2 राजा 5

नामान कोढ़िए खे शुद्ध करना

1 अरामो*5:1 अरामो जेतेखे आज सीरिया देश बोलेया जाओआ। रे राजे रा नामान नाओं रा सेनापति आपणे स्वामिए री नजरा दे बड़ा ओर जाणेया-मानेया रा था, कऊँकि यहोवे तेसरे जरीये अरामिया खे जीत दलाई थी ओर से शूरवीर था, पर कोढ़ी था। 2 कुछ बखत पईले अरामी लोक दल बानी की इस्राएलो रे देशो रे गये थे ओर तेथा ते एक छोटी बेटी बन्दी बणाई की जबरदस्ती ली आए थे ओर से नामानो री लाड़िया री सेवा करो थी। 3 एक दिन तेसे आपणी मालकणिया खे बोलेया, "जे मेरा स्वामी सामरिया रे नबीया गे ऊँदा, तो कितणा ठीक ऊँदा! कऊँकि तेस से कोढ़ो ते ठीक करी देणा था।" 4 तेबे नामानो री लाड़िए तेसगे बोलेया जो तेसे बेटिए बोलेया था तेबे तेड़ा ई नामाने बी आपणे स्वामिए गे जाई की बोली ता, "इस्राएली बेटी ईंयाँ बोलोई।" 5 अरामो रे राजे बोलेया, "ठीक ए, तूँ जा ओर नबीए खे दखा, मां इस्राएलो रे राजे गे एक चिट्ठी पेजणी।" तेबे नामान 30,000 चाँदिए रे सिक्के, 6,000 सूईने रे सिक्के ओर दस जोड़े टाल्लेया रे साथे लई की चली गा।

6 ओर से इस्राएलो रे राजे गे ये चिट्ठी लईगा जिदे ये लिखी राखेया था, "आऊँ आपणे दास सेना रे सेनापति नामानो खे तांगे इजी खे पेजणे लगी रा ताकि तूँ तेसरा कोढ़ दूर करे।" 7 एसा पर्चिया रे पढ़ने ते बाद इस्राएलो रे राजे आपणे टाल्ले फाड़ी की बोलेया, "क्या आऊँ काणेवाल़ा ओर जिऊँदा करने वाल़ा परमेशर ए कि तिने माणूंए कोई मांगे इजी खे पेजेया कि आऊँ तेसरा कोढ़ ठीक करुँ? सोच-बिचार तो करो, से मां साथे लड़ने री बजा टोल़ो ऊणा।" 8 जेबे परमेशरो रे पग्त एलीशे ये सुणी की कि इस्राएल देशो रे राजे आपणे टाल्ले फाड़ी राखे, परमेशरो रे पग्त एलीशे राजे गे सन्देसा पेजेया, तैं आपणे टाल्ले कऊँ फाड़े? तेस सेनापतिये खे मांगे पेज, तेबे तेस जाणी लणा कि इस्राएलो दे बी भविष्यबक्ता ए।

