दानिय्येल 1

दानिय्येल ओर तेसरे दोस्ता रे जरीये परमेशरो री आज्ञा रा पालण

1 जेबे यहूदा प्रदेशो दे राजा यहोयाकीमो खे राज करदे ऊए तीन साल ऊईगे थे तेबे बाबेलो रे राजा नबूकदनेस्सरे यरूशलेमो शईरो पाँदे अमला करने खे आपणे सिपाई शईरो रे चऊँ कनारे पेजी ते। 2 तेबे परमेशरे यहूदा रा राजा यहोयाकीम ओर तेसरा शईर नबूकदनेस्सरो रे कब्जे दे करिता। नबूकदनेस्सरे तिना रे यरूशलेमो दे परमेशरो रे मन्दरो रिया कुछ खास चीजा लई लिया। से तिना चीजा खे वापस शिनार खे लईगा। तिने सेयो आपणे परमेशरो रे मन्दरो दे किमती चीजा साथे राखी तिया।*1:2 2 इति. 36:7 3 तेबे तिने राजे आपणे खुसरेया रे मुखिये अशपनजो खे आज्ञा दित्ती कि इस्राएलो रे राजे रे पाऊ ओर जाणे-माने रे मर्दा बीचा ते एड़े कई जवाना खे ली आओ, 4 जो सुन्दर, अक्ला वाल़ा, ओर ज्ञानी, जो सीखणे दे तेज, ओर जिना रे शरीरो दे कोई बी दोष नि ओ, ताकि सेयो राजे रे मईलो दे सेवा करने जोगे ओ। ओर तिना खे कसदिया रे शास्त्र ओर पाषा लिखणा ओर पढ़ना सखा। 5 ओर राजे तिना खे आपणे खास खाणे बीचा ते ओर आपू खे त्यार कित्ती री खास शराबा बीचा ते एक इस्सा तिना खे खाणे खे दित्तेया। ईंयाँ तीऊँ साला तक तिना रा पालण-पोषण ऊँदा रओ, तेबे सेयो तिजी ते बाद राजे सामणे ल्याऊणे ताकि सेयो तेसरी शाही सेवा दे आई जाओ। 6 इना इस्राएली जवाना बीचे यहूदा रे कुलो ते आऊँ दानिय्येल, हनन्याह, मीशाएल ओर अजर्याह नाओं रे यहूदी चूणे थे। 7 तेबे खुसरेया रे मुखिये आपणे देशो रे मुताबिक तिना रे दूजे नाओं राखे, मतलब दानिय्येलो रा नाओं बेलतशस्सर, हनन्याह रा शद्रक, मीशाएलो रा मेशक ओर अजर्याह रा नाओं अबेदनगो राखेया।

8 पर दानिय्येले आपणे मनो रे ठाणी ला कि मां राजे री रोटी खाई की ओर शराब पी की अपवित्र नि ऊणा; इजी री खातर तिने खुसरेया रे मुखिये ते बिनती कित्ती कि माखे इना चीजा रिया बजा ते अपवित्र नि ऊणे दे। 9 परमेशरे खुसरेया रे मुखिया अशपनजो रे मनो दे दानिय्येलो रिया तँईं कृपा ओर दया परी ती। 10 पर अशपनज मुखिये दानिय्येलो खे बोलेया, "आऊँ आपणे स्वामी राजे ते डरूँआ, कऊँकि तुसा रा खाणा-पीणा तिने ई ठराई राखेया, केथी एड़ा नि ओ कि से तेरा मूँ तां साथले जवाना ते उतरेया रा ओर उदास देखो ओर तुसे मेरा प्राण राजे सामणे खतरे दे पाओ।" 11 खुसरेया रे मुखिये दानिय्येल, हनन्याह, मीशाएल ओर अजर्याह री देख-भाल़ करने खे एक पईरेदार राखी राखेया था। इजी री खातर दानिय्येले तेस आदमिए खे बोलेया, 12 "आऊँ तांते बिनती करूँआ कि आपणे दास आसा खे दसा दिना तक परख ओर देख, आसा रे खाणे खे साग-पात ओर पीणे खे पाणी देया कर। 13 तेबे दस दिन बाद म्हारे मूँ ओर जो जवान राजे री रोटी खाओए तिना रे मूँ देख ओर तेबे जो ताखे ठीक लगो, तेड़ा ई आसा साथे बर्ताओ कर।" 14 तिना री ये बिनती तिने सुणी की से पण्डारी तिना खे परखदा रया। 15 दस दिन बाद दानिय्येल ओर तेसरे साथी तिना जवाना ते तगड़े ओर अच्छे दिशे जो राजे री रोटी खाणे वाल़े थे। 16 इजी री खातर तदो ते पईरेदारे दानिय्येल ओर तेसरे साथिया खे राजे री रोटी ओर शराब देणा बन्द करिता, ओर तिना खे साग-पात ई देणे लगेया। 17 ओर परमेशरे तिना चऊँ जवाना खे सारे शास्त्र ओर सब प्रकारा री बिद्या समजणे खे बुद्धि ओर ‍परविणता दित्ती ओर दानिय्येल सब प्रकारा रे दर्शण ओर सुफने रा मतलब समजणे वाल़ा ऊईगा।*1:17 याकू. 1:5,17 18 जेबे सेयो दिन पूरे ऊईगे मतलब तीन साल जो नबूकदनेस्सर राजे तिना जवाना खे सिखाणे रिया तँईं राखे थे। तेते ते बाद खुसरेया रा मुखिया तिना खे राजे रे सामणे लईगा।

19 राजा नबूकदनेस्सर तिना जवाना साथे गलाणे लगेया ओर तेसखे पता चलेया कि दानिय्येल, हनन्याह, मीशाएल ओर अजर्याह तिना ओरी जवाना ते बड़िया ए। तेबे सेयो चारो राजे रे सेवक बणाईते। 20 जेबे बी राजे खे केसी खास गल्ला खे समजणे रिया तँईं मतादा री जरूरत ओ थी, तो यो लोक ये दखाओ थे कि यो कितणे बुद्धिमान ए। सेयो राजे रे केसी ओरी बुद्धिमान माणूंए ते दस गुणा जादा जाणो थे। सेयो लोक जादूए रा इस्तेमाल करो थे या आऊणे वाल़े बखतो दे क्या ऊणा ये जाणने खे तारेया रे बारे दे जाणकारी लओ थे। सेयो तिना सबी लग-लग देशा ते आई रे थे जिना पाँदे राजा नबूकदनेस्सर राज करो था। 21 दानिय्येल तदुए तक राजे री सेवा करदा रया जदुए तक मिस्र रे राजा कुस्रूए बेबीलोनो पाँदे जीत आसिल नि करी ली।