1 Baraak uudehay igaba, oontꞌa sinaakirna! Gwirha dehookna iikti iyadna, milootaana aree waawaana. 2 Uumraayuukna suusiya, aree yhalakaayeekna dꞌoob tamiyaan. 3 Idimꞌaraayuuknaawwa tꞌashteetuuknaawwa afreeyaan. Aan yꞌafri kehookna badehiib iikti iyadna, aree ubasharookna tunꞌeetiit tami iyadna. Baraak oomraayookna wꞌagiyaayt tiyinaateeb tidbiina. 4 Shibibna! Baraak tidirꞌaateekna shagaasiistaaniit malya imhallagaayeehna tehabiineeb uudehay oontꞌa kehookna waaween. Tidirꞌaati wookanaayeet tuuwaaw Wꞌankwana Wꞌalyaanaay angwil tiktim. 5 Baraak tubuutiib daayi kwiraayiib hassitaana, aree igarooyeekna timdhidhna. Laakiin oontꞌa ooreew eedhhaab uudehay wharuudii dehaay isoomiirneeb tꞌiiteena tikatiina. 6 Baraak oodehay eenhas haakamtaana aree tidaarna. Baliin Baraah bareekna amꞌakiraab kiikeen.

7 Aflaay yaa isanaayaan, Wꞌankwana yꞌiiniyeeb ookiik tarmuumaab dꞌiina. Udirꞌaatkina whaash daayi harru fanrꞌi jillaay kak hangiiteeb shibibna aree tehibiiwwa oowiyaaywa biri kak tarmuumaay hangiiteeb shibibna. 8 Wꞌankwanaay wꞌaay idwil akay, baraak han tarmuumaab dꞌiina aree akraa gadna. 9 Yaa isanaayaan, taktakee baaꞌiikwaana, tari haakamami tiyadna. Ugaadi udheefaay ingadi!

10 Yaa isanaayaan, igwirhaayi door tarmuumaab rhisiini misaal eefi. Wꞌankwanaay oosmii hadiidiyaan inabiya shibibna! 11 Baraak tikteeniineet toonaatiit, hinin baliib Baraah igwirha imtaraam baarakamaaba niyad. Ayyuubiib utarmuuma timaasiwna, aree Wꞌankwana aakhar kak daayiina dehaay idꞌiyeet toona timaasiwna. Wꞌankwana winneet nꞌakwmanaayeebu aree rhamaateebi.

12 Yaa isanaayaan, shaawti naati dabaayka baahalafooyaana. Tibreetee tari tubuutii tari weenaatii baahalafooyaana. Baraakna "daayiitu" tiyadneet tuuna, daayiit batiikti. Baraakna "Amaagtu" tiyadneet tuuna, amaagt batiikti. Aflaay haakamami kitdiina.

13 Gaal han bareesookna gwirhaayeeb daayaabu? Baruuh siileeliiniyeet toonaati. Gaal han bareesookna afirhaabu? Baruuh hamaadiit kafa kafiiniyeet toonaati. 14 Gaal han bareesookna lhaabu? Bariiyooh dehaay siileeleeni jillaay, baruuh tukaniisaati suurkina waliikiiniyeet toonaatu aree baraah Wꞌankwanaay oosmii barooh saliitii eeshmiitneet toonaati. 15 Tuun tuusileel wꞌiimaanii daamaat eelhaab mheeltini. Wꞌankwana barooh isinꞌir indi. Maagnaayt naat han gwibbaab ikatiyeek, baruuh afoomi indi. 16 Idanuubeekna taktakee dehaay fidhadhna. Aflaay mheelamteeni jillaay taktakee dehaay siileelaana. Shibu tak siileeliiniyeet tuusileel akraatu aree winneet shagaamtini.

17 Eelya tak hinin tꞌiiteebi. Baruuh usidkii siileeliya, oobri singadooyt yhariw. Uubri whaashiib mhay hawlaawwa tarabwa yaamaab kiiki. 18 Baruuh masi siileeliya, aree taabri iyaamna, aree tuubuur harroob yakista.

19 Yaa isanaayaan, gaal bareesookna usidkii fidnaab hawriikiiniyeek, weer gaal barooh yꞌangiireet toonaati. 20 Toon toona shꞌaana, maagtikina amaag salalii yꞌangiirka, barooh tuyatii idaab indi, aree gwidaat maagnaayt assi indi.