9 तेबे नामान कोड़े ओर रथा समेत एलीशा रे द्वारो पाँदे खड़ा ऊआ। 10 पर एलीशा तेसते मिलणे खे बारे नि आया ओर तिने एकी दूतो गे तेसगे सन्देसा पेजेया, "तूँ जाई की यरदन नदिया रे सात बार डूबकी लगा, एड़ा करने ते बाद तेरा शरीर जेड़ा था तेड़ा ई ऊई जाणा ओर तूँ शुद्ध ऊई जाणा।" 11 पर नामान रोषे ऊई की ये बोलदा ऊआ चली गा, "मैं तो सोचेया था कि से जरूर मांगे बारे आऊणा ओर खड़े ऊई की आपणे परमेशर यहोवे ते प्रार्थना करी की कोढ़ो रिया जगा दे आथ फेरी की कोढ़ो खे दूर करोगा! 12 दमिश्को रिया नदिया अबाना ओर पर्पर नदिया इस्राएलो रे सारे पाणिए री जगा ते खरिया ए। आऊँ तिना दे नाह्यी की शुद्ध नि ऊई सकदा क्या, इजी री खातर से जल़दा ऊआ वापस चली गा। से बऊत गुस्से दे था।" 13 तेबे तेसरे सेवक तेसगे आई की बोलणे लगे, "ओ म्हारे स्वामी जे भविष्यबक्ता ताखे कोई पारी काम करने खे बोलदा, तो क्या तां से नि करना था? फेर जेबे से बोलोआ कि डूबकी लगाई की शुद्ध ऊई जा, तो कितणा जादा ये मानणा चाईयो।" 14 तेबे तिने परमेशरो रे नबीए रे बोलणे रे मुताबिक यरदन नदिया दे जाई की तिदे सात बार डूबकी लगाई ओर तेसरा शरीर छोटे पाऊए जेड़ा ऊईगा ओर से शुद्ध ऊईगा। 15 इजी ते बाद से आपणे सारे दलो समेत परमेशरो रे पग्तो गे वापस चली गा ओर तेस सामणे खड़े ऊई की बोलणे लगेया, "सुण, एबे माखे पता लगी गा दा कि सारी तरतिया पाँदे इस्राएलो खे छाडी की ओर केथी परमेशर नि ए! इजी री खातर एबे आपणे दासो री पेंट लओ।" 16 एलीशे बोलेया, "यहोवा जेस सामणे आऊँ रऊँआ, तेसरी जिन्दगिया री कसम मां कुछ नि लणा ओर जेबे तिने से बऊत मजबूर कित्तेया कि पेंट लई लो, तेबे बी से ना ई करदा रया।" 17 आखरी दे नामाने बोलेया, "अच्छा, तो तेरे दासो खे दो खच्चरा माट्टिया रिया लई जाणे दे, ताकि आऊँ एतेरी एक बेदी बणाऊँ, कऊँकि आजो ते बाद तेरे दासो यहोवे खे छाडी की ओर केसी देवते गे होमबलि या मेलबलि नि चढ़ाणी।" 18 एक गल्ल यहोवा तेरे दासा री माफ करो कि जेबे मेरा स्वामी अराम देशो रा राजा रिम्मोन देवते रे मन्दरो दे माथा टेकणे जाओ ओर से मेरे आथो रा साअरा लओ ओर ईंयाँ माखे बी रिम्मोनो रे मन्दरो दे माथा टेकणा पड़ो, तेबे यहोवा तेरे दासो रा ये काम माफ करो कि आऊँ रिम्मोनो रे मन्दरो दे माथा टेकूँ। 19 तिने तेसखे बोलेया, "शान्तिया दे आपणे कअरो खे जा।" से तेसगे ते थोड़ी दूर चली गा था, 20 कि परमेशरो रे पग्त एलीशा रा सेवक गेहजी सोचणे लगेया, "मेरे स्वामिए तो से अरामी नामान ईंयाँ ई छाडीता कि जो से ली आया था तिने से नि लया, पर यहोवे री जिन्दगिया री कसम मां तेस पीछे दौड़ी की कुछ ना कुछ लई लणा।" 21 तेबे गेहजी नामानो पीछे दौड़ेया ओर नामान केसी खे आपू पीछे दौड़दा ऊआ देखी की, तेस साथे मिलणे खे रथो ते उतरेया ओर पूछेया, "सब ठीक-ठाक तो आए?" 22 तिने बोलेया, "आ, सब ठीक ए; पर मेरे‍ स्वामिए आऊँ ये बोलणे खे पेजी राखेया कि एप्रैमो रे पाह्ड़ी इलाके ते भविष्यबक्तेया रे चेलेया बीचा ते दो जवान मांगे यबु आई रे, इजी री खातर तिना रिया तँईं 3,000 चाँदिए रे सिक्के ओर दो जोड़िया टाल्लेया रिया दे।" 23 नामाने बोलेया, "दो गुणा लई लो।" तेबे तिने तेसते बऊत बिनती करी की 6,000 चाँदिए रे सिक्के लग थैलिया दे बानी की, दो टाल्लेया रिया जोड़िया समेत आपणे दो सेवका पाँदे लादी ता ओर सेयो तिना खे तेसते आगे-आगे लई चले। 24 जेबे से टिले गे पऊँचेया, तेबे तिने सेयो चीजा तिना ते लई की कअरे राखी तिया ओर सेयो माणूं पेजी ते ओर सेयो चली गे। 25 ओर से पीतरे जाई की आपणे स्वामिए गे खड़ा ऊआ। एलीशे तेसते पूछेया, "ओ गेहजी, तूँ केथा ते आऊणे लगी रा?" तिने बोलेया, "तेरा दास तो केथी नि जाई रा।" 26 ओर एलीशे तेसखे बोलेया, "ये सच नि आ, जेबे से माणूं एथो खे मूँ फेरी की तां साथे मिलणे खे आपणे रथो ते उतरेया, तेबे से पूरा आल माखे पता था; क्या ये बखत चाँदी, टाल्ले, जैतून, अंगूरा रे बगीचे, पेडा-बाकरिया, गाय-बल़द ओर दास-दासिया रा लणे राए? 27 इजी बजा ते नामानो रा कोढ़ ताखे ओर तेरे कुलो खे सदा तक लगेया दा रणा।" तेबे से बर्फा जेड़ा सफेद कोढ़ी ऊई की तेस सामणे ते चली गा।