1 Hinin hooy bhaliinayeet tuuna baku: Hinin bak tꞌiiti win fagiiri nibari, baruuh tibreeteeb Wꞌalyaanaayt tehadꞌaayeeti maygwadiib nꞌati sꞌaabi. 2 Baruuh win fagiiriit Oomhiin Winneet Umugaddasiib shagaamiini. Wꞌankwana dꞌiraab ikatiyeet sidkiit kheemaatiib ufagiiriit shagaamiini. Tukheema dehayi ayee dꞌaart kitti.

3 Win fagiiriika miyaawwa karaamaatwa fanrꞌi jillaay daamaabi. Aflaay uun han ibakii naat iniiweet toonaati. 4 Baruuh tubuutiib iifiyeek, fagiiriib kiiꞌaki. Suur akay aree whag sooyaneeb oomiyaaw iyaw dehay eefeen. 5 Ishaga ifagiiriya shagaameeneeb tibreeteeb eefeeb ishagaay kitꞌaneewwa lꞌandalaawwa tꞌiiteebi. Muusa tukheemaati dꞌuur idwilihoob, toon toona akraab soomamiya, "Shibiba, oorbaay kehii dehook lawiyaant teena tꞌiiteena saktiniya." idi. 6 Laakiin oontꞌa, Yasuuꞌa bareeyooh ushagaayka tageegaka fagiiriyaayi shaga ittiyeewaay. Ukwaasanaawwa udehayoohwa eebtik idꞌiyeeb ugalad daayikaabi. Uun ugalad daayika asaasi kehii daamaabuuyt daayikaab ikati.

7 Been ugalad whankaaneeb amaagna hooy akaat bitkaayeek, bariiyooh oomhiin weer galadi harawa kadaaya. 8 Laakiin Ukwaasana oodehayi geeb gwihaab imriit,

"Daman yꞌeena, indi Wꞌankwana,

ani Israaꞌiileeb oodehayi geebwa

Yahuudaay oodehayi geebwa

gayi galad iikwasi andi.

9 Baruuh ugalad

bareeyooh yhoobaayi geeb adꞌiyeeb tꞌiiteeb kiiki

ani bareeh yꞌayi abikaayt

Masree asfarꞌihoob,

baraah aniib ugalad ikitꞌana

aree bareesooh fidnaab yakan.

10 Ani Israaꞌiileeb oodehayi geeb akwasiyeeb ugalad oon ikati

been udoori harꞌii, indi Wꞌankwana.

Aniib whag bareeyeehna igirmaayeeb daasi andi

aree bareeyeehna iginꞌaayeeb iiktib andi.

Ani Ukwaasanaayoohna iikti andi,

aree baraah anii dehay iikti iyadna.

11 Gaal tak han ushawwooh allami kiidi,

tari tak usaniyooh dehaay, ‘Wꞌankwana kana’ iyaad kiidi,

baraah kassaah aneeb iikan iyadnayt,

baraah oodisnaay oowin ookiik aneeb iikan iyadna.

12 Bareetooh toomaag afooyi andi

aree tumaagtoohna shaawti shꞌi kaadi." idi.

13 Baruuh ugaladooh "Ugayiib" isim, been ugalad whankaaneeb shꞌiiyaab ikwaas. Tuuna tushꞌiiyaat eegrimamiit willa kwidhi tindi.