1 Aakhar, yꞌarawaan baraak Wꞌankwanaay afirhaana. Ani suur kitbaab iiktiyeet toona tꞌa han masi marookna akantiibeet tuuna kagallabtiheeb. Tuun tuuna asgaab tikwasi hookna. 2 Baliib eeyas hooy digwagwna, baliib eenda toomaag shagaameen, baliib ubashari katꞌana, hooy digwagwna. 3 Hinin baliin usidki kwashab nikwishab, hinin Ukwaasanaay Ishuukee nikwishab, Umasiihi Yasuuꞌiib umatuunii faalamnay, aree ubasharii dehaay baaꞌadehamayaab, 4 ani uknaayu teen toonaatii dehaay adehamiib iiktiyeek han sabab abari.

Gaal han weer ubasharii dehaay wꞌadehamtiib sabab ibariib hiisiiniyeek, ani gwidakaana abari: 5 ani afrayeekka tooyin tꞌasimhaatiib akwishab, ani Israaꞌiileeb oodehayii akati, Binyaamiiniit tugabiilaatii akati, Ibriib Yꞌibriyi oor akati, whaggiib aree Fariisiib akati. 6 Wꞌashꞌartiib, tukaniisi han amaag waraayan. Tushbootiib, ani whag yhiriweet toona gwihaab anu adꞌi.

7 Laakiin baliit teena kasteeh ani rayiib hiisaneet, oontꞌa Umasiihi jillaay hasart akwaas. 8 Teen teena teebhat kiikeen. Umasiih Yasuuꞌaab Wꞌankwanaayiitu tukanaan toowinnaati geeb asnadiraayt naatka hasart akwasi, bariiyooh jillaay ani kasteeh teena ahasar. Umasiih rayiimaniyi jillaay, bateeh kuushaat akwasi, 9 aree bariiyooh geeb gaal akati. Ani shiboot uknaayiitu been whaggii eetniit kaabari, laakiin Umasiihiib wꞌaamanti geebii tikatiit, tooshbu Ukwaasanaaywa wꞌiimaaniiwwa eetniit abari. 10 Ani aharriiweet tuuna kastuuh aree Umasiih kantiit barooh yakisiyaan yꞌakrir akteeniyeet toona aharriiw. Ani han tilhanayteeh lhameetiit tuyatiyooh barooh tꞌiiteeb akatiyeet toona aharriiw, 11 aree aflaay, ani han yꞌayaani bitikii ooyak sꞌayaamani.

12 Ani toon kastooh suur akay amri miyaad kiiki tari suur akay timmiimaab aki miyaad kiiki, laakiin beet toonaati rayiimtiib akraab shagaamani, Umasiih Yasuuꞌa beet toonaati jillaay yꞌabik kaleewiyaheeb. 13 Yꞌarawaan, ani beet toona suur akay rayiiman kaadi. Laakiin gaana sakani: Harꞌii teefeet toona baadhintiit suurbeeti teefeet toona ashanbiib. 14 Aflaay Ukwaasana, Umasiih Yasuuꞌi geebii dehaay waliikiiniyeetoon tibreeteet jaaꞌisa aniini jillaay, ani whadaf beeti dhaabani.

15 Hinin kassaan yꞌabligaab nikatiib, teen teena tꞌiiteena neekwineet toonaati. Aree gaal bareesookna weenaatiib inkwiineek, beet toona han Ukwaasana dehookna gwꞌagwaat iikwasi indi. 16 Laakiin oontꞌa nꞌabkeet toojha beeti ibakii suur neebiyeet toonaati.

17 Yꞌarawaan, ani sakaniyeet toona tꞌiiteena sakaana aree hineeb eemsal eetriim oodehayii allamamaana. 18 Ani toon toona suur gwida doora sooyan hookna, oontꞌa han milootee masi sooyani hookna. Gwida Umasiihiib usaliib ashoosameen eefeen. 19 Baraah ookwidh beeti sakeena, ukwaasanaayuuhna ufꞌiyoohna ikati, aree umatuunuuhna bareeyooh sikwꞌi ikati. Tikwoonaniitaahna tubuuti kehii eefeent tinaateeb ikati. 20 Hinin whaashuun teebri ikati. Wꞌishidhhiin Wꞌankwanaayoon Yasuuꞌa Umasiih tibreetee yꞌiiniyeet tooyin winneet nhagit. 21 Naatka bariiyooh whii tikatiyi jillaay barooh adgirseen yꞌakriree, baruuh hineeb ugaru oonꞌakw bidiltiit, barooh ookna tꞌiiti matuuni garu iikwasi indi.