1 Teena tisꞌayaamnayeet sidik ikatiinihoob, teena irhitiyooh binꞌadgirayeet sidik ikatiinihoob, oontꞌa wꞌiimaan sidik daayiini. 2 Udamaan ishꞌiiyaay iifiin uudehay wꞌiimaaniisoohna daayi faal rayiimiyaan.

3 Tuduniya Ukwaasanaay bhaliiyee daamaat tikatiyeet toona wꞌiimaanii nikteen. Aflaay tuuna oontꞌa rhamtiniit lawaat baakaaynaatii daamaati.

4 Wꞌiimaanii Haabiil Ukwaasanaay dehaay Gaabiiliika hayiskaat karaama ifirꞌa. Baruuh wꞌiimaanii shibu tak attiyoodiyaabu, Ukwaasana baruuh ifirꞌeet toona daayiib haay bhaliiya. Aree baruuh ayaab ikatiyeek han, wꞌiimaanii masi hadiidiini.

5 Wꞌiimaanii Akhnookh toon tuduniyaatii yakamiya, aflaay baruuh tooyat dꞌamsaab kiiki. Ukwaasana barooh asti nuunamaabuuyt, gaal han barooh miraab kiiki. Baruuh whankaay yakamaab baakaay baruuh Ukwaasana afirhisaab udehayiib gaal ikati attiyoodiyaabi. 6 Wꞌiimaan anu Ukwaasana gaal han kaꞌafirhisiya. Ukwaasanaay dehaay yꞌiiniibka, Ukwaasana eefiyeet toonaawwa ibarooh yhariw baliib ijir iniiweet toonaawwa ibakii aamaneen.

7 Nooh teena harꞌook iiktiin wꞌiimaanii akraab sooya. Baruuh Ukwaasanaay mirkwaayii indhiwaayeeh ishidhhiini jillaay tufalluuka shagaamiya. Baruuh wꞌiimaaniisooh tuduniya haakamiya aree wꞌiimaanii eetniit tooshbu kwasaamiiniib iki.

8 Ibraahiim tikwasa hooy kwasaamiyaneeb oomhiin beeti wꞌiimaanii waliikamamiya. Baruuh naad iibiyeeb biikaaneek han Ukwaasanaay ibhali isnaakir aree giigiya. 9 Baruuh wꞌiimaanii ugawooh uwaadiyaay haashiib idꞌir, girba takiit girba haashiib ikwiir. Baruuh kheemaateeb ikwiri, Isehaagwa Yaaguubwa han baki idꞌiin, baraah been uwaadiya ookna bariiyooh geeb kwasaamiyaan. 10 Ibraahiim tumadiina yꞌasaas tiibriit yhigit. Tumadiinaati khattatanaawwa dꞌaariigaawwa Ukwaasana ikati.

11 Ibraahiim eegrim taku, Saara giduudiit tiiktiyeek han, baruuh wꞌiimaanii baabaab iikti. Ukwaasana barooh sidki tak uwaadiya faaysaab ikatiyeet toona iishbib. 12 Aflaay oon ootak oongaal wꞌayaab ikatiinaay gwida taas yhayikwi haddiib, tꞌabaati issi tꞌiiteeb gwida hooy eeyaan.

13 Aan uudehay kassaah iiyaaneeb ookiik masi wꞌiimaanii ikwiirna. Baraah teena tiwaadiyaamaat miraab kiikeena, laakiin teen teena teebhat rhiyaaniit sagi mhiinii yꞌashishna. Baraah girba dehay tubuuti kehii hasiibiib iiktiineet toona ifidhadhna. 14 Uudehay bak tꞌiiteet teena hadiidiin, baraah iknaayi haash yhariwneet toona rhistini. 15 Baraah ishaab iiktiineeb whaashiib iikwinneek, masi itꞌigirneet toona adgiriin. 16 Laakiin baraah daayika haash itibreeteenaay dehaay hayꞌiib iibriin. Shaawti Ukwaasana bareeh Ankwanaayoohna ittiyoodiyeet toonaatiib kiisikwꞌa. Ukwaasana bareeyooh dehaay madiinaat soomraabi.

17 Ukwaasana barooh jarrabiyanihoob, Ibraahiim wꞌiimaanii Isehaag karaamaateeb ifirꞌa. Ibraahiim Ukwaasanaay waadiya attiyeewiyaab wꞌoorooh ungaalalaay karaamaateeb iifirꞌeet toona idwil. 18 Ukwaasana bariiyooh dehaay, "Oofraay ani dehook waadiyaayaab akatiyeeb Isehaagii yꞌi iyadna." idi. 19 Ibraahiim Ukwaasana yꞌayaani yaksiti adgiriiniyeet toona aamaniya. Toon tꞌiiteena aree sidik tiki, Isehaag tuyatii bariiyooh dehaay yꞌagar eeya.

