1 Ibitikeekna finaabwa hasiyaaytwa naan tikwasi? Baraakna tehooyteeyookna timꞌaliigneet tiniyaataakna haay kaꞌeeyaan han? 2 Naat gaat tehariwna laakiin kitmiriina. Aflaay madar tehariwna laakiin toona tutehariwneet kitmiriina. Timhassiina aree timdeerariina. Baraak Ukwaasanaay hariwaab kitteenayt, kitmiriina. 3 Baraak amaagt hayꞌaatii tehariwnayt, raatteenihoob kitmiriina. Teena titimeerneet igarooyeekna afirhistiib tilakikna.

4 Baraak uudehay ijakiina, tuduniyaati geeb wꞌaraweesamti Ukwaasanaay geeb atoorbiina tikatiyeet toona kitkanna han? Tuduniya araweesamti hanyiidka, Ukwaasana ashoosamiini. 5 Tari uuktaab indiyeet tuuna takweet bitbariyeeb baahiisaana. Uuktaab "Aashuuk Ukwaasana hoon idꞌiyeeb winneet hasaadaat ataba." diyaabi. 6 Laakiin baruuh gwidakaat nꞌima iniiw hoon. Oon usabbii, uuktaab:

"Ukwaasana oodehay ookibir ibariin imooriib

laakiin imiskiina nꞌimaat iniiw." indi.

7 Aflaay malya igarooyeekna Ukwaasana nuunaana. Oobliis amꞌakaarna, aree baruuh hookna ifuur indi. 8 Ukwaasanaay dehaay diwilna mꞌaana, baruuh han iidwil hookna indi. Baraak idanuubi kina, yꞌayeekna shaagwidhna, aree baraak imalu mikiraayi, iginꞌaayeekna sinhasna. 9 Gadabaana, waawaana aree milootaana. Ifiyadeekna gadab kwaasna, aree tifirhaateekna hamshuush kwaasna! 10 Wꞌankwanaay suurii igarooyeekna baasoowiinna. Aree baruuh asti yaksi hookna indi.

11 Yaa isanaayaan, taktak baasuugaana. Usaniyooh kehii amaagna hadiidiiniibka tari haakamiiniibka, whaggi kehii amaagna hadiidiini aree barooh haakamiini. Whag haakamteenihoob, barooh kitdibiina, laakiin bariiyooh whaakamti kehii sꞌaabaana. 12 Whaggi miyaawanaawwa Ugaadiiwwa gaal oobhaat ikati. Baruuh aree whag danbiibwa ukwidhsiiniibwa ikati. Laakiin baruuk aab tikatiyayt weer haakamtiniya?

13 Oontꞌa sinaakirna, baraak "Amsi tari lhayt bak niibi niyad tari beet tumadiina niibi niyad, beentooy hawil niistꞌa niyad, tijaaraat niidꞌi niyad, mhallagaab nimaar niyad." tiyadna. 14 Naanhooy bak tiyadna? Lhayt naan iikti tindiyeeb han kitkanna. Umidhhanuukna naanaatu? Baraak oodhꞌaash tꞌiiteebaana, uudhꞌaash shalik door lawiini, malya kwidhiini. 15 Baraak bak tiyadneet toonaatu, "Wꞌankwana indiyeek, nikwaar niyad, toon tari beet toona niidꞌi niyad." tiyadneet toonaati. 16 Oontꞌaaneet baraakna tatageegteena aree teefishna. Kassuuh bak tꞌiiteeb itatageegti maagnaayt ikati. 17 Aflaay tudaayiinaayti dꞌuuy ikteeniib aree batooh biidꞌiyeek, danuubi kina ikati.