1 Hinin toona tumaasiwaab nikatiyeet ibakii daayiib neegwꞌadiyeet toonaati. Aflaay fidnaab nitrifif kindi. 2 Imalak bhaliiyaaneet tudiigwat sidik tikatiyeek, shaawti batooh uuraab tari tisnaakrooyti naaw jasaab ikwasiin. 3 Oon umidhhan oowin neebdhiineek, kak fooriit nitfarꞌi? Uun umidhhan hankaab Wꞌankwanaay soomamiya, aree barooh imaasiw baliinee dehoon akkadamiya. 4 Ukwaasana ajaayibtwa gwidaat mꞌuujisaatwa ikwaasiit, Eeshuuk Imugaddasa han baruuh yharriiweet tunaatiit gagiigsiini. Aree toon toona alaamaatee badehaat ikwaas.

5 Ukwaasana tuduniya harꞌook eetniit oontꞌa hooy bhaliinayeeti kehii imalak hadꞌaab kwaasaab kiiki. 6 Laakiin mhiin eefi gaal badehaat hooy kwaasaab ikatiyeeb:

"Uutak baruuk hooy tinkwiineeb aabu?

Wꞌaadami oor naanhooy bak timshabiiba?

7 Baruuk barooh shalik door imalakeeka diskaab tikwaasa,

barooh matuunwa hamooysami taajwa kehii tidꞌiya,

8 aree naatka bariiyeeh iragadaayi whii tidꞌiya." idi.

Naatka bariiyeeh iragadaayi whii idꞌiyihoob, Ukwaasana oon bariiyooh whii dꞌiyaab biikaayeena ishaab kiiki. Laakiin oon amsi kasteeh teena bariiyooh whii haayee karhina. 9 Laakiin hinin Yasuuꞌaab rhinay, baruuh imalakeeka shalik door diskaab akay daamiya, oontꞌa baruuh matuunwa hamooysami taajwa kehii daasamiya. Baruuh gwirhaayeet yat itoodaar akay, aflaay baruuh Ukwaasanaayt tinꞌimaatee kasseeh oodehayi jillaay tooyat dꞌamsiiniib ikati.

10 Naatka Ukwaasanaayt tikati, aree kastaah taana bariiyeeh yꞌakriree daamaata. Aflaay Ukwaasana, Yasuuꞌaab ikwaasiit igwirhaayee timmiimaab ikwaasihoob, daayiinaayt idꞌi. Yasuuꞌa Ukwaasanaay ar gwidaab matuun beeti haay yꞌeetiit ishidhhiin, aree bareeh umatuunooh imꞌadhiidh. 11 Baruuh oodehay tumaagtii isinhiis, baruuhwa baliin yꞌinhaswa kassaah gaal Baaba ibariin. Aflaay Yasuuꞌa bareeh isanaayi indiyeek han sikwꞌaab kiiki. 12 Baruuh Ukwaasanaay dehaay,

"Oosmook isanaayi sooyi andi,

oodehay igwidaanaayi bitik whamaadook kafi andi." idi.

13 Aree baruuh masi,

"Ani barook aamani andi." idi.

Aree baruuh masi,

"Ani Ukwaasana hiiyyaayu ikatiyeeb yꞌari geeb tooy eefi." idi.

14 Yꞌar basharwa booywa ibariini sabbii, baruuh han bareeh tꞌiiteeb aadamiib iki. Shaawti tuyatii aree baruuh tooyati akrir ibariib barooh katꞌi indi. Been tuyati akrir ibari aree oobliis ikati. 15 Baliib tooyati mirkwaayii kassooh umidhhanoohna kishiyaamiyaan, baruuh kasseeh isfadiig. 16 Sidik baruuh eeshtiimeeb imalak kiikeena, laakiin Ibraahiimiib ootaas ikatiin. 17 Oon usabbii baruuh kasteeh tehayꞌaatee isanaayeeh tꞌiiteeb ikati. Bareeyooh dehaay rhamaat ibariib ikatiyi jillaaywa, sidki win fagiiri Ukwaasana shagaamiiniib ikatiyi jillaaywa daamiya. Aflaay udehayiit timaagnay afoomeent ikatiin. 18 Baruuh uukna jarrabamiyanihoob lhamiya akay, oontꞌa baruuh baliib ijarrabameen eeshtiimeet toona adgiriini.