1 एप्रैम आपणा बखत बर्बाद करदा रओआ। इस्राएलो रे लोक सारा दिन, "अवा रे पीछे नठदे रओए।" लोक जादा ते जादा चूठ बोलदे रओए, सेयो जादा ते जादा चोरिया करदे रओए। अश्शूरो साथे तिने वाचा बानी राखी ए, ओर सेयो आपणे जैतूनो रे तेलो खे मिस्रो खे लई जाणे लगी रे। 2 यहूदा साथे बी यहोवे रा मुकद्दमा ए ओर तेस याकूबो खे तेसरे चाल-चलणो रे मुताबिक सजा देणी, तेसरे कामो रे मुताबिक तेस तेसखे बदला देणा। 3 एबु याकूब आपणी माया रे पेटो देई था कि तिने आपणे पाईए खे लाते बायी, याकूब एक शक्तिशाली जवान था ओर तेस बखते से परमेशरो साथे लड़ेया। 4 याकूब परमेशरो रे स्वर्गदूतो साथे लड़ेया ओर जीती बी गया, से रोया ओर तिने गिड़गिड़ाई की प्रार्थना कित्ती। तेसखे परमेशर बेतेलो दे मिलेया ओर तेती परमेशरे तेस साथे गल्ला कित्तिया।

5 यहोवा, सेना रा परमेशर, जेसरी याद यहोवे रे नाओं ते ओई। 6 इजी री खातर तूँ आपणे परमेशरो रिया तरफा खे फिर, कृपा ओर न्याय रे काम करदा रओ ओर आपणे परमेशरो पाँदे ई परोसा राख। 7 से बपारी ए ओर तेसरे आथो दे छलो री ताकड़ी ए, तिना खे तोखा देणा पसन्द ए। 8 एप्रैमे बोलेया, "आसे बऊत अमीर ऊईगे रे, आसा गे बऊत सारी सम्पत्ति ऊई गी री, किने बी आऊँ तोखा देंदे ऊए नि पकड़ेया! मेरे जीवनो दे कोई दोष नि ए।" 9 पर आऊँ तुसा रा परमेशर यहोवा ए, जिने तुसे मिस्र देशो री गुलामिया ते छुड़ाई की ल्याए ए। ओर मां फेर तूँ तम्बूए दे बसाणा, जेड़ा कि तुसे हर साल चूँगड़िया रे त्योआर मनांदे रओए। 10 मैं भविष्यबक्तेया रे जरीये गल्ला कित्तिया ओर बार-बार दर्शण देंदा रया ओर भविष्यबक्तेया रे जरीये चतौणी देंदा आई रा।

11 गिलाद शईरो रे लोक मूर्तिया री पूजा करोए ओर सेयो लोक पापी ए। गिलगाल शईरो दे लोक बल़दा री बलि चढ़ाओए, पर तिना रिया बेदिया छोड़ ई बाए दे डोरूए रे कनारे पात्थरा रे टेरो जेड़े ऊई जाणिया। 12 याकूब अरामो रे मैदानो दे नठीगा था, से तेती ग्वाल़े रे रूपो दे सेवा रा काम करो था ताकि तेसखे एक लाड़ी मिली सको। 13 एक भविष्यबक्ते रे जरीये यहोवा इस्राएलो खे मिस्रो री गुलामिया ते निकयाल़ी की ल्याया ओर भविष्यबक्तेया रे जरीये ई तेसरी रक्षा ऊई। 14 पर एप्रैमो रे लोके परमेशरो खे बऊत रोष चढ़ाया। एप्रैमे बऊत जे लोक कायी राखे। इजी री खातर तेसरे पापो रिया तँईं तेसखे सजा मिलणी। तेसरे यहोवे तेसखे तेसरी ई बेज्जती सईन करवाणी।