1 परमेशरे माखे बोलेया, "तुसे लड़ाईया खे रड़सिंगा बजाओ! मेरे लोका खे चतौणी दे! अश्शूर एक उकाब पंछिए जेड़ा ए। ये मेरी जमीना पाँदे अमला करने खे त्यार ए। मेरे लोके मां साथे कित्तेया रा वादा तोड़ी ता दा ए। तिने मेरे खलाफ ऊई की बिधानो खे मानणे खे ना करिती दी ए। 2 तिना माखे आका पायी की बोलणा, ‘ओ म्हारे परमेशर, आसे इस्राएली लोक ताखे जाणूंए!’ 3 पर इस्राएली लोक पलाईया ते डरी गे दे ए। इजी री खातर दुश्मणा तिना रा पीछा करना। 4 सेयो राजेया खे ठरांदे रये, पर मेरी इच्छा ते नि। सेयो परदान बी ठरांदे रये, पर मेरे अणजाणे दे। तिने आपणा सूईना-चाँदी लई की मूर्तिया बणाईया जेते कि सेयो आपू ई नाश ऊई जाओ।"

5 ओ सामरिया रे लोको, आपणे बाच्छूए री मूर्तिया खे सेटी देयो! आऊँ तुसा लोका ते बऊत गुस्से आ! तुसा कदुए तक निर्दोष ऊणे खे एड़े काम करदे रणा, जिना रिया बजा ते आऊँ तुसा ते कृणा करुँ। 6 ये इस्राएलो ते ऊआ। एकी कारीगरे से बणाया, से परमेशर नि ए। इजी बजा ते सामरिया रे तेस बाच्छूए री मूर्तिया रे टुकड़े-टुकड़े ऊई जाणे। 7 एकी किसानो जेड़े, इस्राएलो रे लोके अवा बाई ए। इजी री खातर तिना री खड़िया फसला तेज तूफान ऊणी! तिना रे डोरूआ दे जम्मणे वाल़िया उपजा दे कोई नज्ज नि ऊणा। इजी री खातर सेयो रोटिया रिया तँईं आटा नि बणाई सकणे। जे उपजा ते थोड़ा जा नज्ज ऊई बी जाओगा, तो परदेशी लोका से आपणियां तँईं लई जाणा। 8 इस्राएली लोक निगल़ी ते, एबे सेयो दूजी जातिया बीचे एड़े नकम्मे ठईरी रे, जेड़ा तुच्छ पांडा ठईरोआ। 9 कऊँकि सेयो अश्शूरो खे एड़े चली गे, जेड़ा बणो रा गह्दा चूण्डो ते बिछड़ी की रओआ, एप्रैमो रे लोके दूजे देशा ते मताद लणे रिया तँईं पैसे देई राखे। मानो कि सेयो आपणे प्यार करने वाल़ेया खे देणे लगी रे ओ। 10 चाए सेयो दूजी जातिया बीचा ते मजदूर बणाई की राखो, तेबे बी मां सेयो कट्ठे करने ओर सेयो राजा ओर परदानो रे बोजो रिया बजा ते कम ऊणे लगणे।

11 एप्रैमे पाप करने खे बऊत सारिया बेदिया बणाईया, सेयो बेदिया ई तेसरे पापी ऊणे री बजा बी ठईरिया। 12 आऊँ तो तिना रिया तँईं आपणे बिधानो रिया लाखो गल्ला लिखदा आई रा, पर सेयो तिना खे पराया समजोए। 13 इस्राएलो रे लोक बलिदान करना पसन्द करोए, पर मां यहोवे रिया तँईं तिना रे बलिदाना रा कोई मतलब नि ए। मां आपणे लोका खे तिना रे पापो रिया बजा ते सजा देणी। सेयो मिस्रो ते वापस आऊणे। 14 कऊँकि इस्राएले आपू खे बनाणे वाल़ा पुलाई की मईल बणाई राखे ओर यहूदे बऊत सारे गढ़वाल़े शईर बसायी राखे, पर मां तिना रे शईरो दे आग लगाणी ओर तिजी ते तिना रे शईर फूकी की स्वा ऊई जाणे।