1 ओ इस्राएलो रे लोको, आपणे परमेशर यहोवे गे वापस आई जाओ, कऊँकि तुसे आपणे पापो रिया बजा ते ठोकर खाई राखी। 2 तो एबे गल्ला सीखी की ओर यहोवे रिया तरफा खे फिरी की, तेसखे बोल, "सारे पाप माफ कर, दया करी की आसा खे मानी लो, तेबे आसा बलिया खे बल़द नि पर तन्यवादो री बलि चढ़ाणी।"* 3 अश्शूर आसा खे नि बचाई सकदा, ना ई आसा रे लड़ाईया रे कोड़े। आसा फेर आपणी बणाई री मूर्तिया ते कदी नि बोलणा, "तुसे म्हारे देवता ए" ना, सिर्फ तुसा देई अनाथा खे दया मिलोई। 4 यहोवा बोलोआ, "मां तिना रे पटकणे री आदत दूर करनी, मां तिना साथे प्यार करना, कऊँकि मेरा रोष तिना पाँदा ते उतरी गा रा।"

5 आऊँ इस्राएलो खे पाल़े जेड़ा बणना, जो बणो रे डाल़ा डाल़िया खे जीवन देयोई। से सोसणो रे फूलो जेड़ा फलणा-फूलणा। लबानोनो रे देवदारो रे डाल़ा जेड़े तेस मजबूत ऊई जाणा। 6 इस्राएल जातिया री पाँगटिया दूरो-दूरो तक फैली जाणिया, से जैतूनो रे डाल़ो जेड़ा बांका बणना, लबानोनो जेड़ी तेसरी खुशबू फैलणी। 7 मां आपणे लोका खे बचाणे रिया तँईं छांए देणी। तिना एड़िया फसला लगाणियां जिना तिना खे खूब नज्ज देणा। सेयो सफल ऊणे, जेड़े कोई बेल जो बऊत सारे अंगूर देयोई। सेयो लबानोनो रे शराबो जेड़े प्रसिद्ध ऊणे। 8 तेबे एप्रैमो रे लोका बोलणा, "एबे मूर्तिया साथे मेरा ओर क्या काम ए?" मां ई तेरिया प्रार्थना रा ज्वाब ताखे देणा ए, आऊँ ई तेरी देखपाल़ करूँआ। आऊँ सदाबार केली रे डाल़ो जेड़ा ए; ताखे मांते ई फल मिलणा।

9 जो अक्लमंद ओ, तेस ई यो गल्ला समजणियां, ये गल्ला केसी चलाक आदमिए खे जाणनी चाईए। कऊँकि यहोवे री बाटा सीदिया ए ओर तर्मी तिना पाँदे चलदे रणे, पर पापी तिना पाँदे ठोकर खाई की रूड़ने।