1 Shaawti Isanaayaan imugaddasa, Ukwaasana waliikaab ikatiyeeb, Yasuuꞌiib kwinna. Baruuh oon hinin nitfadhiidheeb wꞌiimaaniib, win fagiiriiwwa linguumaawwa ikati. 2 Muusa kassooh Ukwaasanaay ugawiib amiin iiktiyeet toonaatiit, baruuh oon ushagaay dꞌuuyii dehaay waasiyaab oongaalnaay amiin iikti. 3 Ugawi dꞌaariiga oogaw ooknaayka winkaat takwi ibariyeet toonaatiit, Yasuuꞌa Muusaayka winneet hamooysamakaab akay imri. 4 Gawka gaalnaay dꞌaar ikati, laakiin Ukwaasana kasteeh tinaati dꞌaariiga ikati. 5 Muusa kassooh Ukwaasanaay ugawiib amiin shagaamana iikti. Harꞌook iikti tindiit toonaatiib badehaat tiikti 6 Laakiin Umasiih aree Ukwaasanaay ugawiib wꞌooriit amiin ikati. Toona tisꞌayaamnayeeti jillaay akra ginꞌiiwwa ashꞌareetiitwa ningadiyeek, hinin bariiyooh oogaw nikati.

7 Aflaay Aashuuk Imugaddasa iyadneet toonaatiit:

"Amsi, Ukwaasanaay whiss teemsiiwneek,

8 iginꞌaayeekna baasꞌakiirna

wꞌamgwashuushaay saktaaneet toonaatiit,

umingaayiib ijarrabamti door tidꞌiineet toona,

9 beentooy hoobaakna jarrabiyaanheeb aree idigwnaheeb

aree fadhig tamuun hawlaayeeb ani adꞌiyeet toona rhiyaan.

10 Oon usabbii been ootaasi geeb ani hasaayu,

aree malya ani ‘Bareeh diimaab iginꞌaayaahna diimaab kwidheena,

aree aniib isalala kanaab kiikeen.’ adi.

11 Aflaay ani tehasiyaaytii halafooyan,

‘Baraah aniit tifiinanii shuumi kiidiin.’ adi." idiin Aashuuk Imugaddasa.

12 Isanaayaan, gaal han hookna maagnaayt biidꞌiyeet toona gwꞌadna, Ukwaasana udhhaniinaay fidinti yakeen aamanaab baakay ginꞌa hookna biidaayayni jillaay gwꞌadna. 13 Laakiin bꞌeebka taktak sꞌakirna, oon amsi tittiyoodiit kalma teefiyeeb ookiik taktak sꞌakirna, aflaay gaal han hookna akraat maagnaaytiib ituutil kiidi. 14 Hinin whankaay niibriyeeb wꞌakra ginꞌi wꞌagiya ookiik nꞌabkeek, hinin kassaan Umasiihiib shaarakaab nikati. 15 Uuktaab bak indi:

"Amsi, bariiyooh whiss teemsiiwneek,

wꞌamgwashuushaay saktaaneet toonaatiit,

iginꞌaayeekna baasꞌakiirna." indi.

16 Baliin Ukwaasanaay whiss imaasiwniit imgwashaash aayga iiktiina? Baliin baraah kassaah Muusa Masree haay ifirꞌat imilheeb kiikeena han? 17 Aree baruuh fadhig tamuun hawla aab imhasaay? Baliin danuub idꞌiiniit igarooyaahna umingaayiib dhadhibyaaneeb kiikeena han? 18 Aree Ukwaasana tifiinaniiteeh door han biishamayneeb idiit dehaay halafooyaneeb, baliib tisnaakirooy irib nuun aayga ikatiin? 19 Baraah aamanaab kiikeenayt, aflaay tifiinaniiti whaashiib ishuumti adgiraab biikaayneet toona rhina.