1 Umasiih Yasuuꞌi jillaay, ani Baawloos abuukiib akati. Aflaay Ijintiili bareek iishtam hookna andi. 2 Ukwaasana tinꞌimaateesooh oon ushaga bareetookna daayiinaaytiib aneeb hiiyyaab ikatiyeet toona sidik tikteenna. 3 Ukwaasana umikrooh ukwabaas uniyaamaab ikatiyeeb anii dehaay lawisiya. Toon toona aree ujawaabiib sooyani hookna. 4 Ani aktibeet toona agriiteeneek, Umasiihiit tukwabaasnaay ani afhamaab akatiyeet toona iikan tiyadna. 5 Shꞌiiya damaaniib toon toona tukwabaas uudehay soomamaab kiikeen. Laakiin beet toona oontꞌa Ukwaasana lawisiya, ilinguumaayeehwa inabiyaayeeh imugaddasaayee dehaaywa Ishuukee lawisiya. 6 Tuuna tukwabaas aree bak teefi: Umasiih Yasuuꞌi sabbii, Ukwaasana Iyahuudi geeb idꞌiyeeb uwaadiyaay, Ijintiili Usakana Udaayiinaay adhidh ibariin. Ukwaasana masi Ijintiili gaal garooy ishaawawi.

7 Ani oon Usakana Udaayiinaay shagaamana aki, toon toona aree Ukwaasanaayt tinꞌimaatee amri. Baruuh yꞌakrireesooh ushagaay aneeb yhiiheeb. 8 Ani kasseeh Ukwaasanaay udehayiika diskaab akati. Teen tinꞌima aree ani attiyeewaay: Umasiihiib oomraay wꞌabaar baabariib, Ijintiili bitik haay bhaliiyaniyeet toonaati. 9 Ukwaasana naatka idꞌiib, kwabaasna baruuh niyaamaab ikatiyeet, diimaab bariiyooh uginꞌiib dhꞌimaat toona oodehay kasseeh afhistiib hoosu yhariw. 10 Malya Ukwaasanaay uumkir oontꞌa tukaniisaatiib lawiini. Ukwaasanaayt tifagarandi kasteeh tehayꞌaateesooh tibreeti haakmaawwa isuurkinaayee dehaaywa lawiyaan. 11 Ukwaasana toon toona barooh ooknaay daayim mikrii ikwaas. Baruuh Umasiih Yasuuꞌaab Wꞌankwanaayoon geebii toon toona itkwikw. 12 Bariiyooh daamiitwa, bariisooh aamaneetiitwa Ukwaasana beeti daayi iimaanii eenay. 13 Oon usabbii aree ani bareeyookna jillaay lhamaniyihoob, baraak isꞌaya baakitꞌana. Beet tuuna bareekna habnaab tiniiw hookna.

14 Oon usabbii dehaay ani Ubaabaay suurii atganiif. 15 Teebreewwa tubuutiiwwa teefeena kastuuh umidhhanoohna bariisooh imeerna. 16 Ukwaasana oomraayooh oowinnaay bareekna isꞌakiireet toona hooy aharriiw, Ishuukeesooh tehooyteekna isꞌakiireet toona hooy aharriiw. 17 Aflaay Umasiih bareeyeekna iginꞌaayeeb wꞌiimaanii ikwaar indi. Ugadamuukna imꞌatiim aree ooreerii tꞌakirneet toonaatii dehaay siileelani. 18 Aflaay kasseeh Ukwaasanaay oodehayi geeb, Ukwaasanaay uureer kak marꞌaawwa gwimadwa, kak tageegaawwa dhoomaawwa ikatiyeet toona tufhamaati akrir timeerna. 19 Umasiihiib ooreer kassooh teekanneet toona asehariiw hookna. Uun uureer timmiima biiꞌatookkaaneek han, umidhhanuukna Ukwaasanaayt tehayꞌa kasteeh iittab indi.

20 Oontꞌa kassuuh umatuun Ukwaasana, wꞌadgriiniinaay ikati, yꞌakriraah yꞌalya hineeb shagaameeneeb, hinin raatnayeet tari neekwineet toonaatiika gwidakaana tankwiikw. 21 Umatuun bariiyooh baꞌiikti tukaniisaatiibwa Umasiih Yasuuꞌi geebiiwwa diimaabwa kassoohoobwa taas taasii baꞌiikti! Aamiin.