1 Uun Malkisaadik Saalimi hadꞌaawwa Ukwaasana Utageegaanaay fagiiri iikti. Baruuh Ibraahiim yhadꞌaayeet migreebtii agaree imriit barooh idehar. 2 Ibraahiim aree kassooh oomraayiisooh tutamnaat takwi barooh yhii. Uusmuuh "Tushbooti hadꞌa" miyaadu, malya masi, "Saalimi hadꞌa" umꞌasgi hadꞌa miyaadi. 3 Baabaawwa deetwa anu, ayaayt anu, imbꞌeeyi badooti tari umidhhani agiya anu, Ukwaasanaay Wꞌoor tꞌiiti daayim fagiiri ikati.

4 Baruuh kak win iiktiyeeb shibiba: hoobuun wꞌatookkina Ibraahiim han toona tusaalbaab iiktiyeetii tutamnaat takwi barooh yhii. 5 Oontꞌa Laawiib uutaas fagiiriyaab ikatiin, tutamnaat takwi oodehayii lakkateeneet toona whag hooy yharriiw. Beet tuuna aree isanaayaahna Ibraahiimi taas ikatiineek han, bareeh tutamnaat takwi hooy lakkateen. 6 Uun uutak Malkisaadik laakiin Laawiib utaasii kiiki, baruuh masi tutamnaat takwi Ibraahiimii iyhi aree baruuh Ukwaasanaay uwaadiya ibariib Ibraahiim idehar. 7 Aree uuwinka oodiskaab baarakiiniyeet toona eetehak hooy kiihaay. 8 Ifagiiriyaayeet tehalaagaaytiib, tutamnaat takwi oodehay yꞌiyaayiinaayee lakkatamtini. Laakiin Malkisaadik beeb dhhaniibu attiyoodiyaab, tutamnaat takwi bariisooh lakkatamtini. 9 Laawi tutamnaat takwi lakkatiiniib, tutamnaatooh Ibraahiimi geebii kwisiyaab ikati gaal indiyeet toona han adgiriini. 10 Malkisaadik Ibraahiim imriyihoob, Laawi masi Hoobooh Ibraahiimi garooy iifi, baruuh masi faraay kiiki.

11 Laawiib ufagiiriimtii sabbii Israaꞌiiliib uudehay whag ittiyeewaayna. Oontꞌa Laawiib ufagiiriimti shagaay timmiimaab iiktiyeek, weer fagiiri harawa daayi kiidi. Gaal Malkisaadikiit takwi ikatiib Haaruuniit takwi kiiki. 12 Ufagiiriimti badala ikatiyihoob, whag han ibakii itbadiil. 13 Taan taana hooy attiyoodiyaat ikatiineeb been weet gabiilaatii ikati, aree beet tugabiilaatii gaal han tikaraamaati mhiiniib shagaamaab kiiki. 14 Wꞌankwanaayuun Yahuudaay taasii ikatiyeet toona atookakinaatu, aree Muusa ifagiiriyaayeeb hadiidiyanihoob, beet tugabiilaatiib naat diyaab kiiki. 15 Aree Malkisaadik tꞌiiti weer fagiiri lawiiniyeek, hinin diyaab nikatiyeet tuuna atookakinkaat tikati. 16 Baruuh ugadamiyooh asaasi sabbii fagiiriib akaab kiiki, laakiin baruuh umidhhani akrir wꞌagiya baabariinaay asaasi sabbii fagiiriib iki. 17 Uuktaab indi:

"Baruuk daayim fagiiri tikatiya,

Malkisaadikiit takwi tikatiya." indi.

18 Wꞌamir usuuri nꞌakwwa nafꞌaat baabariibwa ikatiyi sabbii itooꞌaash. 19 Muusaay whag timmiimaana kwaasaab kiiki. Oontꞌa laakiin daayika sꞌaya attiyeewiyaabuuyt Ukwaasana nidawil.

20 Tuun tuuna halafooyt anu kitti, wari han halafooyt anu fagiiriyaab ikeena, 21 laakiin baruuh halafooytii fagiiriib ikayihoob, Ukwaasana bariiyooh dehaay:

"Wꞌankwana halafooyaabu,

aree ibhaliyeeh iibdil kiidi: baruuh ‘Baruuk daayim fagiiri tikatiya.’ diyaabi." idi.

22 Toon tehalafooyti sabbii, Yasuuꞌa hayiska galadi daamin iki.

23 Oontꞌa baliin ifagiiriya tꞌiiteeb gwida eefeena, laakiin bareeh tuuyat tꞌafiit ushagaayoohna soorarmaab kiikeen. 24 Laakiin Yasuuꞌa diimaab dhhaniibuuyt, baruuh daayim fagiiri ikati. 25 Shaawti bariiyooh geebii Ukwaasanaay dehaay yꞌeen, baruuh diimaab bareeh ishidhhiineet toona adgiriini. Baruuh diimaab bareeyooh dehaay Ukwaasana hadiidsamiiniyi jillaay kwarri.

26 Bak tꞌiiti win fagiiri hinin nharweet toona faaysiini. Baruuh mugadasu, yaay anuubu, nhasu, tumaagtikinaayee tafaalu, aree tibreeteeb asti tageegaabi. 27 Ifagiiriya iwawin eeraw tꞌiiteeb kiiki, baruuh bꞌeebka karaamti farꞌiti kiihariw, hankaab ooknaay danuubi jillaay, malya oodehay irawi danuubi jillaay tikaraama farꞌiti kiihariw. Baruuh ugarooyooh gaalhoob nuuniyanihoob, kasseeh oodehayi danuubi jillaay karramamiya. 28 Whag oodehay eenꞌakw wawin fagiiriya ikwasi, laakiin tehalafooy whaggi harꞌii eetaayt, Wꞌoor diimaab timmiima win fagiiri iki.