इस्राएलो रे खलाफ यहोवे रा गुस्सा
1 जेबे एप्रैम बोलो था, तेबे लोक थरथराओ थे, ओर तेसरा इस्राएलो दे बड़ा आदर था; पर जेबे से बाल देवते रिया बजा ते दोषी ऊईगा, तेबे से मरी गा। 2 एबे सेयो लोक ओर बी जादा पाप करदे रओए। सेयो आपणे चाँदिए रा इस्तेमाल आपणियां तँईं देवतेया री मूर्तिया बनाणे दे करोए। बाच्छूए री मूर्तिया तिना रे आपणे अन्दरले सोच-बचारा ते आओईया। अच्छे कारीगर तिना सबी खे बणाओए। लोक इना देवतेया री पूजा करोए। सेयो तिना खे आदमिया री बलि चढ़ाओए। सेयो बाच्छूआ जेड़े दिशणे वाल़े देवतेया खे चूम्मोए। 3 इजी री खातर सेयो तड़के रे कोरे या छोड़ ई उडी जाणे वाल़ी तेल़ा रे जेड़े ऊणे, खल्याणो ते उडणे वाल़े पूए जेड़े ऊणे या तन्दूरो ते निकल़ने वाल़े तुएँ जेड़े ऊणे।
4 तेबे यहोवे बोलेया, "मिस्र देशो ते ई आऊँ यहोवा, तेरा परमेशर ए, तैं माखे छाडी की कोई ओर परमेशर नि मानणा, कऊँकि मांते सिवा कोई तेरा उद्धारकर्ता नि ए। 5 मैं उजाड़ जगा दे तुसा री देखपाल़ कित्ती, ओर तेती बी जेती बऊत गर्मी ओर सूका था। 6 मैं इस्राएलिया खे खाणे खे दित्तेया। तिने से रोटी खाई ओर सेयो रज्जी गे, तेबे रज्जणे ते बाद तिना रा मन कमण्डो साथे परी गा, इजी बजा ते सेयो माखे पूली गे। 7 इजी री खातर आऊँ तिना खे शेरो जेड़ा बणी रा, मां चीते जेड़ा तिना री बाटा दे ताका दे बैठे दे रणा। 8 मां तिना पाँदे एड़े पालूए जेड़े अमला करना जेड़े कोई केसी पालूए रे बच्चेया खे छुड़ाई की लई गया ओ। मां सेयो फाड़ी देणे। मां शेरो जेड़े सेयो खाई देणे, मां बणो रे जानवरा जेड़े सेयो फाड़ी देणे। 9 ओ इस्राएल, तेरे नाश ऊणे री बजा ये ए कि तूँ मेरा, मतलब आपणे मताद करने वाल़े रा बिरोदी ए।" 10 एबे तेरा राजा केई रया कि तेरे सबी शईरो दे से ताखे बचाओ? ओर तेरे न्यायी केयी रये, जिना रे बारे दे तैं बोलेया था, "मेरिया तँईं राजा ओर परदान ठराई दे।" 11 मैं रोषो दे आई की ताखे राजे बणाए ओर तेबे रोषो दे आई की सेयो टायी बी दित्ते। 12 एप्रैमे आपणे पाप लकोणे री कोशिश कित्ती; तिने सोचेया था कि तेसरे पाप छिपे दे ए। पर तिना गल्ला रिया तँईं तेसखे सजा दित्ती जाणी।
13 लोका खे बच्चा जम्मणे री जिया पीड़ा जेड़े पीड़ ऊई री, पर सेयो तेस बच्चे जेड़े ए जो जन्म लणे खे ना करोए। जम्मणे रा बखत आईगा रा ए, पर से पेटो देई रओआ। 14 मां तुसे काये जाणे ते नि बचाणे ओर ना ई तेसा जगा दे जाणे ते बचाणे जेती मरे दे लोक ए। मां तुसे विपत्तिया ते दु:खी करने ओर तुसे कुल़ाई देणे ओर कब्रा दे दबाई देणे। मां तुसा पाँदे दया नि करनी। 15 दूजे देशा बीचे इस्राएल सफल रया ए। ये एक एड़े छोटिया डाल़िया जेड़ा ए जो अच्छी तरआ ते बढ़ोईया। पर एबे यहोवे मुसीबत पेजणी। ये एक मजबूत पूर्वा री अवा जेड़ा ऊणा जो रेगिस्तानो ते आओई। इस्राएलो रे कुँएं ओर पाणिए रे चरने सूकी जाणे। इस्राएले जो बी किमती चीजा जमा करी राखिया, सेयो राची जाणिया। 16 सामरिया रे लोका खे आपणे पापो री सजा पुगतणी पड़नी कऊँकि तिने आपणे परमेशरो रे खलाफ बिद्रोह कित्तेया था। सेयो दुश्मणा री सेना रे जरीये काये जाणे, तिना रे छोटे बच्चे जमीना पाँदे पटकी की काये जाणे ओर तिना री गर्भवती जवाणसा तलवारे की चीरी देणियां।