1 Aflaay bareekna beeti yꞌeetiit warit lhanay hookna baadꞌiyi jillaay masi bareeyookna irheesamtii irꞌayi gayyaran. 2 Ani bareekna gadabisiyeek, aneeb afirhisiini aaw mhiyaabu? Ani bareekna eebhat gadabsan. 3 Oon usabbii aree been ujawaab dehookna aktib. Ani bareekna beeti yꞌeetiit gadabistiyookna hariwaab kaaki, baraakna oodehay aneeb afirhiseen eekna tikatiina. Ani afirhaab akatiyeek, baraak han afirhaab tikatiineet toona winneet akteen. 4 Ani winneet gwirhaayeewwa, hadal ginꞌiiwwa, gwidaat milooteewwa dehookna aktib. Bareekna gadabistiib sehariwaab kaaki, laakiin tuun tuuna ani bareekna kasseekna kak areeyaniyeeb tisookiin hookna. 5 Gaal han gadab ikwasiyeek, kasseekna gadabisaab ikatiyeet toonaatiit aneeb winneet gadabisaab kiiki. Ani toon winneet isꞌikir kaadi. 6 Baraakna igwidakaayaakna bariiyooh kehii tidꞌiineeb ijasa barooh mhaabu. 7 Oontꞌa laakiin baruuh winneet biigadabayi jillaay baraak barooh afooyaana aree sꞌakirna. 8 Aflaay bariiyooh dehaay ureerookna akkadteeneet toona hookna aharriiw. 9 Ani dehookna haay aktibeeb usabab: ijarrabamti kak hasameetiit, naatiibka aneeb tisnaakiirneet toona rhitiib ahariw. 10 Baraak gaal afooteeneek, ani han barooh afooyani. Ani afooyanihoob aree, ani afooya andiyeena tehayeek, bareeyookna jillaay Umasiihi suurii afooyan, 11 uubliis gwilakaayoon biikaayi jillaay ani toon adꞌi. Baruuh niyaamiiniyeet toona nikteen.

12 Ani Umasiihiib Usakana Udaayiib ibhaliiti jillaay Taroowaas abayihoob, beentooy shagaamti jillaay Wꞌankwana anii dehaay dheefaab ingil, 13 ani beentooy usanu Tiituus miraab kaakuuyt, masi mꞌasig miraab kaaki. Aflaay ani bareeh isalaamiib adiit Magadooniyaab beeti giigan.

14 Laakiin whamaad Ukwaasanaayu, Umasiihiib ansirama abuuki nikatiyi jillaay baruuh diimaab hinin maalhiyoon ikati. Hinee aree bariitooh tukanaan tooshkwaan kassooh oomhiin ibrir idꞌi. 15 Hinin Ukwaasanaay dehaay Umasiihiit shikwaant shakwiint tꞌiiteeba. Tushakwiin baliib yꞌidhhannaayi bitikwa baliib ikwidhiyaannaayi bitikwa baraamtini. 16 Eengal hinin tooyati baraam dehaay nikati, eeraw aree umidhhaniit shakwiint dehaay nikati. Oon ushagaay nadiir aaw ikati? 17 Gwida eefeen Ukwaasanaayt tudiigwat rayi jillaay yꞌabikna, hinin aree bareeh tꞌiiteeb kinki. Laakiin bariiyooh suurii nhas ginꞌii Umasiihiib bhaliinay, hinin aree Ukwaasana diigwataayoonu.