1 Ani Wꞌankwanaay sabbii, abuukiib akatiib, sooyani hookna: Ukwaasana uukna waasaab ikatiyeeb udehayiitooh tikweerneet toonaati. 2 Diimaab baatageegaana, shiboobna, tarmuumaab dꞌiina. Taktaki geeb amtaraamtiit ureerookna rhisaana. 3 Ukwaasanaay Aashuuk iginꞌaayeekna eeshwawiini jillaay daayiib shagaamaana. Toon toona aree umꞌasgiib kwiriinaat dꞌiina. 4 Baraakna kassaakna gaal garooy tikatiina. Gal Shuuk Ukwaasanaay eefeena, baraakna han Ukwaasanaay udehayiit waasamtaanihoob gaal sꞌaya attiyeewiyaabaana. 5 Gaal Ankwana eefi, gaal iimaan eefi, gaat atoomsooy teefi. 6 Gaal Kwaasanaawwa Baabaawwa kasseeyooh ikati eefi. Baruuh kasseeyooh Ankwana ikati, kasseeyooh shagaamiini, aree kasseen hoon kwarri.

7 Umasiih umiyaawooh hini bitik akuush anu yꞌadhidh. 8 Aaktab bak diyaaba:

"Baruuh asti oomhiin itageegaab idifihoob,

gwida abuuki suuriimiyaayt

oodehay miyaaw yhii." diyaaba.

9 Baruuh "Asti idif" ittiyoodiyihoob, Umasiih tubuutiib nꞌati dhoomaabu miyaad ikati. 10 Tuun masi bak miyaad tikati: toobuut nꞌati dhoomaab ikatiib aree, teebri titageega reewaab ikatiib barooh ookna ikati. Aflaay baruuh toobuutwa teebreewwa kasteeh intiib. 11 Umasiih hinee gwadib waasiyaayt hoon, linguumaawwa, nabiyaawwa, diigwatkinaawwa, fagiiriyaawwa, koojaawwa ikwaas hoon, 12 Ukwaasanaay oodehay shagaamtii dehaay soomirtiit, aflaay bariiyuuh ugaru wintiit yꞌankiir. 13 Tuun tuuna aree hinin kassaan wꞌiimaaniyoon gal nikatiyeeb ookiikwa, Ukwaasanaay Oor daayiib afhamnayeeb ookiikwa nimoorariim. Malya Umasiihiit hinin wawin niikti niyad, daayiib aree barooh tꞌiiteeb niikti niyad.

14 Aflaay hinin nisrikaab niikti kindi. Tallas dehay gwisri tꞌaliimii ibakii biitiilneetoon toonaati. Baraah ubaraam doorka mhiin mhiinii nanfiib tꞌiiteeba. 15 Uureer diimaab oosdik haay soonayeeb ikwasyeetoon toonaati. Malya kasseeh isalalaayee niiwin niyad, aree Umasiih tꞌiiteeb nikati. 16 Baruuh ugarooy girma ikati. Umasiih ugaru taktakeeb yꞌanbiik, kasseeh ugarooy itarab timmiisi shagaasiini. Aree ugaru ureeri sabbii wintiit yꞌankiir.

17 Ani oontꞌa andi hookna: Ani Wꞌankwanaay wꞌaamantii aree sidik sooyani hookna, dhiba dehayiit ookwiraay singadna. Bareetaah tifikra takweet kiibariin. 18 Iginꞌaayaahna thibniib eefeen. Baraah winneet atoorbiyaaytwa gamaamtwa ibariin. Ukwaasana iniiweeb umidhhaniib aree adhidh hooy kiibariin. 19 Baraah winneet haamaaba, akra ginꞌiiba, yꞌeeba kiiribna, kasseeh ijinsaayi yꞌeeba shagaameen.

20 Baraak beet toona Umasiihiib bak allamamaab kitteena. 21 Baraak barooh daayiib timaasiwna, bariiyooh aamanaayeet Yasuuꞌiib eefeeb oosdik allamamtaana. 22 Aflaay shꞌiika tiifiineeb whaal gadna dꞌiina, baraakna tehiriwneet hayꞌaatiika tikwiirna. Shꞌiika tiifiineeb whaal aree talasaayt niyaatii imag. 23 Iginꞌaayaaknaawa igirmaayaaknaawa ibakii gayiimeena, 24 aree baraak ibakii gayiimaana, Ukwaasana tꞌiiteeb akay daamtaana. Aflaay ibakii sidkiit shibootwa mugaddasaabwa akeena.

25 Hinin gaal garooy nikati. Aflaay Eegwisir gadna dꞌiinaat taktak oosdik sooyaana. 26 Titehasiinihoob aree, tehasiyaaytuukna danib tikwasiit baakwaasna, aree kassooh oombꞌi baahaseena. 27 Oobliis fursaat baahiiwna. 28 Gwiharaab tikatiyeek, toogwihar ishaa. Nhas akaat akraab shagaama. Shaawti oodehay yꞌaniw naat iyaaw tindiya.

29 Yꞌamag bhali singadna. Tudaayiinaay udaayi door sooyaana, toona tisooteeneet aree oodehay haay shamna. 30 Ukwaasanaay Eeshuuk Imugaddasa baasehasna, bꞌeeb gaal tumaagtiisookna itfidig tiyadneet toona Aashuuk akkadeen. 31 Hamiinayt baadꞌiina, hasiyaaytwa gadabtiiwwa maagnaaytwa baadꞌiina. Taktakeeb baafaraana tari baaneewaana, maagt iyadneena kastooh baadꞌiina. 32 Nhaswa rhamaat ibariinwa akeena, taktak afooyaana. Ukwaasana han Umasiihii afooya hookna.