1 Isanaayaan, oontꞌa aree Ukwaasana Magadoonyaayt tikaniisa yhiiyyeet tinꞌima tikteeniineet toona nisehariiw hookna. 2 Baraah gwirhaayeeb daayaaneek han aree winneet aniw iiktiineek han, umiyaawiib afirhaa iyiwna aree winneet hadareeba. 3 Baraah toona tꞌadgiriineet gwidaana yhiineetoon toona ani badehiib akati. Baraah masi utaadiyoohna mhakwal han yhiin hoon. Baraah iknaayeet niyaatii, 4 Ukwaasanaay oodehayi shagaamtiib alya adhidh hooy imeerneet toona hoon yhariwna. 5 Baraah hinin sꞌayaamnaneet toonaatiit dꞌiyaab kiikeena, laakiin baraah hankaab igarooyeehna Wꞌankwana yhiina, aree malya Ukwaasanaayt niyaatii igarooyeehna hinin yhiina. 6 Aflaay hinin Tiituus willa soona, baruuh suur badooyaab iiktiyeeb tinꞌimaati shaga bareeyookna geeb faaysiiniyeet toonaati. 7 Laakiin baraakna naatiibka daayiib tidꞌiina: wꞌiimaaniibwa, ibhaliyeebwa, tukanaantiibwa, timmiimaat daayiinaaytiibwa, hinee dehaay tibariineeb ureeriibwa, kasseeh daayiib tidꞌiina. Aflaay umiyaawiit tinꞌimaateeb han daayiib tidꞌaneet toona nhariw.

8 Ani bareekna kawaseeyan, laakiin ureeriyookna oosdik jarrabeetiit irawi sidki geeb asnaddiireet toona aharriiw. 9 Baraak Wꞌankwanaayoon Yasuuꞌaab Umasiihiit tinꞌima tikteenna. Baruuh gabaab iiktiyeek han, bareeyookna jillaay aniw iki. Aflaay bariiyooh unaawii baraakna gabeen tikatiin.

10 Aree toon tunaatiib bareekna naan dehookna hanyiiseeb ani tooy waseet aniiw hookna: whawil whasamiyaab baraak umiyaawiib suurii oobhaat kitehaayna laakiin umiyaawiit niya han tiibriina. 11 Oontꞌa ishaga faaysaana, aflaay ishagaay dꞌuuyiit niyaatuukna ishaga faaysiteenihoob ituukkin tindi, oontꞌa tibariineet toonaatii dꞌiina. 12 Tuniya tehayeek, gaal toona tꞌibariyeenaatii uumyaaw hooy agbilamiini, toona tubiibariyeetii kitti.

13 Bareek abiiyaakna gwirhaayeeb haayee oodehay eeraw aweena miyaad kinsehariw, laakiin ibakii nadiir ikatiin. 14 Oontꞌa gwidaana tibariinihoob, oodehay tishanhatiya ibariin shamna. Aflaay baraah han gwidaana ibariinihoob, eeshtiimna hookna. Malya kassaakna nadiir tikatiina. 15 Uuktaab "Gwidaana idbil uutak gwidaana miraab kiiki, aree shalikna idbil uutak han shalikna miraab kiiki." diyaabi.

16 Ani Ukwaasana ahammiid, baruuh ani dehookna abariyeet tudaayiinaay tꞌiiteena Tiituusiib uginꞌiib idꞌi. 17 Tiituus hineet tuwaliik toobhaat agbilaab kiiki, laakiin baruuh akraab hammasamaa yꞌiini hookna, aree baruuh uukna bak yharriiw. 18 Hinin aree tikaniisa kastaah usakana udaayiinaay shagaay yhamidneeb usanoon bariiyooh geeb dehookna nifdig. 19 Masi aree, oon ushaga Wꞌankwanaay matuuni jillaay shagaamtii dehaaywa, hinin udehayiit shamaamt nhariweet toona rhisnayi jillaaywa, barooh tikaniisa waasiyaaniit isoorimna hoon. 20 Hinin oon whadareemti miyaaw kak nꞌabkeeb gaalnaay yaay han kinhariw. 21 Wꞌankwanaay suurii oobhaat kiiki laakiin oodehayi suurii han sidkiib nikatiyeet toona nhariw.

22 Masi aree, gwida salalaayee gwida doora wꞌashꞌartiyooh rhisiyanoon usanoon bareeyooh geeb diigwatnay. Oontꞌa aree masi gwidakaana hammasamaabu, aree bareekna winneet aamaniini. 23 Tiituus anii shariikiibu, aree ibitkeekna shagaamiini. Aree isanaayaan aaraw tikaniisaati wakiilaaba, aree Umasiihi habna ikatiin. 24 Shaawti een eenda ureerookna rhisaana, aree hinin bareesookna habnamnayeeb yhabnaayi sabab rhisaana. Aflaay tikaniisa beet toona rheeneet toona adgireen.