परमेशरो रिया तरफा खे वापस आऊणे रा प्रतिफल
1 इस्राएलो रे लोका बोलणा, "आओ, आसे यहोवे रिया तरफा खे फिरूँए, कऊँकि तिने ई फाड़ी राखे ओर तेस ई ठीक करने, तिने ई काओ कित्ते ओर तेस ई म्हारे जख्मा दे पट्टी बी बानणी। 2 दो दिन बाद तेस आसा खे नवां जीवन देणा। तीजे दिने तेस आसे फेर नवें जेड़े बणाई देणे। तेबे आसे तेस सामणे जिऊँदे रणे। 3 आओ, आसे तेसखे यहोवे रे रूपो दे पछयाणी लईए। आओ आसे तेसखे जाणने री कोशिश करदे रईए। जेड़े प्यागा सूरजो रा आऊणा पक्का ए तेड़ा ई परमेशरो रा आऊणा बी पक्का ए। से ठण्डी रे बखतो दे ऊणे वाल़ी बर्खा जेड़ा आसा खे नवां करने आऊणा। से बरसाती री बर्खा जेड़ा ऊणा जो जमीना खे सिंजोई।"
लोक सच्चे निए
4 पर परमेशर बोलोआ, "ओ एप्रैम तू दस आऊँ तां साथे क्या करुँ? ओ यहूदा, आऊँ तां साथे क्या करुँ? तुसा रा प्यार तो प्यागा रिया तुंदा जेड़ा राची जाओआ। ये छोड़ ई प्यागा रे पाल़े जेड़ा राची जाओआ। 5 मैं तुसा खे चतौणी देणे खे आपणे नबी पेजे। तिने तुसा खे सन्देश दित्तेया कि मां तुसा खे सजा देणी। एबे से सजा तुसा खे जरूर मिलणी! मां अचाणक तुसा रा न्याय करने आऊणा, जेड़े प्यागा सूरज निकल़ोआ।" 6 कऊँकि आऊँ बलिदानो ते नि, बणे दे प्यारो साथे ई खुश रऊँआ ओर होमबलिया ते जादा ये चाऊँआ कि लोक परमेशरो रा ज्ञान राखो। 7 पर तिने लोके आदमो जेड़ी वाचा तोड़ी ती; तिने आपणे ई देशो रे मां साथे विश्वासघात करी राखेया। 8 गिलाद शईरो रे सारे लोक बुरे काम करोए। तिना री अत्या रा खून सड़का दे पड़ी रा। 9 पुरोईत लुटणे वाल़ेया जेड़े कट्ठे ऊई जाओए। सेयो लूकी जाओए ओर अमला करने खे त्यार रओए। सेयो शकेमो रिया बाटा दे न्याल़ोए, तेते बाटा रिये जाणे वाल़े लोका री अत्या करने खे त्यार रओए। तिने दुष्टता वाल़े काम करी राखे। 10 इस्राएलो रे कराने दे मैं एड़ा काम देखी राखेया जेते कि शरीरो रे बाल़ खड़े ऊई जाओए, एप्रैमो रे लोके मूर्तिया री पूजा करी की आपू खे अशुद्ध करी ला दा ए।
11 ओ यहूदा रे लोको, मां बी सई बखत आऊणे पाँदे तुसा खे सजा देणी। पर आऊँ आपणे लोका खे गुलामिया ते वापस ल्याऊणा चाऊँआ।