Apocalipse 5

मुहरबन्द कताब और मिन्टू

1 तेबे मैं तेसरे दाँणे आथो रे एक कताब देखी, जो सिंहासनो पाँदे बैठी रा था। से कताब पीतरा-बारा ते लिखी री थी और तिजी खे सात मुहरा लगाई की बंद करी राखेया था। 2 तेबे मैं एक तागतबर स्वर्गदूत देखेया, जो जोरे की ये प्रचार करो था कि, "एसा कताबा खे खोलणे और इजी री मुहरा खे तोड़ने जोगा कुण ए?" 3 पर ना स्वर्गो रे, ना तरतिया पाँदे, ना तरतिया ते थाले कोई तेसा कताबा खे खोलणे या तिजी पाँदे नजर पाणे जोगा निकल़ेया कि तिदे क्या लिखी राखेया। 4 तेबे मेरिया आखी ते आसू निकल़ने लगे, कऊँकि तेसा कताबा के खोलणे या तिजी पाँदे नजर पाणे जोगा कोई नि मिलेया। 5 तेबे तिना बुजुर्गा बीचा ते एकी जणे माखे बोलेया, "रोओ नि, देख, यहूदो रे गोत्रो रा से शेर, दाऊदो वंशो रा मूल़ जयवंत ऊई रा। सेई एसा कताबा खे खोलणे और इना सात मुहरा खे तोड़ने जोगा ए।"

6 तेबे मैं तेस सिंहासनो गे चारो प्राणिया और तिना बुजुर्गा बीचे एक मिन्टू खड़ेया रा देखेया। से मानो फाटेया रा मिन्टू था। तेसरे सात सींग और सात आखी थिया, यो परमेशरो रिया सात आत्मा ए, जो परमेशरे सारी तरतिया रे पेजी राखिया। 7 तिने मिन्टूए आगे आयी की जो सिंहासनो पाँदे बैठेया रा था, तेसरे दाँणे आथो ते से कताब लयी ली, 8 और जेबे तिने कताब लयी ली, तेबे सेयो चारो प्राणी और चऊबी बुजुर्ग, तेस मिन्टूए रे सामणे माथा टेकणे खे चूकी गे। हर एकी रे आथो रे बीणा और तूपे की परे रे सूईने रे कटोरे थे, ये तो परमेशरो रे लोका रिया प्रार्थना ए। 9 तेबे सेयो ये नया गाणा गाणे लगे,

"तूँ एसा कताबा खे लणे

और इजी रिया मुहरा खे खोलणे जोगा ए,

कऊँकि तैं फाठी की आपणे खूने की हर एक कुल़, पाषा, लोक

और जातिया बीचा ते

परमेशरो खे लोक मोले लयी राखे।

10 और तिना खे म्हारे परमेशरो खे एक राज्य और पुरोईत बणाया

और सेयो तरतिया पाँदे राज करोए।"

11 तेबे मैं फेर देखेया, और तेस सिंहासनो, तिना प्राणिया और तिना बुजुर्गा रे चऊँ कनारे ते बऊत सारे स्वर्गदूता रा शब्द सुणेया, जिना री गिणती लाखो और करोड़ो रे थी, 12 और सेयो जोरे-जोरे की बोलो थे,

"फाटेया रा मिन्टू ई

सामर्थ, पैसा, ज्ञान, शक्ति,

आदर, महिमा और तारीफा जोगा ए।"

13 तेबे मैं स्वर्गो रे, तरतिया पाँदे, तरतिया ते थाले, समुद्रो रिया सब बणाई रिया चीजा खे और सब कुछ जो तिना रे ए, ये बोलदे ऊए सुणेया,

"जो सिंहासनो पाँदे बैठी रा, तेसरा

और मिन्टूए रा धन्यवाद और आदर,

महिमा और राज्य जुगो-जुगो तक रओ।"

14 तेबे चारो प्राणिये "आमीन्" बोलेया और बुजुर्गे चूकी की माथा टेकेया।