1 इस्राएल एक अंगूरा री खरिया बेला जेड़ा था जिदे बऊत सारे अंगूर थे। पर जिंयाँ ई इस्राएली लोक बऊत जादा अमीर ऊँदे गये तिने जादा ते जादा बेदिया बणाईया। जिंयाँ-जिंयाँ तिना री जमीने जादा उपज दित्ती, तिने तिना खम्बेया री पूजा कित्ती, सेयो ओर बांके बणाए। 2 तिना रा दिल बेईमान ए। इजी री खातर तिना आपणे पापा री सजा पुगतणी पड़नी। तेस तिना रिया बेदिया तोड़ी देणियां। तेस तिना रे पवित्र पात्थर नाश करी देणे। 3 एबे इस्राएलो रे लोक बोलेया करोए, "आसा रा कोई राजा नि ए कऊँकि आसे यहोवे रा डर नि मानदे। पर एक राजा म्हारा कुछ नि बिगाड़ी सकदा।"

4 सेयो गल्ला बणाओए ओर चूठी कसम खाई की वाचा बानोए, इजी री खातर अन्याय तिना बीचे किसानो रे डोरूए दे जईरो वाल़े काओ जेड़ा जम्मोआ। 5 सामरिया रे रणे वाल़े बेतावेनो रे बाच्छूए री मूर्तिया रिया तँईं परेशान ए; बाच्छूए री पूजा करने वाल़े तेसरिया तँईं दु:ख मनाणे लगी रे। पुजारी मूर्तिया री महिमा रिया तँईं रोणे लगी रे; कऊँकि से तेथा ते बारे करी ती दी ए। 6 से यारेब राजे री पेंट ठईरने खे अश्शूर देशो रे पऊँचाया जाणा। एप्रैम शर्मिंदा ऊणा ओर इस्राएल बी आपणी योजना ते शर्माणा। 7 सामरिया शईर ओर तेसरा राजा नाश ऊई जाणे; सेयो समुद्रो रे पाणिए पाँदे तैरदे ऊए लकड़िया रे केसी टुकड़े जेड़े बह्ई जाणे। 8 आवेनो रे पाह्ड़ो रे मन्दर, जेती इस्राएली लोक मूर्तिया री पूजा करी की पाप करोए, नाश करी देणे। तिना री बेदिया पाँदे झड़बेरिया रे डाल़ ओर कांडे-चीट जमणे ओर तेस बखते लोका पाह्ड़ो ते बोलणा, "आसा खे लकोई देयो ओर टिलेया खे कि आसा पाँदे टल़ी जाओ।"

9 ओ इस्राएलो रे लोको, यहोवा ईंयाँ बोलोआ, "जदुए ते तुसा रे लोके बऊत पईले गिबा दे पाप कित्तेया ए, तदुए ते तुसे बुरे काम करदे आई रे। ओर तुसे एबु बी सेई करने लगी रे जो बुरा ए। गिबा रे सेयो दुष्ट लोक सच्चो खे ई लड़ाईया दे फसी जाणे। 10 जेबे मेरी इच्छा ऊणी, तेबे मां तिना खे सजा देणी ओर दूजे देशा रे लोक तिना रे खलाफ कट्ठे ऊई जाणे, कऊँकि सेयो आपणे दुँईं बुरे कामो रे फसे दे ए।" 11 एप्रैम एकी बाच्छिया जेड़ा था जेसा खे मैं नज्जो पाँदे चलणा सिखाया था। से मेरिया तँईं काम करना पसन्द करो थी। पर एबे मां तेसा ते कठण काम करवाणे! मां तेसा रिया क्याड़िया पाँदे एक पारी जूँगड़ा राखणा। यहूदा खे बी जमीना दे अल़ चलाणा पड़ना। याकूबो रे वंशो खे सख्त जमीन खणने रिया तँईं काम करना पड़ना। 12 आपू खे तर्मो रे बिऊ बाओ, तेबे करूणा रे मुताबिक फसल बाडी सकणे; आपणी जमीना खे बाओ, देखो, एबु यहोवे पीछे ऊणे रा बखत ए, ताकि से आओ ओर तुसा रा उद्धार करो।

13 पर तुसे गल़त काम करने रे बीज बाई राखे। इजी री खातर तुसा आपणे बुरे व्यवहारो रा फल बाडणा ए। तुसा खे आपणे चूठो रा फल खाणा पड़ना। तुसे आपणियां तागती पाँदे परोसा करी राखेया ए। तुसे आपणे कईया सिपाईया पाँदे परोसा करी राखेया ए। 14 इजी बजा ते तुसा रे लोका बीचे लड़ाई ऊणी ओर तुसा रे सारे गढ़वाल़े शईर एड़े नाश करे जाणे जेड़ा बेतर्बेल शईर लड़ाईया रे बखते शल्मनो रे जरीये नाश ऊआ था, तेस बखते माया आपणे बच्चेया समेत जमीना पाँदे पटकी ती थिया। 15 तुसा री बऊत बुराईया रिया बजा ते बेतेल शईरो ते बी एड़ा ई बर्ताओ करेया जाणा। प्याग ऊँदे ई इस्राएलो रा राजा पूरी तरअ ते मिटी जाणा।