kaadi. 9 Ani ijawabeesu bareekna soomhooyt jarrabtiib kaasehariw. 10 Gwadi "Barooh ijawabaah digaaba aree akraaba, laakiin baruuh uukna geeboon daayiiniyihoob, nꞌakwu aree ibhaliyaah han takweet kiibariin!" iyadna. 11 Hinin giignayihoob ijawabeeb niyadeet toona, daanayihoob han beet batooh tookna saknayeet toona aan uudehay afhameeneet toonaati.

12 Hinin igarooyeen baliib igarooyeehna asti ishabibnaayi geeb nidꞌeet toona tari nisnadiireet toona ajꞌireetiit kasakna. Baraah igarooyeehna eekna abiiyaahna abbareenihoob aree igarooyeehna iknaayi geeb isnadiirnihoob, baraah fagaraab kiikeen. 13 Hinin laakiin ifaalaan silt ibariina, aree ifaalaan Ukwaasana dehoon waasaab ikatiyeeb oomhiin kiitilalna. Been uumhiin bareekna han kantiim. 14 Hinin ifaaleeb winneet kinsigi, bareekna beeti yꞌaab binkaayeek tiiktiit toonaatiit, Umasiihiib usakana udaayiib niskatim hookna. 15 Weer dehay idꞌiineeb ishagaay faalamiit toosiltoon hasamaab kinki. Laakiin diimaab Ukwaasana dꞌiyaab ikatiyeet toosiltiib, bareekna wꞌiimaanuukna wintiit hinin masi gwidaka shaga geebookna nidꞌeet toona minniimnay. 16 Aflaay usakana udaayiib gidehookna eefeen yhasheeb bhaliinayeet toona adgirnay. Weer dehayi haashiib suur akay daamaab ishagaay faalamtiib kinhariw. 17 Laakiin uuktaab, "Wꞌinfiish, Wꞌankwana idꞌiyeet toonaatii baꞌiifish." indi. 18 Whayis ugarooyooh hammiid ootak kiiki, laakiin ootak Wꞌankwana daayiibu indiyeeb ikati.