2 राजा 13

इस्राएलो दे यहोआहाजो रा राज्य

1 राजा अहज्याह रे पाऊ यहूदा रे राजा योआशो रे राजो रे तेईए साले येहूए रा पाऊ यहोआहाज सामरिया शईरो दे इस्राएलो पाँदे राज करने लगेया ओर सतारा साल तक राज करदा रया। 2 ओर तिने से कित्तेया, जो यहोवे री नजरा दे बुरा था, मतलब नबातो रा पाऊ यारोबाम जिने इस्राएलो ते पाप कराया था, तेसरे पापो रे मुताबिक से करदा रया ओर तिने सेयो बुरे काम नि छाडे। 3 इजी री खातर यहोवे रा रोष इस्राएली लोका पाँदे पड़केया ओर तिने सेयो अरामो रे राजा हजाएल ओर तेसरे पाऊ बेन्हददो रे कब्जे दे करीते। 4 तेबे यहोआहाजे यहोवे रे सामणे गिड़गिड़ाई की बिनती कित्ती ओर यहोवे तेसरी सुणी, कऊँकि यहोवे इस्राएलो रे लोका पाँदे अन्देर ऊँदा ऊआ देखेया कि अरामो रा राजा तिना पाँदे केड़ा अन्देर करो था। 5 इजी री खातर यहोवे इस्राएलो खे एक छुड़ाणे वाल़ा दित्तेया ओर सेयो अरामो रे वशो ते छूटी गे ओर इस्राएली आपणे पईलके दिना जेड़े फेर आपणे-आपणे डेरे दे रणे लगे। 6 तेबे बी सेयो एड़े पापो ते नि फिरे, जेड़े यारोबामो रे कराने कित्ते ओर जिना रे मुताबिक तिने इस्राएलो ते पाप कराये थे, पर तिना बुरे कामा पाँदे चलदे रये ओर सामरिया शईरो दे अशेरा देविया री मूर्ति बी खड़ी रई। 7 अरामो रे राजे तो यहोआहाजो री सेना अराई ती। तिने सेना रे जादातर सिपाई काईते ते। तिने बस पंजा कोड़ेया रे सवार, दस रथ ओर 10,000 पैदल चलणे वाल़े सिपाई छाडी ते थे। तिने सेयो माँडी-माँडी की तूड़ा दे मलाई ते थे। 8 यहोआहाजो रे ओर सारे काम जो तिने कित्ते ओर तेसरी वीरता, ये सब इस्राएलो रे राजेया रे इतिआसो री कताबा दे लिखी राखे। 9 अन्तो दे यहोआहाज मरीगा ओर से सामरिया दे दबाईता ओर तेसरा पाऊ यहोआश तेसरी जगा पाँदे राज करने लगेया।

इस्राएलो दे यहोआशो रा राज्य ओर एलीशा री मौत

10 यहूदा रे राजा योआशो रे राज्य रे सैंथिये साले यहोआहाजो रा पाऊ यहोआश सामरिया दे इस्राएलो पाँदे राज करने लगेया ओर सोल़ा साल तक राज करदा रया। 11 ओर तिने से कित्तेया, जो यहोवे री नजरा दे बुरा था, मतलब नबातो रा पाऊ यारोबाम जिने इस्राएलो ते पाप कराया था, तेसरे पापो रे मुताबिक से करदा रया ओर तिना ते लग नि ऊआ। 12 यहोआशो रे ओर सारे काम जो तिने कित्ते ओर जेड़ी वीरता साथे से यहूदा रे राजा अमस्याह साथे लड़ेया, ये सब इस्राएलो रे राजेया रे इतिआसो री कताबा दे लिखी राखे। 13 अन्तो दे यहोआश मरीगा ओर यारोबाम तेसरी गद्दिया पाँदे बैठेया ओर यहोआश सामरिया शईरो दे इस्राएलो रे राजेया बीचे दबाईता। 14 तेबे एलीशा खे से बमारी लगी गी जेते साथे से मरने वाल़ा था, तेबे इस्राएलो रा राजा यहोआश तेसगे गया ओर तेस पाँदे रोई की बोलणे लगेया, "हाय मेरे बाओ! हाय मेरे बाओ! हाय इस्राएलो रे रथ ओर सवारो!" 15 एलीशे तेसखे बोलेया, "धनुष ओर तीर ली आओ।" से तेसगे धनुष ओर तीर ली आया। 16 तेबे तिने इस्राएलो रे राजे खे बोलेया, "धनुषो दे आपणा आथ लगा।" जेबे तिने आपणा आथ लगाया, तेबे एलीशे आपणे आथ राजे रे आथो पाँदे राखी ते। 17 तेबे तिने बोलेया, "पूर्वो री द्वारी खोल।" जेबे तिने से खोली ती, तेबे एलीशे बोलेया, "तीर छाडी दे;" तिने तीर छाडेया ओर एलीशे बोलेया, "ये तीर यहोवे रिया तरफा ते छुटकारे, मतलब अरामो प्रदेशो ते छुटकारे रा नशाण ए, इजी री खातर तां अपेको दे अराम एथो तक मारना कि तिना रा अन्त करी देणा।" 18 फेर तिने बोलेया, "तीरा खे लओ;" ओर जेबे तिने सेयो लये, तेबे तिने इस्राएलो रे राजे खे बोलेया, "जमीना दे बा;" तेबे से तीन बार बाई की रूकी गा। 19 तेबे परमेशरो रा पग्त एलीशा योआशो पाँदे रोषे ऊआ, ओर तेसखे बोलेया, "ताखे तो जमीना पाँदे पाँज-छे बार बाणी चाईयो थी। एड़ा करने ते तां अराम तेसरे नाश ऊणे तक अरांदे रणा था। पर एबे तूँ तेसखे सिर्फ तीन ई बार अराई सकेया।"

एलीशा री कब्रा दे एक नौखा काम ऊआ

20 तेबे एलीशा मरी गा ओर लोके से दबाईता। एक साल बाद मोआबो रे दले देशो पाँदे हमला कित्तेया। 21 कुछ इस्राएली लोक केसी माणूंए खे दबाणे खे आऊणे लगी रे थे कि एक दल तिना खे दिशेया, तेबे तिने से लोथ एलीशा री कब्रा दे पाईती ओर एलीशा री आड्डिया साथे छूँदे ई से जिऊँदा ऊईगा ओर आपणे पैरा रे पारे खड़े ऊईगा। 22 यहोआहाजो री पूरी जिन्दगी अरामो रा राजा हजाएल इस्राएलो पाँदे अन्देर ई करदा रया। 23 पर यहोवे तिना पाँदे अनुग्रह कित्तेया ओर तिना पाँदे दया करी की आपणी तेसा वाचा रिया बजा ते जो तिने अब्राहम, इसहाक ओर याकूबो साथे बानी थी, तिना पाँदे दया-दृष्टि कित्ती ओर ना तो सेयो नाश कित्ते ओर ना आपणे सामणे ते निकयाल़े। 24 तेबे अरामो रा राजा हजाएल मरी गा ओर तेसरा पाऊ बेन्हदद तेसरी जगा पाँदे राजा बणेया। 25 तेबे यहोआहाजो रे पाऊ योआशे हजाएलो रे पाऊ बेन्हददो रे आथो ते सेयो शईर फेर लई ले, जो तिने तेसरे बाओ ते युद्ध करी की छुड़ाई लये थे। योआशे तेसते तीन बार जीती की इस्राएलो रे शईर फेर लई ले।