प्रेरिता रे काम 16

10 तेसरा ये दर्शण देखदे ई तिने फटाफट मकिदुनिया प्रदेशो खे जाणा चाया, ये समजी की कि परमेशरे सेयो सुसमाचार सुनाणे खे तेती बुलाई राखे।

फिलिपिया रे : लुदिया रा दिल बदल़णा

11 तेबे त्रोआसो नगरो ते जाह्ज खोली की आसे सीदे सुमात्राके टापूए खे और दूजे दिने नियापुलिस नगरो खे आए। 12 तेथा ते आसे फिलिपिया रे पऊँचे, जो मकिदुनिया प्रान्तो रा खास नगर और रोमिया री बस्ती थी और आसे तेस नगरो रे कई दिन तक रये। 13 रामो रे दिने आसे नगरो रे फाटको ते बारे नदिया रे कनारे ये समजी की गये कि तेती प्रार्थना करने खे जगा ऊणी और बैठी की तिना जवाणसा साथे, जो कट्ठिया ऊईया थिया, गल्ला करने लगे। 14 लुदिया नाओं री थुआतीरा नगरो री, बैंगणी टाल्ले बेचणे वाल़ी परमेशरो री एक भक्त जवाणस सुणने लगी री थी और प्रभुए तेसा रा मन खोलेया, ताकि से पौलुसो री गल्ला खे त्यान करी की सुणो। 15 जेबे तेसे आपणे कराने समेत बपतिस्मा लया, तेबे तेसे बिनती कित्ती, "जे तुसे माखे प्रभुए री विश्वासणी समजोए तो चली की मेरे कअरे रओ।"

पौलुस और सिलास जेला रे

16 जेबे सेयो प्रार्थना करने री जगा रे जाणे लगी रे थे, तेबे आसा खे एक दासी मिली, जेसा रे आऊणे वाल़े बखतो रे बारे रे बताणे वाल़ी दुष्टात्मा थी और जो एड़ा करने ते से आपणे स्वामिया खे बऊत कुछ कमाई की ली आओ थी। 17 से पौलुस और आसा पीछे आयी की चींगणे लगी कि, "यो माणूं परमप्रदान परमेशरो रे दास ए, जो आसा खे उद्धारो री कथा सुणाओए।"