20 Isehaag wꞌiimaanii Yaaguubwa Iisaawwa harꞌook iikti damaanii dehaay idehar.

21 Yaaguub tooyat iidwilihoob, wꞌiimaanii Yuusifiib yꞌar kasseeh idehar, kwoolaytiyooh kehii adehamiyaayt Ukwaasana yꞌabid.

22 Yuusif tooyat iidwilihoob, Israaꞌiili dehay Masree itfarꞌaneet toona wꞌiimaanii hadiidiya. Baruuh masi timiitatteeh bareeyooh geeb yakseeneet toona sooya.

23 Muusaay ifaru baruuh ifrayeenaay harꞌii mhay tirgaayi oor iiktiyihoob wꞌiimaanii iikwibisna, baraah wꞌoor mada oor biikaayeet toona iktiinna. Baraah whadꞌaayt takwi biisinaakiirneet toona rikwiyaab kiikeen.

24 Muusa iwinihoob, Farꞌuuniit tꞌooti oor ittiyoodiyeet toona, wꞌiimaanii irib. 25 Baruuh shalik dooreet danuubeet nafirnayteeka, Ukwaasanaay oodehayi geeb amaag itweeriyeet toona yhayid. 26 Baruuh Masreeb oomraay wꞌalyaab kassiisoohka, Umasiihi jillaay ooneew isehaayis. Baruuh aree harꞌook imiireeb wꞌijir iishbib. 27 Baruuh Masir wꞌiimaanii yꞌish, whadꞌaay gadab rikwiyaab kiiki. Baruuh Ukwaasana ubaarhamay rhiyaneek han, agaar kiiki. 28 Baruuh wꞌiimaanii Whasamti Wꞌiid idꞌiit ubooyi safti sooya. Aflaay Israaꞌiileeb yꞌar isuurkina umalak ukwidhsanaay atoodiraab kiikeen.

29 Wꞌiimaanii aree uudehay Oobhar Wꞌadaru balama haashiit hasamiyaan. Laakiin Imasri hasamtiib jarrabiyaanihoob, bareeh aayam iyheen.

30 Wꞌiimaanii aree Ariihaayt teheeta uudehay asaramaat yina ikwilalniit sakiyaanihoob dhadhibiyaan.

31 Wꞌiimaanii aree tujakiin Rahab baliin Ukwaasana sinaakraab baakay oodehayi geeb atoodiraat kitti. Batuuh jaasuusaab tehadar.

32 Naan masi weena andi? Gidꞌoonwa, Baaraakwa, Saamsoonwa, Yaftaahwa, Daawidwa, Saamuuꞌeelwa inabiyaawwa, een bareeh hooy ibhaliiti daman dehaay kaabari. 33 Baraah wꞌiimaanii tehadꞌaayi yꞌabikna, wꞌadil yhakimna, aree toona tuwaadiyaamaat imriin. Baraah yhadhaayi yafa assiyaan. 34 Baraah akraat nꞌeet daasiyaaniit, bꞌadhdhiit yattii idhhanna. Baraah nꞌakw iiktiina, laakiin malya yꞌakirna. Baraah tuthꞌaaytiib yꞌakirna, aree yꞌashu igirbaanee dehaay ansiramiyaan. 35 Taamꞌat yꞌayaydaahna yꞌayaab yꞌagarna dehaay eeyaan, baraah masi tooyat hooy yakiyaan. Aaraw jasaamiyaana aree oofduug iribna. Aflaay baraah daayika yak masi imeer ikatiin. 36 Gwadi amaag itweeraayniit itoothꞌana, wari aree shinshilaatee imhakwaarniit oosjin daamiyaan. 37 Baraah geedamiyaana, minshaarii malu mhiin itkatꞌana, aree bꞌadhadhii itoodaarna. Baraah anootwa yaati hakooyeebwa giigiyaana, imeethibꞌana, yharagwna, aree amaag itweeraayna. 38 Tuduniya bareeh takweet hiiyyaat kitti. Baraah umingaayiibwa irbaayeebwa hawriikiyaana, aree amaraayeebwa whaashiib deelaayeebwa daayaan.

39 Baraah kassaah wꞌiimaaniyoohna jillaay daayi faal faalamiyaan. Laakiin bareesooh gaal han beet toona tuwaadiyaamaat miraab kiiki. 40 Ukwaasana daayiina dehoon kwinaabu, aflaay baraah hini geeb hiddaab oobhaat timmiimaab ikatiin.