1 Baraak Ukwaasanaay daayi ar tikatiini sabbii, ibakii barooh tꞌiiteeb akeena. 2 Umidhhanookna ibakii reerii kwiriina, Umasiih han areeya hoon. Ugarooyooh Ukwaasana afirhiseent karaama ikwaasiit umidhhanooh hini jillaay nuuniya.

3 Baraak Ukwaasanaay dehay tikatiini sabbii, jikuunwa tari najaasaatwa tari haamtiiwwa geebookna naat han biidaayayneet toonaati. 4 Amag bhaliiwwa, tari hakwistiiwwa tari hamiit kalmaawwa baadiina. Laakiin Ukwaasana tehamidneet toonaati. 5 Een bareeh daayiib tikteenna: unafar whaamaawwa, unajiswa, tari wꞌamaag sakanaawwa, uun baruuh sanamaab anbiid ikati. Unafar bak sakiiniib aree Umasiihwa Ukwaasanaayt tehadꞌaayeetiib adhidh imaar kiidi. 6 Amag bhaliyee gaal han biitiil hookna. Ukwaasana oodehay barooh baasinaakiir jasaayiini, amaagna bhaliiyeen han jasaayiini. 7 Shaawti bak tꞌiiteeb oodehay baaꞌaraweesamaana.

8 Baraak iknaayaakna thibintiib tiifiina, laakiin Ukwaasanaay dehay tikeeni sabbii Wꞌankwanaay oonuur timriina. Aflaay oodehay unuuriib ikatiin tꞌiiteeb ibakii tikatiina. 9 Uunuur gwidaat shibootiit firꞌaaytwa, daayiinaaytwa, oosdikwa haay yꞌiini. 10 Wꞌankwana afirhistiniina teekanneet toonaati. 11 Teena takweet baabariin uudehay uthibniib idꞌaneet baadꞌiina. Laakiin bataah kak amagt ikatiineet toona rhisaana. 12 Thibniib daameent teena haay whadiidti han uukna nifir ikati. 13 Laakiin taan taana kak tꞌiiteet ikatiineeb uunuur rhisi indi. 14 Uunuur naatka daayiib rhisiini. Oon usabbii aree aaktab:

"Yaa udiwana tunꞌari hooy bꞌaraa,

tooyat hooy yakaa.

Malya Umasiih kehook talawi indi." diyaaba.

15 Aflaay kak tikweerneeb daayiib gwꞌadna. Oodehay yꞌagimnaayeet baakwiriina, laakiin oodehay ifagarnaayeet kwiriina. 16 Aan aambꞌi amag bꞌi ikatiini sabbii, tifursa titimeerneet kasteeh daayiib haay anfꞌamana. 17 Aflaay baaꞌafreeyaana! Wꞌankwana yharriiweet toona afhamaana. 18 Haab gwꞌeetiit baaꞌaskiraana, wha kwidhsiini hookna. Laakiin Eeshuuk tabna. 19 Taktakee dehaay shiilaat diina, midehana, Eeshuuk Imugaddasaayeet kafa kafaana. Wꞌankwana kassooh uginꞌiisookna hamidna. 20 Wꞌankwanaayoon Yasuuꞌaab Umasiihiib oosmii diimaab naatii dehaayka Ukwaasana Ubaaba hamidna.

21 Umasiihi mirkwaayii oodehay eeraw hankaab daasaana.

22 Yaa taamꞌa, Wꞌankwanaayt igarooyeekna eendeeyookna whii daasaana. 23 Umasiih tukaniisaati kehii hadꞌaayeet ibariinaayt, uutak han tutakatiyooh kehii hadꞌaayeet ibari. Umasiih uukna tukaniisi Wꞌishidhhiinu, aree ugarooyooh ikati. 24 Aflaay taamꞌa eendeehna naati hankaayka daaseeneet toonaatu, tukaniisi han Umasiih naati hankaayka daastini.

25 Umasiih tukaniisi areeyaayt ugarooyooh dehaay nuuniya, aanda han timꞌateehna areeyeeneet toonaati. 26 Baruuh ibhaliyeesooh tukaniisi mugaddast ikwaas. Batooh yamee ishaagwidhaayt isinhas. 27 Umasiih toon toona haay idꞌiyeeb usabab: tukaniisi matuunwa gadaasaatwa marriyi jillaay bak idꞌi. Batooh gwihaab anu tari hakwaat anu tari adhibiit anu tari wari minkwis anu ikwaas. 28 Aanda igarooyeehna eekna areeyeeneet toonaatiit, timꞌateehna han ibakii areeyeena. Uutak tutakatooh areeyiiniib ugarooyooh ookna areeyiini. 29 Uudehay igarooyeehna eekna kiiribna. Laakiin igarooyeehna tamseena, aree daayiib iwariin. Umasiih han tukaniisi bak iwari. 30 Hinin bariiyooh ugarooy dehay nikati. 31 Uuktaab "Oon usabbii uutak ifarooyeeh ishti dꞌiit, takatiyooh geeb gaal ikati, mhallaahna aree hiddaab gaal bashar ikatiin." indi. 32 Oon uktaabiib winneet kwabaasna teefi. Laakiin ani Umasiihwa tukaniisaatiyoohwa hadiidani. 33 Laakiin baraakna han bak tikatiina: aanda kassaah timꞌateehna ugarooyiitoohna areeyeeneet toonaati. Taamꞌa han kastaah ibakii eendeehna hamooyseeneet toonaati.