1 Baraak maagnaaytwa danuubwa tidꞌiiniit Ukwaasana finaasamtaana akay suur ayaa tiifiina. 2 Toon tuduniyaati amag salala tiramniit oobliis tisnaakirna. Baruuh tuduniya yhankiim, ishuukaah aree Ukwaasana baasinaakiir oodehayi kehii akrir ibariin. 3 Hinin han door gaal igarooyaanwa iginꞌaayaanwa yhiriwneet teena tiknaatee sakna. Hinin Ukwaasana nisehas, oodehay iraweet sakna. 4 Laakiin Ukwaasanaayt tirhama winneet gwidaata. Baruuh hinin areeyiiniyeeb uureer han winneet win ikati. 5 Hinin tumaagti sabbii ayaab akay niifi. Laakiin Ukwaasana winneet areeyaayt hoon Umasiihi geeb ishidhhan hoon. Ukwaasanaayt tinꞌimaatee aree baraakna tidhhanna. 6 Ukwaasana tuyatii Umasiih Yasuuꞌi geeb yakisiya hoon. Tibreeteeb aree Umasiih Yasuuꞌi daraag mhiin yhii hoon. 7 Ukwaasana toon toona haay idꞌiyeeb usabab, harꞌook yꞌiiniib udamaaniib baruuh kak sidik dehoon daayiib ikatiyeet toona nadiir baabariint nꞌimaati miraayii rhisiini. Baruuh Umasiih Yasuuꞌa idꞌiyeet toonaatiib lawsiini. 8 Baraak Ukwaasanaayt tinꞌima aamantaaniit tidhhanna. Baruuh hinin astehalnayeet toonaati mhakwal daayiib iweer hoon. Toon toona Ukwaasana bareekna hiiyyaabu, baraakna iknaayaakna naat han dꞌiyaab kitteena. 9 Baraakna iknaayaakna rayiimaab tikatiineena kitti. Aflaay baraak haay faalamteeneena kitehaay. 10 Hinin Ukwaasana shagaamaab ikatiyeena nikati, baruuh Umasiihiib idꞌi hoon, daayi shaga nidꞌi jillaay baruuh whankaay dehoon isoomir.

11 Baraak Jintiiliib tikatiineet toona shꞌaana. Baraak suur "Ibaakwishaaba" tittiyuudna, baliin ikwashab iiktiin ookwishuub haay ityisikna. 12 Been oodoor baraak Umasiih kanaab kitteena. Israaꞌiileeb oodehayi geeb aree girbaab tiiktiina. Ukwaasana bareeyooh geeb idꞌiyeeb ugaladiib aree baraak adhidh kitbariina. Toon tuduniyaatiib sꞌayaab anuuwwa Ukwaasana anuuwwa tikwiirna. 13 Baraak Ukwaasanaay sagii tiifiina. Oontꞌa Umasiih Yasuuꞌa ubooyooh karaamaateeb ifirꞌaayt, bareekna Ukwaasana beeti haay eeya hookna.

14 Umasiih Iyahuudwa Ijintiiliiwwa geeb mꞌasig idꞌi. Baruuh tumaagti kirra hinin soorarbaab ugarooyooh ooknaay katꞌiya. 15 Baruuh Muusaay whag kasteeh tiwaseewwa whukwimwa iibriib ingad idꞌiit, Iyahuudwa Ijintiiliiwwa gaal nafariit ismarriit umꞌasgiib ishaawawi hoon, 16 aree oon ugarooy kasseeh bareeh usaliibii Ukwaasanaay geeb isꞌaddil, aree baruuh oomaag bareeyooh bitik iifiib idir. 17 Umasiih eeyaayt bareekna Ijintiili mꞌasig bhaliisamiya hookna. Baraak Ukwaasanaay sagii tiifiina, hinin Iyahuudi Ukwaasana niidwil han mꞌasig bhaliisamiya hoon. 18 Umasiihi sabbii aree, hinin kassaan gal Shuukee Ubaaba ookiik eenay.

19 Baraak Ijintiili shaawti iibaabkinaabwa girbaabwa kitteena. Baraak whaashi dehay tikatiina, Ukwaasanaay oodehay ikatiin baliib tꞌiiteebaana. 20 Baraak masi ilinguumaawwa inabiyaawwa dꞌiraab ikatiineeb wꞌasaasiib teefeena. Toorkwinti awi aree Umasiih Yasuuꞌaab ookna ikati. 21 Baruuh oogaw kassooh hiddaab anbiik, aree oogaw mugaddas diini gaw Wꞌankwanaay ikatiyeeb ookiik isoowiin. 22 Baraakna han been oogaw Umasiih dꞌiraab ikatiyeenaay gal tikatiina. Been oomhiin aree Ukwaasana ooknaay Shuuk ikweerni mhiin ikati.