1 Baraak Galaatiyaay uudehay yꞌafriilooya! Aaw asehariya hookna? Yasuuꞌa Umasiih kak usaliibii kehii mismaraayee itoothꞌeet toona suurookna hadiidan. 2 Ani gaana toobhaat iikaneet toona ahariw. Ukwaasanaay Eeshuuk baraak kak timriina? Muusaay whaggiit sinaakrooytii han Umasiih maasiwtiit barooh wꞌaamantii timriina? 3 Aflaay kak bak haalaleeteena? Ukwaasanaay Aashuuk hookna badooyaaneet toona baraak iknaayaakna timmiisteeneeb hiisteena han? 4 Baraak tidꞌiineet tuuna kastuuh mishiit tiki han? Sidik takweet kitbari han? 5 Ukwaasana Ishuukeeh iniiw hookna, aree mꞌuujisaat ibitkeekna ikwasi. Laakiin toon toona baruuh sakiiniyeet baraak Muusaay whag tiramni sabbii han tari Umasiih timaasiwniit aamantaani sabbii tikati?

6 Tuun batuuh Ibraahiimi geeb bak tiikti, uuktaab: "Ibraahiim Ukwaasana aamaniya, beet tuuna aree shiboot dehaay tehasab." idi. 7 Aflaay wꞌiimaan ibariibka Ibraahiimi ar ikatiineet toona afhamaana. 8 Ijintiili wꞌiimaani sabbii Ukwaasana agbiliiniyeet toona aaktab shꞌiika sooyaan. Oon usabbii aree Ukwaasana usakana udaayiib Ibraahiim sooyaayt, "Bariiyook geebii kassaah idehaya baarakami iyadna." idi. 9 Aflaay baliin wꞌiimaan ibariin Ibraahiim, wꞌiimaani taki geeb baarakami iyadna.

10 Whag sinaakirtiit Ukwaasana afirhistiib harriiwka atooꞌitaab iikti indi. Aaktab "Whaggiib teefeet toona kastooh baasinaakiirka kassaah atooꞌitaab iikti iyadna." iyadna. 11 Aaktab "Uushbu wꞌiimaanii ikwaar indi." iyadnayt, whag sinaakirtiit Ukwaasana afirhisiini gaal han kiihaay. 12 Uun wꞌiimaani salal whaggi salal tꞌiiteeb kiiki. Uuktaab "Whag harriiweet toona sakiiniibka ikwaar indi." indi. 13 Laakiin whag umhiiniyoon aat ikayihoob, Umasiih whaggi wꞌaatii ishidhhan hoon. Tuun batuuh uktaabiib kataabtu: "Hindiib itishꞌiigka atooꞌitaab ikati." indi. 14 Yasuuꞌa Umasiih idꞌiyeet toonaati sabbii, Ibraahiimii dehaay waadiyaamaat tibaraka Ijintiili iyheen. Toon toona aflaay Eeshuuk Imugaddasa iwaadiyaamaab wꞌiimaanii nimeer nikati.

15 Yꞌarawaan, oon ani andiyeet toona kassooh oombꞌi nidꞌeeb eemsalee dehookna fassari andi. Gaal naat gaanaatii dehaay galad anbiikihoob, beet toona weer gaal han kiibidil tari kehii kiishaaw. 16 Uwaadiya Ibraahiimwa wꞌooriyooh dehaaywa hadiidamiya. Uuktaab bak kiidi, "Yꞌareeyooh dehaaywa" kiidi, aan gwida dehay miyaad ikati, laakiin "Ibraahiimwa wꞌooriyooh dehaaywa" indi, gaal nafar ikati, aree been baruuh Umasiih ikati. 17 Ani andiyeet tuuna bak tikati: Whag 430 hawlaayi harꞌii eeyaab, Ukwaasanaay ugaladwa uwaadiyaawwa kiibidil. 18 Ukwaasanaayt tibaraka nimeeri jillaay whag nisnaakiireek, taan tibaraka sidik Ukwaasanaay uwaadiyaay sabbii kiikitimna hoon. Laakiin Ukwaasana Ibraahiimii dehaay daayiibuuyt barooh iniiwi jillaay waadiyaab dehaay idꞌi.

19 Whag naan anfꞌiini? Uun baruuh malya attiyeewiyaabu, aree danuub niidꞌeet toona rhisiini. Laakiin been wꞌoor uwaadiya attiyeewiyaab yꞌiiniyeeb oodoor whag ingadiyeet toonaati. Ukwaasana whaggooh imalaki geebii Muusaab yhii, aree Muusa Ukwaasanaawwa oodehaywa eebtik bitkeemanaab iikti. 20 Laakiin gaal nafar oobhaat ikatiyihoob, bitkeemanaab kiiꞌateharraaw. Aree Ukwaasana gaal ikati.

21 Whag Ukwaasanaay iwaadiya imnafi han? Abadan, een kiikeen. Whag adgiriit gaal midhhan iyiw iiktiyeek, aflaay tuushbu whaggii eetniit tiikti. 22 Laakiin tuumaag kasseeh oodehay abuukiib tikwasi aaktab iyadna. Aflaay Yasuuꞌaab Umasiih aamaniiniibka Ukwaasanaay iwaadiya imaar indi.

23 Hinin wꞌiimaan hooy niibriyeeb udamaan eeyaneeb ookiik, whag abuukiib ikwaasiit hoon yꞌakrireeyooh whii idꞌi hoon. 24 Aflaay whag Umasiih eeyaneeb ookiik koojaayoon iikti. Malya iimaan nibariib niki aree Ukwaasana agbiliiniyeeb niki. 25 Oontꞌa been wꞌiimaan eeya, shaawti hinin whaggiit gwꞌadaadti whii kinhaay.

26 Yasuuꞌa Umasiihiib wꞌaamantii kassaakna Ukwaasanaay ar tikatiina. 27 Baliin Umasiihiib itoomaas kassaakna, igarooyeekna Umasiihi tistookwna. 28 Yahuudiib tari Jintiiliib, kishiyaab tari shariif, kwaab tari rabaab, shaawti daayi kiidiin. Kassaakna Yasuuꞌaab Umasiihiib gal tikatiina. 29 Oontꞌa Umasiihiib tikatiineek, aflaay baraakna sidik Ibraahiimi ar tikatiina. Ukwaasanaay uwaadiya Ibraahiimi geeb idꞌiyeeb bareeyookna ikati.