1 Sanaayeetwa kwaateetwa taktakeeb wꞌareeti soorarimna. 2 Igirbaani wꞌamnaasti baabaadhiinna, een iweer gwadi kanaab baakay imalak amnaasiyaan. 3 Abiiyaakna beentooy tiifiit toonaatiit, whabsiib eefeen baliib shꞌaana. Tilhanay ugarooyookna ooknaay haay hissiyaab toonaatiit, yꞌamag atweeriyaab baliib han shꞌaana.

4 Eedꞌar hamooysaana, idꞌareeb gaal ooraawi geeb amiinaab akeena. Jikuuniibwa faddaadamtiibwa yakeen baliib Ukwaasana sidik haakami indi. 5 Ishuukeekna imhallaga baaꞌareesaana, toona tutibariineet haay ganaamaana. Ukwaasana,

"Ani iiyꞌish hookna kaadi,

ani iibdhan hookna kaadi." diyaabi.

6 Aflaay hinin winneet akra ginꞌii,

"Wꞌankwana shamaamiigaayu ikati, ani iraakw kaadi.

Uudehay anii dehaay naan daayeena?" niyad.

7 Ukwaasanaay ibhali dehookna bhaliiyaan isuurkinaayeekna shꞌaana. Baraah ikwiirneeb ookwiraay shibibna, baraah iibriineeb wꞌiimaan tꞌiiteeb dꞌiina. 8 Yasuuꞌa Umasiih oontꞌaaneet iroowwa amseewwa diimaawwa, gaalu kagayyaramiya.

9 Kasseeh ijinsaayi girba tꞌaliimii atootaaltiit fidnaab baayakaana. Iginꞌaayaan tinꞌima miriitiit yꞌakirneet tuuna daayiitu, aduumaateet mꞌariitii kiiki. Teen timꞌariya tameen baliin takweet kiidꞌiin. 10 Hinin karaamaat firꞌati mhiin nibari, ifagiiriya udiini gawiib shagaameen teen tikaraama geeboon haay tameeni hag kiibariin.

11 Ufagiiri uuwin ureewi booy Oomhiin Winneet Umugaddas ookiik itfayiik, maagti giigsiti jillaay aree karaamaat mhaliini. Laakiin ureewi garu umꞌaskari fidnaab itooliiwna. 12 Aflaay Yasuuꞌa han ubooyooh ooknaay oodehay isinhiisi jillaay tumadiinaati dheefaay barraab lhamiya. 13 Aflaay hinin han barooh umꞌaskarii barraab niibi, bariiyooh wꞌeeb geeb niitkwi. 14 Hinin tooy diimaab timtariimt madiina kinbari. Laakiin harꞌook eetniit tumadiina nhariw.

15 Shaawti hinin Yasuuꞌi geebii diimaab Ukwaasanaay dehaay hamaadiit karaama nifarꞌeet toonaati. Been whamaad uyafii ikatiib, baruuh Wꞌankwana ikatiyeet toona rhisiini. 16 Tudaayiinaayti dꞌuuy baabaadhiinna, taktak shamna. Taan taana Ukwaasana afirhiseent karaama ikatiin.

17 Isuurkinaayeekna sinaakirna, tehadꞌaayeetoohna ramna. Baraah fiinaniit anu bareek eegwꞌadiina, ibakii aree hisaab iyawna. Baraah ishagaayoohna firhaatee idꞌani jillaay sinaakirna, bitsinaakiirneek gadabiit shagaami iyadna. Beet tuuna bareek iishtam hookna kitdi.

18 Hinin dehoon siileelaana. Hinin sidik nhast niya nibariyeet toona nikteen aree kassoohoob hamooysamaa nikweereet toona nhariw. 19 Aflaay ani bareekna beeti atꞌagiiri jillaay, ani uknaayu siileelteeneet toona hookna aharriiw.

20 Ukwaasana umꞌasgi, ugalad udaayimi booyii Wꞌankwanaayoon Yasuuꞌaab tooyatii ishidhhan, been tꞌanooti shaakwana, 21 baruuh yharriiweet toona tidꞌanihoob, tudaayiinaay kastooh barayiisi hookna. Yasuuꞌa Umasiihi geebii, umatuun diimaab bariiyooh ikatiyeeb, barooh afirhistiniit toona hoon shagaamiiniib baꞌiikti. Aamiin.

22 Isanaayaan, toon tisꞌakrooytiit diigwat tarmuumaay tisnaakiirneet toona hookna aharriiw. Oon ujawaabiib shalikna dehookna kitbaabi.

23 Usanuun Tiimooti han ifdageet toona tikteeniineet toonaati. Baruuh willa yꞌiiniyeek, bariiyooh geeb yꞌeetiit rheesami hookna indi.

24 Isuurkinaayeekna kasseeh salaamaana, Ukwaasanaay oodehay han salaamaana. Baliin Itaalyaay eefeen tishboonay salaameen hookna.

25 Ukwaasanaayt tinꞌima kasseeyookna geeb badaayiin.