1 Yaaguub, Ukwaasanaay kishiyaawwa Wꞌankwana Yasuuꞌaab Umasiihi kishiyaawwa ikatiib, tigabiila titamna malu kasseeh yhasheeb barart ookiik:

Shiboot salaam.

2 Isanaayaanwa tikwaataanwa aashboob, gwirha usalalookna yꞌeenihoob, daayiit firhaateet fursaatiit ahaana. 3 Wꞌiimaanuukna jarrabamiiniyihoob, wꞌamtaruumaayuukna inwiineet fursa daatniyeet toona tikteenna. 4 Aflaay barooh soowinna! Wꞌamtaruumaayuukna daayiib inwiinihoob, shaawti daayiib timmiimaab naat baahariiwaab tikatiina. 5 Gaal bareesookna fagarandiit harriiweek, baruuh Ukwaasana raatiiniyeet toonaatu, Ukwaasana ubaakaash raataana, baruuh raattii dehaay kiidaanin hookna! Baruuh iyaaw hookna indi. 6 Laakiin barooh raatteenihoob, ibakii aamanaana aree baaꞌeetehakaana. Been wꞌeetehakiini oobhari mooj ubaraam thꞌati nanfiyeeb tꞌiiteeb ikati. 7 Bak tꞌiiteeb uutak Wꞌankwanaay naat marriyeeb biihiisayeet toonaati. 8 Baruuh malu mikireebu, kastooh sakiiniyeet toonaatiib kahayaaya.

9 Uusan ishalik taadi umhiinooh utageegaay habnamiiniyeet toonaati. 10 Laakiin been ugaba umhiinooh udhibaanaay habnamiiniyeet toonaati. Baruuh iyaayyihoob umingaayiib yakiiniib whindi faariit iiyyi indi. 11 Tuuyin nabꞌat akay talawtini malya whindi tinliiw aree uufaar hooy dhadhbiini, wꞌindaawri hooy giigiini. Oontꞌaaneet, uutak ugaba ushaga beeti sakee kwidhi indi.

12 Uutak igwirha imtariim baarakamaabu, baruuh ijarrabamti ansiramaa hasamiiniyihoob, umidhhani taaj imaar indi, been ootaaj Ukwaasana ibarooh areeyeen dehaay waadiyaayaneeb, imaar indi.

13 Jarrabamteenihoob, ibakii gaal han, "Ukwaasana jarrabiiniheeb." baadiina. Ukwaasana maagtii kajarrabamiya, baruuh han gaal kajarrabiya. 14 Laakiin gaalka ooknaayt amaagt niyaatii jarrabami indi, itrifif indi, hoofiib dhibi indi. 15 Aflaay wꞌamaag niya maagnaayt nikwiitiit maagnaayt fanri. Tumaagnaay aree daayiib wintiit tooyat fanri.

16 Yaa isanaayaan yhayis, baaꞌatootaalna! 17 Uumyaaw udaayiiwwa utimmiimaawwa kassuuh tibreetee yꞌiini. Ukwaasana tibreeti nuur idꞌiib baruuh nꞌati haay yꞌiini. Baruuh kiibidil tari thibin kiikwaas. 18 Baruuh sidkiit kalmaatii waasiyaayt aree ikwaas hoon. Kastooh baruuh idꞌiyeenaatiib hinin awwal firaay nikati.

19 Isanaayaan aashbu, toon toona uginꞌookna hooy dꞌiina: gaalka willa maasiwna, diiseet bhaliiyaana, tehasiyaay shiishalikna. 20 Wꞌaadamiit hasiyaay Ukwaasana harriiweet tooshbu haay kaꞌeeta. 21 Shaawti wꞌamaag dabwa toomaagwa ishna. Ukwaasanaay dehaay tuubaana, iginꞌaayeekna idꞌiyeeb ibhaliyeeh agbilaana. Aan ibhali ishidhhiinna hookna.

22 Ibhali maasiweeb oobhaat kiiki, laakiin haay shagaamaana. Bak biikaayeek, ishuukeekna teetilna. 23 Ibhali sinaakirtiit haay baashagaamay uutakka, ootak ifiireeh siwꞌaaliitiib shanbiib tꞌiiteebu, 24 aree ugarooyooh shibibtiit fidnaab giigiini aree baruuh kak tꞌiiteeb ikatiyeeb willa eebdhiin. 25 Laakiin whag utimmiimaab tufadagooy iniiw, daayiib shanbiib uutak, malya diimaab toon toona sakiiniib, aree toona tumaasiwaab ikatiyeet baabaadhiin laakiin beet toona haay shagaamiiniib, daayiiniyi shagaayka baarakami indi.

26 Gaal diini takiit ugarooyooh shanbiibeek, umiidalaabooh biikaleewayeek, ugarooyooh intiil, udiinuuh han takweet kiidꞌi. 27 Oodiin Ukwaasana Baabuun agbiliiniyeeb, oonhaswa tunakwaas baabariibwa oon barooh ikati: inadaywa tꞌibraatfaatkiiwwa igwirhaayeehna door imshabiib aree tuduniyaatiit maagtii ugarooyooh kaleewiiniib ikati.