1 Ani bak andi hookna, ukwasaamana naatka kwasaamiiniib dis oor ikatiyeek, baruuh ukishiyaayka farig ibarikaab kiiki. 2 Bariiyuuh ubaaba waasiiniyeeb oodoor ookiik, baruuh sehaamanaawwa wakiilaayi whiiwwa daamiini. 3 Aflaay beet han hinin dadis ar niiktiyihoob bak niifi. Hinin toon tuduniyaati akriree whii kishiyaamaa niifi.

4 Laakiin udamaan winneet timmiimaa eeyanihoob, Ukwaasana Wꞌoorooh diigwatiya, barooh takat tifri, whaggi whii ifri, 5 aflaay baruuh whaggii isfadig hoon, aree hinin Ukwaasanaay ar niki. 6 Oontꞌa hinin bariiyeeh ar nikatiyayt, Ukwaasana Wꞌooriyeeh Eeshuuk hineeb iginꞌaayeeb ifdig. Aree Ishuukaah Ukwaasana Baaboon ikatiyeet toona sooyeen hoon. 7 Aflaay baraak shaawti kishiyaab kitteena, Ukwaasanaay ar tikatiina. Baruuh waadiyaayaab ikatiyeet toona aree imaar tiyadna.

8 Baraak Ukwaasana bitkaannihoob, gwisri sanamaayi kishiya akay tiifiina. 9 Laakiin oontꞌa Ukwaasana tikanna, tari sidik masi andi hookna, Ukwaasana ikan hookna. Aflaay fidinti agartiit baliin eenꞌakwwa titakweet baabari akriri whii kak kishiyaamteena? 10 Baraak waasamaat yinaatwa tirgaawwa hawlaayi fasalaawwa masseetwa teegwꞌadiina. 11 Ani bareeyookna dehaay arankwi. Bareeyookna jillaay daayaneeb ushagaayu kassuuh mishiit ikatiyeena ahansiik.

12 Yꞌarawaan, baraak aneeb tꞌiiteeb akeena, bareek tꞌiiteeb aki. Baraak aneeb naat weeraayi kitteena. 13 Hankaaneeb oodoor Usakana Udaayiib naanhooy dehookna bhaliiyaneeb shꞌaana. Ani lhaabuuyt beet toona adꞌi. 14 Aniit tulhanaay ibakii gwirhaab hookna dꞌiyaat tikati. Laakiin tulhanaayti sabbii aneeb ribaab kitteena tari fidnaab nakamaab kitteena. Aneeb Ukwaasanaay imalakeeb gaalnaayt tꞌashishnaheeb, tari Umasiih Yasuuꞌaab ooknaayt tꞌashishnaheeb. 15 Tifirhaateekna kasteeh naan dehaay tiki? Toon batooh adgirtiineek, igwꞌadeekna eekna firꞌateet aneeb tiyiwneet toona ani badehiib akati. 16 Ani oosdik sooyan hookna akay oontꞌa ashooyookna akati han?

17 Been uudehay daayiib eegwꞌadiin hookna. Laakiin bareetookna daayiinaayti jillaay kiiki. Baraah anii fidnaab siisagooyt yhariwna hookna. Aflaay bareeh daayiib eegwꞌadiin iikti tiyadna. 18 Ani geebookna baahaayeek han, takweet tibariina diimaab teegwꞌadiineet tuuna daayiiti. 19 Yaa Yꞌaraan, Umasiih tehooyteeyookna kwarriyeeb ookiik ani oofiraayiit tilhanay tꞌiiteena winneet lhamani. 20 Ani oontꞌa geebookna iifiyeet toona minniiman, aflaay bak geebookna kahadiidan. Ani bareeyookna whaaliib winneet ahansiik.

21 Gali bareesookna Muusaay whaggi whukwimi whii daamteeneet toona tehariwna. Laakiin whag naan indiyeeb tikteenna? 22 Ibraahiim malu ar iibriyeet toona aaktab sooyaan hoon. Oor gaalnaayt tuundi kishiyaatu, aree wꞌoor uraawiit tuundi hirriit takati. 23 Tukishiyaati oor diimaab teefeet tehayꞌaatiit faraay iikti. Laakiin tehirriiti oor Ukwaasanaay uwaadiyaay faraay iikti.

24 Kastuuh tuun tuuna weer miyaad han tibari. Taamꞌat timalu gaatka Ukwaasana udehayooh geeb idꞌiyeeb ugalad ikatiin. Haajir tukishiya, oorba Siinaayeeb ikeeb ugalad tikati. Batiiyeeh indhiwaayeeb faraay uudehay kassaah kishiyaab ikatiin. 25 Haajir, oorba Siinaay Wꞌarabi haashii tikati, aree amseeneet tumadiina Algudus tikati. Aree batuuhwa kassaah yꞌaraahwa kishiyaaba. 26 Laakiin Algudus tibreeteeb asti teefeet hirriit tikati, aree batuuh deetoon tikati. 27 Aaktab iyadna:

"Yaa tutakat tugiduudi, afirhii,

yaa firaay baafariit!

tageegi hissii waliikii tageegsi waawii,

yaa oofiraayiit lhanay baabariit!

Beet ootak tibariit tutakatiika

tutakat tꞌatooꞌishaat gwidaka firaay ifaar tindi." iyadna.

28 Yꞌarawaan, baraak oon uwaadiyaay sabbii tifreena, Isehaag han bak iikti. 29 Laakiin wꞌoor diimaab teefeet tehayꞌaatii faraay ikatiib, wꞌoor Ukwaasanaay Ishuukee faraay gwirhaab dehaay ikwaas. Amsi han beet toona tꞌiiteena tikati. 30 Uuktaab naan indi? Uuktaab "Tukishiyaawwa wꞌooroohwa giigsaana! Tukishiyaati oor tikwasaateeb tehirriiti oori geeb kwasaami kiidi." indi. 31 Shaawti, yꞌarawaan, hinin tukishiyaati ar kinki, laakiin tehirriiti ar nikati.