होशे 4

इस्राएलो पाँदे यहोवे रा कोप

1 ओ इस्राएलो रे लोको, यहोवे इस्राएलो दे रणे वाल़ेया लोका पाँदे इना बुरिया गल्ला रा दोष लगाई राखेया ए, कि इस्राएलो री जमीना दे कोई बी माणूं परोसे जोगा नि ए। तिना गे सच्चा प्यार नि ए। सेयो परमेशरो खे जाणना नि चाँदे ए। 2 एती स्राप देणे, चूठ बोलणे, अत्या करने, चोरी करने ओर व्याभिचारो खे छाडी की कुछ नि ऊँदा, सेयो मेरे सारे बिदिया ओर बिधान तोड़ो ए। सेयो ओरी रा खून बाह्ंदे रओए। 3 इजी बजा ते एस देशो रोणा, ओर मैदानो रे जीव-जन्तुआ, ओर सर्गो रे पंछिया समेत तेतेरे सब रणे वाल़े नाश ऊई जाणे, ओर समुद्रो रिया मच्छल़िया बी नाश ऊई जाणिया। 4 केसी ओरी पाँदे दोष नि लगाओ ओर ना दूजे पाँदे दोष लगाणे री कोशिश करो! मेरी शकाईत, ओ पुरोईत तां साथे ई ए। 5 तूँ दिन-रात ठोकर ई खांदा ओर रूड़दा रएआ। ओर भविष्यबक्ता बी तां साथे रूड़दे रओए। ओर मां तेरी माया जेड़े इस्राएल बी नाश करी देणा।

6 परमेशर आगे बोलोआ, "मेरे लोक बर्बाद ऊणे लगी रे कऊँकि सेयो माखे नि जाणदे। तुसे पुरोईते माखे मानणे ते मना करिती दी ए, ओर मेरिया शिक्षा खे मानणा बी छाडीता दा ए इजी री खातर आऊँ तुसा खे छाडी देऊँआ ओर तुसा रे माठे मां आपणे पुरोईता रे कामो खे नि राखणे।" 7 जिंयाँ पुरोईत बढ़दे गये, तिंयाँ ई सेयो मेरे खलाफ पाप करदे गये, तिना खे पुरोईता रे रूपो दे इज्जत मिलणी चाईयो थी, पर मां सेयो बेज्जत करने। 8 जेबे लोक पापबलि चढ़ाओए, तो पुरोईता खे खाणा मिलोआ। इजी री खातर जेबे लोक पाप करोए, तो पुरोईत खुश ओए। 9 इजी री खातर जो लोका री दशा ऊणी, सेई पुरोईतो री बी ऊणी; मां तिना रे चाल चलणो री सजा देणी ओर तिना रे कामो रे मुताबिक तिना खे बदला देणा। 10 पुरोईता खाणा, पर सेयो पूखे ई रणे; तिना वेश्या साथे गल़त काम तो करना, पर तिना रे आपणे कोई ल्वाद नि ऊणी, कऊँकि तिने आऊँ, यहोवा छाडीता दा ए।

इस्राएलो री मूर्तिपूजा

11 यहोवा आगे बोलोआ, "वेश्या रा काम करना ओर शराब ओर ताजी शराब, शराब पीणे री आदती रिया बजा ते तिना री समजणे री तागत खत्म ऊईगी री ए। 12 मेरी प्रजा रे लोक लकड़िया रे पुतले ते सवाल करोए ओर तिना रा डण्डा तिना खे भविष्य बताओआ। कऊँकि व्याभिचार कराणे वाल़ी आत्मे सेयो पड़काई राखे ओर सेयो मेरिया तँईं, मतलब आपणे परमेशरो रिया तँईं परोसे जोगे नि रये, जेड़े एक वेश्या आपणे लाड़े रिया तँईं परोसे जोगी नि रंदी।" 13 तैं आपणा परमेशर छाडीता दा ए, ओर तूँ पाह्ड़ा ओर पाह्ड़िया री चूँडिया पाँदे दूजे देवतेया रे पीछे जाओई; तूँ बड़े डाल़ा, चिनारा रे डाल़ा ओर दूजे डाल़ा निट्ठे जेती कणी छांए ओई, तूप बाल़ोई। इजी बजा ते तुसा रिया बेटिया वेश्या ओर बऊआ व्याभिचार करोईया। 14 पर आऊँ तिना खे तिना रे वेश्या रे कामो ओर व्याभिचारो रिया बजा ते कऊँ सजा देऊँ? कऊँकि तुसा रे लोक बी एई काम करने लगी रे, मतलब वेश्या ओर देवदासिया साथे पाप करने लगी रे। ओ मूर्ख लोको! तुसे समजणे ते ना करोए, इजी बजा ते तुसे नाश ऊई जाणे।

15 तुसे इस्राएलिये आऊँ तिंयाँ ई छाडीता दा ए जेड़े व्याभिचार करने वाल़े आपणे जीवन साथिये खे छाडी देयो ए, पर यहूदा रे लोका खे बी पाप करने खे मत उकसाओ। गिलगालो खे नि जाओ या बेतावेनो रे शईरो दे जाई की मूर्तिया री पूजा नि करो। तेती कोई वादा नि करो, ये बोलदे ऊए कि यहोवे री जिन्दगिया री कसम, 16 तुसे इस्राएलो रे लोक एक जवान गायी जेड़े टीठ ए। इजी री खातर आऊँ, यहोवा, तिना खे खाणा नि देई सकदा जेड़े एक ग्वाल़ा आपणे पेडा रे बच्चेया खे एक खरे काओ रे मैदानो दे लई जाई की खाणा देओआ। 17 एप्रैम*4:17 एप्रैम इस्राएल बी तेसरी मूर्तिया दे तेसरा साथी बणीगा दा ए। इजी री खातर तिना खे छाडी देयो। 18 सेयो जेबे शराब पी चुकोए, तेबे वेश्यावृतिया दे लगी जाओए, तिना रे बड़े लोक बेज्जत ऊणे ते जादा प्यार राखोए। 19 सेयो तूफानो दे फसी गे दे ए। तिना रे मूर्तिया खे बलि करने ते सिर्फ बेज्जती ई मिलणी।